Suv ichishdan oldin Fotiha surasi to‘liq o‘qiladi. So‘ngra o‘tirgan holatda suvni ichiladi. Fotiha surasini o‘qib keyin suv ichilganda tiqilib qolgan qon tomirlari ochilib ketadi, qon aylanish sistemasi iziga tushadi, yurak faoliyati yaxshilanadi, qalb orom oladi. Insonda ichki quvvat paydo bo‘ladi, ichki a’zolar (oshqozon, jigar, ichaklar) ravon ishlaydi.
Aslida, Qur’on boricha shifo, Rabboniy dorixonadir. Bir stakan suvni Fotiha surasini o‘qib ichishga odatlangan kishi buni his qiladi.
Fotiha surasi ruhingizga ruh, kuchingizga kuch bahsh etadi.
Fotiha surasi hayotingizdagi barcha muammolarni hal qiladi, hattoki er-xotin o‘rtasidagi, farzandlar o‘rtasidagi, ishdagi, o‘qishdagi muammolar ham bundan mustasno emas.
Fotiha surasi qalbdagi kina kudurat, bug‘zu adovatga ham barham beradi. Hasad, kibr, ujb va g‘urur kabi qalb hastaliklarini davolaydi, turli mikroblar va zararli viruslarni o‘ldiradi.
Xonangizni Fotiha surasining xushbo‘y atri bilan muattar qiling. To‘shagingizga yotganingizda ham takror va takror o‘qing.
Fotiha surasini o‘qishlik ishlaringizni tartibli bo‘lishini ta’minlaydi.
Fotiha surasini ma’nolarini tushunib o‘qishga harakat qiling. Alloh taolo “Fotiha” surasini tavsiflar ekan:

وَلَقَدْ ءَاتَيْنَٰكَ سَبْعًا مِّنَ ٱلْمَثَانِى وَٱلْقُرْءَانَ ٱلْعَظِيمَ

“Darhaqiqat, Biz Sizga yetti takrorlanuvchi (yetti oyatli «Fotiha» surasi)ni va ulug‘ Qur’onni ato etdik”, deb marhamat qilgan (Hijr surasi, 87-oyat).
Arab tilida “و”  “va” bog‘lovchisi tenglikni ifodalaydi. Ya’ni, Alloh taolo “Fotiha” surasini Ulug‘ Qur’onga tenglashtiryapti. Shuning uchun ulamolar: Qur’oni karimning ma’nolari Fotiha surasiga singdirilgan, Fotiha surasining ma’nolari “Sengagina ibodat qilamiz va Sendangina yordam so‘raymiz” degan oyatga singdirilgan, deydilar.
Fotiha surasi bir kunda sunnat va nafl namozlardan tashqari faqat farz namozlarining o‘zida o‘n yetti marta takror o‘qiladi. Takror-takror o‘qilishida ham sir bor. Agar biror namozning birorta rak’atida o‘qilmay qolsa, namoz mukammal bo‘lmay qoladi.
Rasululloh sollallohu alayhi vasallam Fotiha surasini “Shofiya” (Shifo beruvchi), “Kofiya” (Kifoya qiluvchi), Qur’ondagi eng buyuk sura deb nomlaganlar. Sahobalar bemorning og‘riyotgan yeriga qo‘llarini qo‘yib Fotiha surasini yetti marta o‘qiganlarida Allohning izni bilan kasal tuzalar edi.
Qachon Qur’on o‘qisangiz uni Fotiha surasi bilan boshlang. Fotiha surasi zulmatlarni nurga aylantiradi, ko‘ngil siqilishidan xalos etadi, g‘am-tashvishlarni aritadi. 
Shunday ekan, bir stakan suvni Fotiha surasini o‘qib iching, Allohning izni bilan farqini bilasiz.

Homidjon domla ISHMATBЕKOV