muslim.uz
Ўзбекистон халқига Рамазон ҳайити табриги
Қадрли ва муҳтарам ватандошлар!
Сизларни, юртимиздаги барча мўмин-мусулмонларни, бутун халқимизни меҳр-оқибат, эзгулик ва саховат айёми – муборак Рамазон ҳайити билан чин қалбимдан самимий табриклайман.
Бу қутлуғ байрамда ҳаммамиз аввало шундай файзли ва барокатли кунларга етказгани учун Оллоҳ таолога чексиз шукроналар айтамиз.
Оила, маҳалла ва жамият аҳлига меҳр ва эътибор кўрсатиш, кўмакка муҳтож, эҳтиёжманд кишиларга беғараз ёрдам бериш, яхшилик, сабру қаноат каби эзгу фазилатларни ўзида мужассам этган бу байрамнинг маъно-мазмуни бугунги кунда Ўзбекистонда олиб борилаётган сиёсатга ғоят уйғун ва ҳамоҳанг эканини, ўйлайманки, шу саодатли дамларда ҳар биримиз чуқур ҳис этмоқдамиз.
Айни вақтда муқаддас ислом динининг ана шундай буюк инсонпарварлик тамойилларини асраш, тарғиб этиш ҳозирги шиддатли замонда ўта долзарб вазифага айланиб бораётганини барчамиз яхши тушунамиз. Мамлакатимизда кейинги пайтда бу борада кўп ишлар қилинаётгани сизларга яхши маълум, албатта. Жумладан, улуғ алломаларимиз Имом Бухорий ва Имом Термизий номларидаги халқаро илмий марказлар, Ислом цивилизацияси маркази, Ўзбекистон халқаро ислом академияси ташкил этилгани шу йўлдаги улкан қадамлар бўлди.
Бугунги кунда бутун инсоният ҳаётига таҳдид солаётган хавф-хатарларга қарши жаҳолатга қарши – маърифат асосида курашиш, динимиз поклигини сақлаш бўйича мамлакатимиз томонидан нуфузли халқаро минбарлардан қатор амалий ташаббуслар илгари сурилмоқда. Хусусан, Бирлашган Миллатлар Ташкилоти Бош Ассамблеяси сессиясида “Маърифат ва диний бағрикенглик” деган ном билан махсус резолюция қабул қилиш ҳақида билдирган таклифимиз жаҳон миқёсида кенг қўллаб-қувватланмоқда.
Шу улуғ айём кунларида узоқ ва яқин мусулмон мамлакатларнинг халқларини, барча дўстларимизни самимий қутлаб, уларга тинчлик, тараққиёт ва фаровонлик тилашдан беҳад мамнунмиз.
Муҳтарам юртдошлар!
Ўзбекистонимиз янги тараққиёт босқичига қадам қўйиб, барча соҳаларда ўзгариш ва янгиланишлар кучайиб бораётгани, Рамазон ҳайити муносабати билан юртимизда уч кунлик дам олиш эълон қилингани бу йилги байрамга алоҳида файз ва тароват бағишламоқда.
Табаррук айём арафасида озодликдан маҳрум этиш жазосини ўтаётган бир гуруҳ шахсларни авф этиш тўғрисида фармон қабул қилингани халқимизга хос кечиримлилик, бағрикенглик ва меҳр-шафқат фазилатларининг яна бир яққол намоёни бўлди.
Ҳеч шубҳасиз, бу ҳуқуқий ҳужжат жамиятимизда инсон ҳуқуқ ва манфаатларини таъминлаш, соғлом ижтимоий муҳитни мустаҳкамлаш, билиб-билмай нотўғри йўлга кирган инсонларни кечириш, уларни оиласи бағрига, тўлақонли ҳаётга қайтаришга қаратилган кенг кўламли ишларимизнинг узвий давомидир.
Албатта, биз ўз диний қадриятларимизни улуғлаб, эъзозлаб яшар эканмиз, ҳозирги юксак технологиялар асрида мустаҳкам иймон-эътиқод билан бирга замонавий илм-фан, касб-ҳунарлар, хорижий тилларни пухта эгаллаш, инновациялар соҳасидаги ютуқларни чуқур ўзлаштириш, ёшларимизни миллий ва умуминсоний қадриятлар руҳида тарбиялаш барқарор тараққиётга эришишнинг энг муҳим шарти эканини яхши тушунамиз.
