Ўзбекистоннинг АҚШдаги элчиси Жавлон Ваҳобов БМТнинг Дин ва эътиқод эркинлиги масаласи бўйича махсус маърузачиси Аҳмад Шаҳид билан музокаралар ўтказди, деб хабар бермоқда «Дунё» АА.

Махсус маърузачи янги таҳрирдаги «Виждон эркинлиги ва диний ташкилотлар тўғрисида»ги қонуннинг қабул қилинишини қутлар экан, мазкур ҳужжат диний эркинликни таъминлаш бўйича қонунчилик тизимига кўплаб ижобий ўзгаришлар олиб келганини таъкидлади.

Суҳбат чоғида ушбу қонуннинг қабул қилиниши барча динлар ва эътиқодлар учун инклюзив маконни қўллаб-қувватлаш имконини берувчи самарали ҳуқуқ-тартиботни таъминлашга қаратилган ўзаро ҳамкорликнинг янги босқичини бошлаб бергани қайд этилди.

Аҳмад Шаҳид Ўзбекистон ҳукуматининг унинг офиси ва бошқа халқаро тузилмалар ҳамда экспертлар ҳамжамияти билан ҳамкорлигининг изчиллигига юқори баҳо бериб, мамлакатимиз билан ўрнатилган конструктив мулоқотни давом эттиришга тайёрлигини тасдиқлади.

Шу нуқтаи назардан, Аҳмад Шаҳид жорий йил сентябрь ойида Ўзбекистонга сафар қилиб, Нью-Йорк шаҳри университети (CUNY-RBI) ҳузуридаги Ральф Банч номидаги халқаро тадқиқотлар институти ва Эссекс университети ҳуқуқшунослик мактаби (Essex-HRC) ёрдамида техник кўмак дастурини ишга туширишга тайёрлигини маълум қилди.

Сафар дастурида тегишли давлат идоралари, фуқаролик жамияти ва диний ташкилотлар вакиллари учун қатор семинар ва тренинглар ўтказиш кўзда тутилган. Шунингдек, БМТ доирасида қўлланилаётган инсон ҳуқуқлари кўрсаткичларига асосланган миллий мониторинг ва баҳолаш тизимини ишлаб чиқишда маслаҳат ёрдами кўрсатилади.

БМТ махсус маърузачиси «Декларациялар мулоқоти» халқаро форумини ўтказиш режасини олқишлаб, мазкур анжуман якунлари бўйича «Бухоро декларацияси» қабул қилиниши алоҳида аҳамият касб этишини таъкидлади. У Ўзбекистон тарихан диний ва конфессионал хилма-хилликнинг бой меросига эга маърифатли ислом маркази бўлиб келган, деб фикр билдирди.

Аҳмад Шаҳид «Бухоро декларация»си лойиҳасини ишлаб чиқишда зарур маслаҳат ёрдами кўрсатишини, шунингдек, декабрь ойида ушбу халқаро конференция ишида иштирок этиш учун Ўзбекистонга яна бир бор сафар қилишини тасдиқлади.

Ўзбекистон мусулмонлари идораси матбуот хизмати

Европанинг “EU Reporter” интернет-нашри саҳифасида Самарқанднинг сайёҳлик салоҳиятига бағишланган мақола эълон қилинди, деб хабар бермоқда “Дунё” АА. Унда “Самарқанднинг Ипак йўли” деб номланган ноёб сайёҳлик мажмуи барпо этилаётгани билан боғлиқ атрофлича маълумотлар европалик ўқувчиларнинг эътиборига ҳавола қилинган.

Нашрнинг ёзишича, мазкур кўп тармоқли мажмуа 2022 йили очилади. У нафақат кўҳна Самарқанд шаҳрининг, балки бутун Марказий Осиёнинг замонавий диққатга сазовор маскани бўлиб қолади ва маданий, гастрономик, тиббий ҳамда ишбилармонлик сайёҳлигининг ноёб объектига айланади.

Мақолада қайд этилишича, ушбу мажмуанинг номи онгли равишда танланган. Тарихдан маълумки, эрамиздан олдинги II асрдан то эрамизнинг XV асригача Буюк Ипак йўлининг йўналишлари ҳозирги Ўзбекистон ҳудуди орқали ўтган, қадимги Самарқанд эса савдо карвонлари тўхтаб ўтадиган энг муҳим бўғинларидан бири бўлган.

