muslim.uz
Абдулбасир қори Москвадаги масжидда Қуръон хатмига ўтмоқда
Бир неча йилдан буён хориж давлатлари диний идораларидан келган таклифлар асосида уламо ва қориларимиз чет мамлакатларда диний-маърифий тадбирларда иштирок этиб, таровиҳ намозларини адо этиб бермоқдалар.
Ана шундай қориларимиздан бири Тошкент шаҳридаги “Минор” масжиди имом ноиби Абдулбасир қори Камолов Россия Федерациясининг Москва шаҳридаги Москва мусулмонлари диний идораси ва Марказий регион "Москва муфтияти"да таровеҳ намозларида Қуръон хатмига ўтиб бермоқда. Унда Москва муфтийси Альбир ҳазрат Крганов ҳам қатнашмоқда.
Ушбу хатми Қуръонларда Москвадаги мўмин-мусулмонлар, хусусан, ушбу шаҳарга ўқиш ва ишга борган ватандошлар иштирок этишмоқда. Шунингдек, ифтор дастурхони атрофида ҳам йиғилганларга маърифий суҳбатлар қилиб берилмоқда.
Аллоҳ таоло қоримизнинг юзларини ёруғ, сафарларини бехатар қилсин!
Ўзбекистон мусулмонлари идораси Матбуот хизмати
АҚШ вакили: Сўнгги йилларда Ўзбекистонда диний соҳада изчил ўзгаришлар юз берди
Жорж Вашингтон университети ҳузуридаги Марказий Осиё тадқиқотлари дастури майдончасида Ўзбекистонда диний эркинликларни таъминлаш борасида кўрилаётган чора-тадбирларга бағишланган онлайн-брифинг ташкил этилди, деб хабар бермоқда «Дунё» АА.
Брифингда Ўзбекистон элчиси Жавлон Ваҳобов, АҚШнинг Халқаро диний эркинлик бўйича комиссияси раиси Надин Маенза, БМТнинг Дин ва эътиқод эркинлиги масаласи бўйича махсус маърузачиси Аҳмад Шаҳид, Бригам Янг университетининг Ҳуқуқ ва динни ўрганиш халқаро маркази директорининг ўринбосари Элизабет Кларк, Жанубий Калифорния университети доценти Стив Свердлов маъруза қилди.
Ўзбекистон элчиси иштирокчиларни мамлакатимизда дин эркинлигини таъминлаш, миллатлараро тотувлик ва диний бағрикенгликни мустаҳкамлаш борасида амалга оширилаётган тизимли ислоҳотлар ва саъй-ҳаракатлар билан таништирди. Хусусан, сўнгги йилларда диний эркинликларни таъминлаш, шу жумладан диний ташкилотларни рўйхатга олиш, уларнинг фаолият юритиш тартибини енгиллаштириш, болаларнинг ибодат масканларига тўсиқсиз киришини таъминлаш, ибодат жойларида рейдлар ўтказишни тўхтатиш ва бошқа соҳаларда эришилган ютуқлар алоҳида таъкидланди.
Бундан ташқари, инсонийлик тамойилларига асосланиб, тақиқланган ташкилотларда қатнашганлиги учун судланган, аммо тузалиш йўлига кирганларни афв этиш ва уларни нормал ҳаётга реинтеграция қилиш одатий амалиётга айланди.
Шунингдек, сўнгги йилларда Яқин Шарқдаги экстремистлар назоратидаги ҳудудларга алданиб бориб қолган 531 нафар Ўзбекистон фуқаросини, асосан, аёллар ва болаларни Ватанга қайтариш учун беш марта "Меҳр" махсус операцияси амалга оширилди.
АҚШнинг Халқаро диний эркинлик бўйича комиссияси раиси Надин Маенза, ўз навбатида, сўнгги тўрт йил ичида Ўзбекистонда диний эркинлик соҳасида изчил ўзгаришлар амалга оширилганини таъкидлади. «Ўзбекистон раҳбарияти ушбу масалага жиддий эътибор қаратаётгани, ҳамкорлар ва халқаро ташкилотлар билан мулоқотга асосланган тизимли ислоҳотларни ҳаётга тадбиқ этаётганидан мамнунмиз. Ўзбекистон Жиноят кодексининг 216- («Жамоат бирлашмалари ёки диний ташкилотларни қонунга хилоф равишда тузиш») ва 244-моддаларини («Оммавий тартибсизликлар») декриминаллаштириш ёки улар бўйича жазоларни юмшатишга қаратилган қонунчилик ислоҳотлари давом этаётгани ҳақидаги хабарлар бизни рағбатлантирмоқда», - деди у.
