Bugun O‘zbekiston musulmonlari idorasi raisi muftiy, Shayx Nuriddin Xoliqnazar hazratlari juma namozini Toshkent shahridagi “To‘xtaboy” jome masjidida ado qildilar. 

Muftiy hazratlari dastlab yig‘ilgan jamoatni yaqinlashib kelayotgan Rabiul-avval oyi va juma ayyomi bilan muborakbod etib, “Sarvari olam siyratlaridan saboq olish mavsumi!” mavzusida ma’ruza qildilar. 

Shayx Nuriddin Xoliqnazar hazratlari suhbat davomida mo‘min-musulmonlar Payg‘ambarimiz sollallohu alayhi vasallam tavallud topgan Rabiul-avval oyida u zot alayhissalomning siyratlarini o‘rganish, go‘zal xulqlaridan namunalar olishga e’tibor berishi lozimligini ta’kidladilar. 

Ma’ruza asnosida Qur’oni karimdagi: “(Ey, iymon keltirganlar!) Sizlar uchun – Alloh va oxirat kunidan umidvor bo‘lgan hamda Allohni ko‘p yod qilgan kishilar uchun Allohning payg‘ambarida go‘zal namuna bordir” (Ahzob surasi, 21) oyati karimasi hamda “Sizlardan birortangiz men unga bolasidan, ota-onasidan va odamlarning hammasidan mahbubroq bo‘lmagunimcha, mo‘mini komil bo‘la olmaydi” (Imom Buxoriy rivoyati), degan mazmundagi hadis sharhlab berildi. 

Xulosa o‘laroq mavlid oyida oila davrasida siyratga oid kitoblarni mutolaa qilib, farzandlar qalbida Rasululloh alayhissalomga muhabbatni uyg‘otish go‘zal amallar sirasiga kirishi aytib o‘tildi.   

Suhbat yakunida Haq taolodan elu yurtimiz tinchligi va farovonligi, yaqinlashib kelayotgan Mavlid oyini xayrli va barakali bo‘lishini so‘rab duolar qilindi.

O‘zbekiston musulmonlari idorasi
Matbuot xizmati