“EU Reporter” интернет-нашри маълум қилганидек, мажмуа шаҳарнинг шарқий қисмида жойлашган бўлиб, кенглиги 260 гектар майдондан иборат. Унинг марказида Самарқанд эшкак эшиш каналининг сув йўли бор. Янги мажмуадан жаҳон андозаларидаги замонавий меҳмонхоналар, ихтисослашган бутик-отеллар, замонавий сайилгоҳлар, хиёбонлар, дам олиш ва спорт худудлари, ресторан, кафе ва барлар, конгресс-холл ҳамда турли маданий объектлар жой олади. Халқаро меъморлар ва муҳандислар жамоаси томонидан ишлаб чиқилган замонавий лойиҳа Марказий Осиё минтақасида ўхшаши бўлмаган ва турли мавзуларни ўзида акс эттирувчи мувозанатлаштирилган меъморий ансамблдан завқланиш имконини беради.

Муаллифларнинг таъкидлашича, “Самарқанднинг Ипак йўли” мажмуаси шаҳар аҳолиси, бутун дунё сайёҳлари ва бизнесменлари катта қониқиш билан хордиқ чиқарадиган халқаро сайёҳлик марказига айланади, мажмуанинг очилиши эса Самарқанд сайёҳлик тарихидаги янги даврнинг ибтидоси бўлиб қолади.

Ўзбекистон мусулмонлари идораси матбуот хизмати

Бугун, 5 август куни уламоларимиз Қашқадарё вилоятидаги ташрифлари давомида кундалик намозлар (пешин ва аср)ни қуйидаги жоме масжидларда ўқиб, маърифий суҳбат қилиб берадилар:

Чироқчи туманидаги “Кўктош ота” ва Ғузор туманидаги “Ярғунчи” жоме масжидига Ўзбекистон мусулмонлари идораси раисининг биринчи ўринбосари Ҳомиджон домла Ишматбеков;

Чироқчи туманидаги “Ҳазрати Усмон” ва Ғузор туманидаги “Мусофир ота” жоме масжидига Ўзбекистон мусулмонлари идораси раисининг ўринбосари Иброҳим домла Иномов;

Чироқчи туманидаги “Файзулла ҳожи” жоме масжидига Ўзбекистон мусулмонлари идораси раисининг маслаҳатчиси Салоҳиддин домла Шарипов;

Шаҳрисабз шаҳридаги “Сирожиддинхон Бурхониддинхон ўғли” жоме масжидига Шайх Алижон қори Файзуллоҳ Махдум ўғли;

Косон туманидаги “Чоргумбаз” ва Касби туманидаги “Касби” жоме масжидига Ўзбекистондаги Ислом цивилизация маркази Жамоатчилик бўлими бош илмий ходими Аброр Мухтор Алий домла;

Чироқчи туманидаги “Турсун Болтахон” ва Ғузор туманидаги “Ҳазрати Мирижанда” жоме масжидига Ўзбекистон мусулмонлари идораси бўлим бошлиғи Эрдон домла Эсонов;

Қарши туманидаги “Тош” ва Чироқчи туманидаги “Ҳазрати Умар” жоме масжидига Тошкент шаҳар Юнусобод тумани бош имом-хатиби Раҳматуллоҳ домла Сайфуддинов;

Чироқчи туманидаги “Уймовут ота” ва Ғузор туманидаги “Батош” жоме масжидига Тошкент шаҳар “Убай ибн Каъб” масжиди имом-хатиби Абдулҳаким домла Матқулов;

Чироқчи туманидаги “Қўзибоқар ота” ва Қамаши туманидаги “Алишер Навоий” жоме масжидига Тошкент шаҳар “Ракат” масжиди имом-хатиби Раббимқул домла Муҳаммадиев;

Чироқчи туманидаги “Имом Ҳасан Ҳусан” ва Қамаши туманидаги “Манғит” жоме масжидига Тошкент шаҳар “Олтинтепа” масжиди имом-хатиби Исломиддин домла Зухриддинов;

Чироқчи туманидаги “Оқтош” жоме масжидига Тошкент шаҳар “Бурхониддин Марғилоний” масжиди имом-хатиби Абдулҳамид домла Турсунов;