Муборак ҳадисларда айтилганидек, икки дунё саодатини ўйлаб яшаган инсон, халқ ҳеч қачон кам бўлмайди.
Барчангизни муқаддас Рамазон ҳайити билан яна бир бор табриклайман.
Эл-юртимизнинг шу муборак ойда қилган ибодатлари, эзгу ниятлари ижобат бўлсин!
Жонажон Ватанимиз, хонадонларимизда тинчлик, аҳиллик, файзу барака бардавом бўлсин!
Эзгу ишларимиз, интилишларимизда Яратганнинг Ўзи мададкор бўлсин!
Шавкат Мирзиёев,
Ўзбекистон Республикаси Президенти
Адлия вазирлиги барчани Рамазон ҳайити билан муборакбод этади
"Кўзи ожизлар” жамияти аъзолари билан дилдан суҳбат қилинди
2018 йилнинг 13 июнь куни Тошкент шаҳар “Кўзи ожизлар” жамиятининг маданият уйида маънавий-маърифий тадбир ўтказилди. Ушбу тадбирда Ўзбекистон мусулмонлари идораси вакиллари ҳамда Тошкент шаҳар ҳокими ўринбосари Турдикулов Шухрат Худойкулович иштирок этди.
Ушбу тадбирда “Кўзи ожизлар” жамияти аъзолари билан дилдан суҳбат қилинди ҳамда уларни муаммоларини аниқлаб ёрдам бериш масаласи кўтарилди.
Мазкур тадбирда жамият раиси Талъат Азимов сўзга чиқиб, яқин ўртада бундай самимий суҳбат ташкил этилмаганлиги, жамият аъзолари ўтказилган дилкаш суҳбатдан мамнун эканлигини маълум қилди. Жамият раиси кўзи ожиз, қўли гул чеварларни муносиб иш билан таъминлашда ёрдам беришни сўради.
Тошкент шаҳар ҳокими ўринбосари Турдикулов Шухрат Худойкулович уларни муаммоларини бирма бир эшитиб, уларга ваколати доирасида амалий кўмак беришни маълум қилди.
Шунингдек, ушбу тоифа аёлларидан бири Чилонзор туманида яшовчи Имамова Лобар Нажимовна ниҳоятда шароити оғирлигини билдириб, коммунал тўловидан қарзини тўлашга ёрдам сўраб мурожаат қилди. Ушбу фуқарони муаммосини ҳал этиш бўйича тегишли ташкилотларга кўрсатма бериб, масала жойида хал этилди.
ЎМИ Матбуот хизмати
Рамазон ҳайити муносабати билан муфтий Усмонхон Алимов ҳазратларига табриклар келмоқда
Рамазон ҳайити муносабати билан Ўзбекистон мусулмонлари идораси раиси, муфтий Усмонхон Алимов ҳазратларига хорижий мамлакатлар мусулмонлари идоралари раҳбарлари, чет эл давлатларининг Ўзбекистондаги элчилари, халқаро ташкилотлардан табрик мактублари келмоқда.
Шайх Равиль Гайнуддин, Россия муфтийлар кенгаши раиси, муфтий;
Шайх-ул-ислом Оллоҳшукур Пошшозода, Кавказ мусулмонлари идораси раиси;
Серикбай ҳожи Ораз, Қозоғистон мусулмонлари диний идораси раиси, муфтий;
Аҳмет Башар Шен, Туркиянинг Ўзбекистондаги элчиси;
Муҳаммад Таршаҳани, Фаластиннинг Ўзбекистондаги элчиси;
Шири Шириев, Турманистоннинг Ўзбекистондаги элчиси;
Носир Бушрит, Жазоирнинг Ўзбекистондаги элчиси;
Аҳмад Холид Ал-Жийрон, Кувайтнинг Ўзбекистондаги элчиси;
Саид Шахабуддин Тимури, Афғонистон Ислом Республикасининг Ўзбекистондаги элчиси;
Баҳман Оғарозий, Эрон Ислом Республикасининг Ўзбекистондаги элчиси;
Викентий, Ўрта Осиё митрополити раҳбари, Ўзбекистон ва Тошкент митрополити;
Қутловлар келиши давом этмоқда.
Ўзбекистон мусулмонлари идораси Матбуот хизмати
Минг ҳаромдан ўттиз ҳалол афзал... (Аудиоҳикоя)
ЎМИ Матбуот хизмати