Cavol: Sochimni yuvganimdan keyin chigalini ketkazish uchun maxsus yog‘dan foydalanaman. Shundan keyin tahorat olganimda sochimga mas'h tortsam bo‘ladimi?

Javob: Bismillahir Rohmanir Rohiym. Ma’lumki, mazhabimizga ko‘ra, boshning to‘rtdan biriga mas'h tortish tahoratning farzlaridan bo‘lib, sochga surtilgan yog‘ yoki krem ostiga suvni o‘tkazishga mone’lik qilmasa, tahorat durust bo‘ladi. Zero, Rasululloh sollallohu alayhi vasallam sochlarini zaytun moyi bilan moylar va boshqalarni ham shunga buyurar edilar.

Agar surtilgan moy suvni o‘tkazmasa, uni ketkazish lozim bo‘ladi.  Aks holda tahorat va g‘usl durust bo‘lmaydi. Bu haqida alloma Ibn Nujaym rohimahulloh Bunday deganlar:

وَلَوْ أَلْزَقَتْ الْمَرْأَةُ رَأْسَهَا بِالصَّبغ بِحَيْثُ لَا يَصِلُ الْمَاءُ إلَى أُصُولِ الشَّعْرِ وَجَبَ عَلَيْهَا إزَالَتُهُ

“Agar ayol kishi boshiga sochining ostiga suvni o‘tkazmaydigan qilib yelim surtgan bo‘lsa, uni ketkazish vojib bo‘ladi” (“Al-Bahrur-Roiq” kitobi).

Agar boshiga krem surtgan kimsa mas'h tortganida, boshining to‘rtdan bir qismiga suv yetsa, uning tahorati durust bo‘ladi. Vallohu a’lam.

O‘zbekiston musulmonlari idorasi
Fatvo markazi.