Sizdagi bor va yo‘q ne’matlar haqida fikr yuritib, o‘zingizni tanishingiz uchun ikkita varaq qog‘oz oling. Birinchi varaqqa o‘zingizda bor ne’matlarni, masalan, ibodatga, oilaga, tanangizga, salomatligingizga, ijtimoiy aloqalarga oid hamma ne’matlarni yozing. Ikkinchi varaqqa esa sizda bo‘lmagan ne’matlarni – ibodatga, oilaga, tanangizga, salomatligingizga, ijtimoiy aloqalarga oid va hokazo, barcha ne’matlarni yozing.

Endi sizda yo‘q ne’matlar yozilgan varaqni olib, ular haqida bir kun davomida mulohaza qiling, keyin ularni atrofingizdagi insonlarda bor ne’matlar bilan solishtirib chiqing. Kechqurun esa nimalarni his qilganingizni yozib qo‘ying.

Keyingi kuni sizga berilgan ne’matlar yozilgan varaqni olib, u haqda ham kun bo‘yi fikr yuriting. Keyin uni atrofingizdagi kishilarda yo‘q ne’matlar bilan solishtirib chiqing. Bu haqdagi his-tuyg‘ularingizni ham kechki payt yozib qo‘ying.

Ishonchim komilki, bu tajribadan keyin hayotingiz ijobiy tarafga o‘zgarib ketadi, baxtu saodatga to‘lib ketadi.

Yaxshilab o‘ylab, mana shu savolga javob bering: bu oyatni o‘qib, unga amal qilish uchun Alloh sizga bergan qaysi ne’matlarni, kimga aytib berishni o‘yladingiz?

Albatta, bu ne’matlar borligini birinchi navbatda o‘zingizga aytishingiz kerak. Shuning uchun Alloh sizga bergan ne’matlarini o‘zingizga kerak bo‘lsa har kuni eslatib turing. Allohning sizga ko‘rsatgan marhamati haqida o‘zingizga o‘zingiz so‘zlasangiz, ne’matlarni unutishdan, qayg‘uga tushishdan qutulasiz. Shayton sizda yo‘q narsalarga e’tiboringizni tortib, sizni o‘yin qilishiga imkon bermang! Qog‘oz-qalam olib, Alloh sizga bergan ne’matlarni yozib chiqish, bu ro‘yxatga har kuni sizga ato etilayotgan yangidan-yangi ne’matlarni qo‘shib borishingiz naqadar go‘zal! Bu ro‘yxat kundan kunga ko‘payib, son-sanoqsiz bo‘lib ketadi hali. Chunki Alloh taolo "Allohning ne’matlarini sanasangiz, sanog‘iga yeta olmaysiz. Alloh mag‘firatlidir, rahmlidir" (Nahl surasi, 18-oyat).

Abdulloh Abdulmu’tiy, Huda Sa’id Bahlulning
“Qulog‘im senda qizim” kitobidan G‘iyosiddin Habibulloh,
Abdulhamid Umaraliyev tarjimasi.