Misrlik yosh qiz Rihab Saloh ash-Sharif bir yarim yil ichida Qur'oni karimni to'liq yodlashga va uch oyda to'liq ko'chirib yozishga muvaffaq bo'ldi. Bu haqda IQNA sayti "Cairo-24" ga tayanib xabar berdi. U Misr shimolidagi Qina viloyatining Farshut shahrida yashaydi.
Ayni paytda 21 yoshli Rihab Misr Arab Respublikasining Asyut shahridagi "al-Azhar" universitetining adabiyot fakulteti uchinchi kurs talabasi bo'lib, arab tili va adabiyotini o'rganmoqda.
Ma'lum bo'lishicha, dastavval u Qur'oni karimni bir yarim yil ichida to'liq yodlashni o'z oldiga maqsad qilgan edi.
Qohiraning “Cairo-24” telekanaliga bergan interv'yusida u Qur'oni karimni "al-Azhar" universitetida tahsil olayotgan paytda yod olishni boshlagani, biroq bir yarim yil avval uni to'liq yod olishga qaror qilganini aytdi.
Rihab Qur'oni karimni faqat yodlash uchun yozishni boshlagani va bu muqaddas kitobni uch oyda yozib tugatganini ma'lum qilgan.
Qur'oni Karimni yozib, so'ng yodlash qadimdan Qur'on hofizlarining o'z xotiralarini mustahkamlash uchun qo'llagan usullaridan biri sanaladi.
O'zbekiston musulmonlari idorasi
Matbuot xizmati
Toshkent islom institutining 1-kurs talabasi Biloliddin Ibrohimjonov 30 pora Qur’oni karimni bir kunda yoddan o‘qib berdi.
Qur’oni karimni o‘qish jarayonini "Qur’on ilmlari" kafedrasi o‘qituvchilari Jahongir qori Ne’matov, Valixon qori Azimboyev, Abdulbosit qori Qobilov, Habibullo qori Olimjonov va boshqa ustoz hamda talabalar kuzatib bordilar.
Ushbu natijani taqdirlash uchun 5 dekabr kuni tadbir tashkil qilindi. Tadbirda Toshkent islom instituti rektori Uyg‘un domla G‘afurov, prorektor Yoqubjon domla Buxorboyev, kafedra mudirlari Soatmurod domla Primov va Jahongir qori Ne’matov hamda institutning boshqa ustoz va talabalari ishtirok etishdi.
Toshkent islom instituti
Matbuot xizmati