Talaba 30 pora Qur'oni karimni bir kunda to'liq yoddan o'qib berdi
Toshkent islom instituti 3–kurs talabasi Mashrabjon qori Abdurazzoqxo'jayev 30 pora Qur'oni karimni bir kunda, bir o'tirishda yoddan o'qib berdi.
Qur'oni karimni o'qish jarayonini “Tahfizul-Qur'on” kafedrasi mudiri Jahongir qori Ne'matov va kafedra ustozlari Ahmadxon qori Rashidov, Valixon qori Azimboyev, Islomxon qori Ubaydullayev, Adham qori Yusupov, Sodiqjon qori Qurbonov va boshqa ustoz hamda talabalar kuzatib bordilar.
Hatm yakunida “Tahfizul-Qur'on” kafedrasi mudiri Jahongir qori Ne'matov Oliy Ma'hadda an'anaga aylanayotgan ushbu tadbirning ahamiyati to'g'risida ma'lumot berdi.
TII rektori Uyg'un domla G'afurov, ustoz Soatmurod domla Primov, kafedra mudirlari Jahongir qori Ne'matov, Farhod domla Jo'rayev, o'qituvchilar: Fazliddin domla Suvonov, Muhammadrasul domla Abdullayev, Sobirjon domla Rustamov, Jahongir qori Ro'ziyev, Abdulhakim domla Olimov va barcha ishtirokchilar birgalikda Qur'oni karim xatmi duosi barobarida qori ustozlar hamda Mashrabjon qori haqiga duolar qildilar, Allohdan yurtimizga xayr-baraka va ofiyat so'radilar.
30 pora Qur'oni karimni bir kunda, bir o'tirishda yoddan o'qib bergan Mashrabjon qoriga Uyg'un domla G'afurov hadya sifatida noutbuk topshirdi.
“Tahfizul-Qur'on” kafedrasi qori ustozlarining tinimsiz mehnatlari evaziga Toshkent islom institutida Qur'oni karimni bir kunda to'liq o'qib berish an'anaga aylanmoqda. Ayni paytgacha Qur'oni karimni bir kunda o'qib bergan qori talabalar soni 26 nafarga etdi.
Eslatib o'tamiz, 2014 yilda Toshkent Islom instituti tarixida ilk bor Ixtiyor qori Abdurahmanov Qur'oni karimni bir kunda, bir o'tirishda to'liq o'qib bergan edi. Shuningdek, Ilhom qori G'ofurov, Adham qori Otaxonov, Fathulloh qori Dadayev, Ahmadulloh qori G'ofurjanov, Hikmatulloh qori Ro'zaliyev, Sardorbek qori Jiyamuratov, Sirojiddin qori Shodmonov, Azimjon qori Madaminjonov, Ilyosbek qori Sharofiddinov, Nurilloh qori Saydullayev, Oyatulloh qori Abduqodirov, Abdulloh qori Komilov, Saidburxon qori Fazliddinov, Abdulhay qori Jo'raqulov, Ahliddin qori Qurbonov va Nurislomxo'ja qori Umbarov, Ubaydulloh qori Habibullayev va Bahodir qori Ibrohimov Qur'oni karimni yoddan to'liq o'qib, ustozlar ko'rigidan o'tkazib olgan edi.
Shuningdek, ayol-qizlardan Robiya Najmiddinova, Gulruh Kenjabek qizi, Mirahmadova Husnora, Mahamatxanova Muxlisa, Qurbanova Hadicha va Abdullayev Fotima ham Allohning kalomini yuqoridagi uslubda o'qib bergan edi.
Ma'lumot: Qur'oni karimda 114 ta sura, 6236 ta oyat va taxminan 1015030 nuqta, belgi, 323670 harf va 77934 ta so'z bor. Qur'on sahifalanishiga ko'ra 30 pora (juz, qism)dan iborat bo'lib, mushafning har 10 varog'i bir pora hisoblanadi.
TII “Tahfizul-Qur'on” kafedrasi
o'qituvchisi Zafar qori Mahmudov
Hijriy yangi yilingiz muborak bo‘lsin!
