Toshkent islom institutida “Diniy ta’lim muassasalarida ijtimoiy fanlarni o‘qitishning istiqbollari” mavzusida offlayn-onlayn shaklda yig‘ilish bo‘lib o‘tdi.

O‘zbekiston musulmonlari idorasi raisi o‘rinbosari M.Muhammadsiddiqov raisligida o‘tgan yig‘ilishda Din ishlari bo‘yicha qo‘mita raisining birinchi o‘rinbosari D.Maxsudov, Ta’lim va ilmiy-tadqiqot bo‘limi mutaxassisi M.Nasriyev, institut rektori U. G‘afurov hamda professor-o‘qituvchilar ishtirok etdilar.

Yig‘ilishda diniy ta’lim muassasalarida ijtimoiy-gumanitar fanlarni o‘qitishning bugungi holati, mavjud muammolar va istiqbolli yo‘nalishlar muhokama qilindi.

Hozirda diniy ta’lim muassasalarida 111 nafar ijtimoiy fanlar o‘qituvchisi faoliyat yuritib, 2025–2026 o‘quv yilida fanlarga tegishli yo‘nalishdagi malakali pedagoglar jalb qilindi.

So‘zga chiqqanlar, fan-mutanosiblikni ta’minlash va kadrlar bazasini takomillashtirish, ilmiy darajali pedagoglarni metodik rahbar sifatida jalb etish, ijtimoiy fanlarni islomiy qadriyatlar bilan uyg‘un holda o‘qitish, interaktiv va axborot texnologiyalaridan samarali foydalanish, fanlar bo‘yicha yagona kompetensiya modelini ishlab chiqish, darslik va o‘quv qo‘llanmalarni zamon talablariga moslashtirish, talabalarda vatanparvarlik, fuqarolik jamiyati va dinlararo bag‘rikenglik g‘oyalarini mustahkamlash kabi masalalarga to‘xtalib, fikr va takliflarini bildirdi.

Yig‘ilish yakunida ijtimoiy fanlarni o‘qitishda ilmiylik va tarbiyaviy samaradorlikni yanada oshirish yuzasidan aniq vazifalar belgilab olindi.

T.Azimov