“Rabbingizning mag'firatiga va Allohga hamda Uning Payg'ambarlariga imon keltirganlar uchun tayyorlangan, kengligi osmonu erning kengligicha bo'lgan jannatga musobaqalashing. Ana o'sha, Allohning fazli. Kimga xohlasa, beradi. Alloh ulug' fazl egasidir” (Hadid surasi,  21-oyat).

O'zbekiston musulmonlari idorasi, “Vaqf” xayriya jamoat fondi va Toshkent shahar hokimiyati bilan hamkorlikda 2022 yil 30 mart kuni Toshkent shahrida “Siz bizga keraksiz!” shiori ostida imkoniyati cheklanganlar uchun tadbir o'tkazildi. Unga Toshkent, Navoiy, Andijon, Samarqand viloyatlaridan 250 nafar imkoniyati cheklangan fuqarolar tashrif buyurishdi.

Tadbirni Toshkent shahar vakilligi xodimi Abduqahhor Yunusov Qur'oni karim tilovati bilan boshlab berdi. So'ng, ishtirokchilarni yaqinlashib kelayotgan Ramazon oyi munosabati bilan muborakbot etdi.

Shuningdek, tadbirda Toshkent shahar, Toshkent va Navoiy viloyatlaridan kelgan imkoniyati cheklangan fuqarolar o'rtasida “40 farz bayoni” bo'yicha musobaqa o'tkazildi.

Musobaqa uch shartdan iborat bo'lib:

1-shart. Bilet bo'yicha 3 ta savolga javob berish;

2-shart. Guruhlar o'rtasida o'zaro savol-javob;

3-shart. Erkin mavzu.

Ushbu musobaqa natijasiga ko'ra:

1-o'rin Toshkent shahri, 2-o'rin Navoiy viloyati, 3-o'rin Toshkent viloyati imkoniyati cheklanganlariga nasib etdi.

Musobaqa g'oliblariga “Vaqf” xayriya jamoat fondi tomonidan esdalik sovg'alar ulashildi. Tadbir so'ngida imkoniyati cheklanganlar tomonidan imo-ishorada ijro etilgan nashidlar, sahna ko'rinishlari barchaga ko'tarinki kayfiyat baxsh etdi.

Biz o'z jamoamiz nomidan barcha g'oliblarni tabriklaymiz.

Ushbu tadbirlarning muhim jihati shundaki, yuzlab ko'ngli yarim, qalbi o'ksik kishilarimizga shodlik ulashadi. Rasululloh sollallohu alayhi vasallam bir hadislarida: «Alloh taologa farzlardan keyingi eng sevimli amal musulmonning qalbiga xursandlik kirgizishdir», deganlar.

Eshitish va gapirish qobiliyati cheklangan bunday insonlarning siniq ko'ngillarini ko'tarib, dillariga xursandchilik ulashish huzurbaxsh amallardan ekaniga shubha yo'q.

Munira ABUBAKIROVA

Hotin-qizlar masalalari bo'yicha bo'lim mutaxassisi