Savol: Vafot etganlar tiriklarning, yaqinlarining amallaridan xabardor bo‘lib turadimi?

Javob: Bismillahir Rohmanir Rohiym. Marhumlarning ruhiga, Alloh taolo istasa, uning tirik qarindosh-urug‘larining amallari va holatlaridan xabar beriladi. Bu haqda bir qancha hadisi shariflar kelgan. Ularda agar marhumning qarindosh-urug‘lari yaxshi amallar qilsa, uning ruhi xursand bo‘lishi, yomon amallar qilsa, xafa bo‘lishi bayon qilingan.

Anas ibn Molik roziyallohu anhudan rivoyat qilinadi. Nabiy sollalohu alayhi vasallam: «Albatta sizlarning amallaringiz vafot qilgan qarindosh-urug‘laringizga ko‘rsatiladi. U(amal)lar yaxshi bo‘lsa, xursand bo‘ladilar. Agar unday bo‘lmasa: “Alloh, ularni bizni hidoyat qilganingdek hidoyat qilmaguningcha vafot ettirmagin”, deyishadi», dedilar (Imom Ahmad rivoyati).

Ibn Abu Dunyo rahimahulloh Abu Hurayra roziyallohu anhudan rivoyat qilgan hadisda Rasululloh sollallohu alayhi vasallam: “Marhumlaringizni yomon amallaringiz bilan sharmanda qilmanglar, chunki bu (amallar) qabrdagi yaqinlariga ko‘rsatiladi”, deganlar.

Vallohu a’lam.

O‘zbekiston musulmonlari idorasi
Fatvo markazi.