2025 yilning 26 iyun kuni – yangi 1447 hijriy yil – Muharram oyi boshlanishining 1 kunidir. Ashuro kuni 2025 yilning 5 iyul, shanba kuniga to‘g‘ri keladi.
Muharram oyi qanday oy?
Muharram oyi – musulmonlar taqvimining birinchi oyidir. Bu oy Alloh taolo urush, qon to‘kishni harom qilgan (Zulhijja, Zulqa’da, Muharram, Rajab) to‘rt oyning biri bo‘lib, uning o‘ninchi kuni ya’ni, ashuro kuni alohida fazilatlarga ega.
Ashuro qanday kun?
Bu kun haqida Rasululloh sollallohu alayhi vasallam: “Bu shunday yaxshi kundirki, bu kunda Alloh Bani Isroilni dushmanlaridan qutqargan. Shu bois Muso alayhissalom bu kunda ro‘za tutgan. Men Musoga ko‘proq (yaqin bo‘lishga) haqliroqman”, dedilar va u kunda ro‘za tutib, odamlarni ham uning ro‘zasini tutishga buyurdilar” (Imom Buxoriy rivoyati).
Ashuro kuni ro‘za tutish o‘tgan bir yillik gunohlarga kafforat bo‘ladi.
Bu haqda Rasululloh sollallohu alayhi vasallam: “Ashuro kunining ro‘zasi – Allohdan umid qilamanki – bir yil oldingi gunohlarga kafforat bo‘ladi”, deganlar (Imom Muslim rivoyati).
Bu kun yaqinlarga kengchilik qilish, bir yillik kengchilikka sabab bo‘ladi.
Abu Sa’d roziyallohu anhudan rivoyat qilinadi. Nabiy sollallohu alayhi vasallam: “Kim Ashuro kuni ahli ayoliga kenglik yaratsa, Alloh unga yil bo‘yi kenglik yaratadi”, dedilar (Imom Bayhaqiy rivoyati).
Sufyon ibn Uyayna rahmatullohi alayh: “Bu hadisni oltmish yil tajriba qildim va faqatgina yaxshilik ko‘rdim”, deganlar.
Ashuro kunini Rasululloh sollallohu alayhi vasallam qanday o‘tkazardilar?
Rasululloh sollallohu alayhi vasallam bu kunni o‘tkazib yubormaslik uchun qattiq harakat qilardilar, uning savobiga erishish uchun bu kunning kelishini intiqlik bilan kutardilar. Bu haqda Ibn Abbos roziyallohu anhu aytadilar: “Rasululloh sollallohu alayhi vasallamni Ashuro kuni ro‘zasini Ramazon oyi ro‘zasini kutib sog‘ingandek, boshqa kun va oy ro‘zasini kutganlarini ko‘rmadim” (Imom Buxoriy, Imom Muslim rivoyati).
Abdulloh ibn Abbos roziyallohu anhudan rivoyat qilinadi. Rasululloh sollallohu alayhi vasallam Ashuro kuni ro‘zasini tutib, odamlarni ham bu kunning ro‘zasini tutishga buyurganlarida, sahobalar: “Yo, Rasululloh! Bu kun yahudiy va nasroniylar ulug‘laydigan kun-ku!” deyishdi. Shunda Rasululloh sollallohu alayhi vasallam: “Alloh xohlasa kelasi yil to‘qqizinchi kuni ham tutamiz”, dedilar. Ammo, kelasi yil kelmasidan Rasululloh sollallohu alayhi vasallam vafot etdilar (Imom Muslim rivoyati).
Ulamolarimiz Rasululloh sollallohu alayhi vasallamning ushbu niyatlariga e’tiboran, Ashuro kuniga qo‘shib bir kun oldingi yoki bir kun keyingi kunda ham ro‘za tutmoq afzal deydilar.
Alloh taolo ushbu oyning fazilatlaridan barcha mo‘min-musulmonlarni to‘liq bahramand etsin. O‘zining roziligini topadigan amallarda bardavom qilsin.
O‘zbekiston musulmonlari idorasi
Matbuot xizmati