Чироқчи туманидаги “Мулла Холёр” ва Қамаши туманидаги “Чим” жоме масжидига Тошкент шаҳар “Умар ибн Хаттоб” масжиди имом-хатиби Мансур домла Даминов;

Деҳқонобод туманидаги “Белибойли ота” ва Қамаши туманидаги “Санчиқул” жоме масжидига Тошкент шаҳар “Доруссалом” масжиди имом-хатиби Муҳаммадраҳим домла Абдулқодиров;

Деҳқонобод туманидаги “Оқработ ота” жоме масжидига Тошкент шаҳар “Аҳмад Яссавий” масжиди имом-хатиби Муродулла домла Хунназаров;

Деҳқонобод туманидаги “Тангаором” жоме масжидига Тошкент шаҳар “Ислом ота” масжиди имом-хатиби Йўлдошали домла Каримов;

Деҳқонобод туманидаги "Менгали ҳожи" жоме масжидига Тошкент шаҳар “Омина” масжиди имом-хатиби Юсуфхон домла Муҳиддинов.

Шунингдек, уламоларимиз масжидлар атрофида жойлашган маҳалла фуқаролар йиғинлари аҳолиси билан учрашув ўтказиш, эҳтиёжманд оилаларда бўлиб, “Вақф” фондининг моддий ёрдами, “Шамсуддинхон Бобохонов” нашриёт матбаа уйида чоп этилган китобларни етказиш ва вилоятдаги ижтимоий объектларга ташриф буюришлари режа қилинган.

Ўзбекистон мусулмонлари идораси матбуот хизмати

@nasafziyo | @muslimuzportal | @mp3muslim | @diniysavollar

Бугун, 4 август куни Шайх Алижон қори Файзуллоҳ Махдум ўғли Қашқадарё вилоятига ташриф буюрди. У кишини Қарши темир йўл вокзалида Қашқадарё вилояти бош имом-хатиби ўринбосари Қораев Муҳаммади домла иштирокида кутиб олди.

Ташриф давомида Шайх Алижон қори Ўзбекистон мусулмонлари идорасининг Қашқадарё вилоятидаги вакиллиги ҳузуридаги “Ақида илми мактаби” қошидаги “Қуръони карим ва тажвид” курсида таҳсил олаётган тингловчилар билан дилдан суҳбат қилдилар.

Шунингдек, Шайх Алижон қори Файзуллоҳ Махдум ўғлининг Қарши шаҳридаги “Кўк гумбаз” жоме масжидида жамоат билан пешин намозини адо этиб, йиғилганларга қироат илми ва шукронавлик мавзусида гўзал маърифий суҳбатларидан қилиб бердилар.

Маърифий суҳбат асносида Шайх Алижон қори бундай дедилар: “масжид аҳлининг Расулуллоҳ соллаллоҳу алайҳи васалламнинг суннатларига ҳарисликларидан мамнун эканликларини билдириб, уларга ташаккурлар айтдилар. Зеро, Расулуллоҳ соллаллоҳу алайҳ васаллам: "Одамларга ташаккур айтмаган киши Аллоҳга шукр қилмайди", деганлар”.

Учрашув сўнгида Аллоҳ таоло юртимиздаги барча мўмин-мусулмонларни Ўз паноҳида асрашини, уларни ҳамиша яхшиликларда бардавом этишини сўраб дуои хайрлар қилинди.

Қашқадарё вилоят вакиллиги
матбуот хизмати

Бугун, 4 август куни Тошкент шаҳар Юнусобод тумани бош имом-хатиби Раҳматуллоҳ домла Сайфуддинов Қашқадарё вилояти Шаҳрисабз шаҳридаги “Сирожиддинхон Бурхониддинхон ўғли” масжидида пешин намозига ташриф буюриб, намоздан сўнг йиғилганларга мавъиза қилиб бердилар.

Маърифий учрашувда мустақил юртимизда олиб борилаётган улкан ўзгаришларнинг янада равнақ топиши, эл-юрт тинчлиги ва мамлакат ободлиги, ҳаётимиз янада фаровон бўлишини тилаб дуои хайрлар қилдилар.

Шунингдек, мўмин-мусулмонлар ўзларини қизиқтирган саволларига жавоблар олдилар.

Mehrob.uz матбуот хизмати