أَوۡ كَٱلَّذِي مَرَّ عَلَىٰ قَرۡيَةٖ وَهِيَ خَاوِيَةٌ عَلَىٰ عُرُوشِهَا قَالَ أَنَّىٰ يُحۡيِۦ هَٰذِهِ ٱللَّهُ بَعۡدَ مَوۡتِهَاۖ فَأَمَاتَهُ ٱللَّهُ مِاْئَةَ عَامٖ ثُمَّ بَعَثَهُۥۖ قَالَ كَمۡ لَبِثۡتَۖ قَالَ لَبِثۡتُ يَوۡمًا أَوۡ بَعۡضَ يَوۡمٖۖ قَالَ بَل لَّبِثۡتَ مِاْئَةَ عَامٖ فَٱنظُرۡ إِلَىٰ طَعَامِكَ وَشَرَابِكَ لَمۡ يَتَسَنَّهۡۖ وَٱنظُرۡ إِلَىٰ حِمَارِكَ وَلِنَجۡعَلَكَ ءَايَةٗ لِّلنَّاسِۖ وَٱنظُرۡ إِلَى ٱلۡعِظَامِ كَيۡفَ نُنشِزُهَا ثُمَّ نَكۡسُوهَا لَحۡمٗاۚ فَلَمَّا تَبَيَّنَ لَهُۥ قَالَ أَعۡلَمُ أَنَّ ٱللَّهَ عَلَىٰ كُلِّ شَيۡءٖ قَدِيرٞ٢٥٩

259.Yoki tag-tugi bilan vayron bo'lgan qishloqdan o'tayotganni ko'rmadingizmi? U: "Alloh bu xarobani qanday jonlantirarkin?" dedi. Shunda Alloh uni yuz yilga o'ldirdi, so'ng tiriltirib: "Qancha yotding?" dedi. U: "Bir kun yo undan ham ozroq yotdim", dedi. "Yo'q, yuz yil yotding, taom va ichimligingga qara, buzilmagan, endi eshagingni ko'r. Bu seni odamlarga ibrat qilish uchun. Suyaklarni qanday tiklab, ularga go'sht qoplashimizni ko'r", dedi. Bular aniq bo'lgach: "Alloh hamma narsaga qodirligini bildim", dedi.

Bu voqea Uzayr alayhissalom bilan sodir bo'lgan edi. Alloh taolo O'z qudratini ko'rsatish uchun uning jonini oldi va eshagini ham o'ldirdi. Keyin yuz yil o'tkazib tiriltirdi. Uzayr alayhissalom anjir va sharobi buzilmay turganini, lekin minib kelgan eshagi o'lib, chirib ketganini ko'rdi. Alloh taolo Uzayr alayhissalom ko'z o'ngida eshagiga jon ato etdi, uni minib yangi tiklangan shaharga kirdi. Bu voqeani ko'rib, hamma hayratda qoldi. Uzayrning o'zida ham mushohada ilmi paydo bo'lib, Alloh taoloning hamma narsaga qodirligiga yana bir bor imon keltirdi.