“Биз ҳокимият алоҳида маҳбуслар ишига қандай муносабат билдираётганини кўраяпмиз ва бу саъй-ҳаракатлар ҳукуматнинг диний эркинлик соҳасидаги ислоҳотларининг давоми ҳамда навбатдаги муҳим қадами бўлиши мумкин”, - деб қайд этди Надин Маенза.
“2017 йил Ўзбекистонга таклиф этилган Бирлашган Миллатлар Ташкилотининг биринчи кузатувчиси бўлганимдан мамнунман, - деди БМТнинг Дин ва эътиқод эркинлиги масаласи бўйича махсус маърузачиси Аҳмад Шаҳид. - Махсус маърузачининг ташрифи якунлари бўйича Ўзбекистон ҳукумати нафақат яқин ҳамкорликка тайёрлик билдирди, балки БМТ экспертининг тавсиялари асосида бу йўналишдаги ислоҳотларнинг “Йўл харитаси”ни ҳам қабул қилди. Бундай амалиёт БМТ тизимида мисли кўрилмаган воқеа бўлди”.
«Биз Ўзбекистон бу соҳада эришган ютуқларни юксак эътироф этишимиз керак. Мен кўплаб маҳбуслар озод қилингани учун миннатдорман. Мамлакат қонунчилик фаолияти масаласида ҳам сезиларли ютуқларга эришди. Хусусан, Ўзбекистон Сенати мамлакат Жиноят кодексини ислоҳ қилиш бўйича ишларни давом эттиришга тайёр», - деб таъкидлади БМТ махсус маърузачиси.
«Дунёнинг кўплаб мамлакатларида диндорлар ҳуқуқларини ҳимоя қилиш масаласида тўплаган тажрибамдан келиб чиқиб, Ўзбекистон очиқлик ва хорижий экспертлар билан ҳамкорлик қилиш, қонунчилик базасини биргаликда такомиллаштиришга тайёрлиги жиҳатидан илғорлик қилмоқда, дейишим учун барча асослар бор, - деди Бригам Янг университетининг Ҳуқуқ ва динни ўрганиш халқаро маркази директорининг ўринбосари Элизабет Кларк. - Ўзбекистон диний эркинликларни яхшилаш бўйича саъй-ҳаракатларда ҳам минтақавий етакчи ҳисобланади. Энг муҳим ўзгаришларга мисол тариқасида рўйхатга олиш жараёни соддалаштирилганини келтириш мумкин. Бу, айниқса, янги диний ташкилотлар учун ўта муҳимдир».
Эслатиб ўтамиз, Марказий Осиё тадқиқотлари дастури Европа, Россия ва Евроосиё тадқиқотлари институти томонидан илгари сурилган ташаббусдир. Унинг илмий-тадқиқот фаолияти хавфсизлик, ривожланиш, давлат қурилиши ва минтақавий ҳамкорлик каби тўртта асосий йўналишга қаратилган. Дастур ҳар йил форумлар, семинарлар ва халқаро конференциялар ташкил этади.
Ушбу тузилманинг мақсади Марказий Осиёда академик тадқиқотларни ривожлантириш, академик доиралар ва сиёсий ҳамжамият ўртасида шериклик алоқаларини ўрнатиш, сиёсатни шакллантирадиган, академик, дипломатик ва ишбилармон доиралар вакиллари ўртасида мунозара майдончасини яратишга қаратилган.
Ўзбекистон мусулмонлари идораси Матбуот хизмати
Бир дуо таржималари
Абдуллоҳ ибн Умар розийаллоҳу анҳумодан ривоят қилинади. Пайғамбаримиз алайҳиссалом ифторликда – ذَهَبَ الظَّمَأُ وابْتَلَّتِ العُرُوقُ وَ ثَبَتَ الْأَجْرُ إِنْ شَاءَ اللهُ
“Заҳабаз замау вабталлатил уруқу ва сабатал ажру, иншааллоҳ”, деб дуо қилганлар (Имом Абу Довуд ва Имом Насоий ривояти).
Ушбу дуонинг таржималари бир хил эмас. Масалан:
1. “Cувсизлик тугади, томирлар намланди, ажр ва мукофотлар, иншоаллоҳ, берилади”.
2. “Чанқоқ кетди, томирлар ҳўлланди, иншоаллоҳ, ажр собит бўлди”.
3. “Чанқоқ кетди, томирлар намланди, иншоаллоҳ, савоб ҳосил бўлди”, деб таржима қилинган.
Таржималарда сувсаган рўзадорнинг ташналикдан, яъни чанқоқликдан халос бўлгани баён этилмоқда. Уни “чанқов босилди” тарзида ифодалаш маъқулроқ кўринади.
Эътибор берайлик: чанқовбосди қовунлар,.. чанқовбосди ичимликлар ва шарбатлар... (“Ўзбек тилининг изоҳли луғати”. Ж. IV, 457-б.).
Таржима гапларнинг иккинчи қисмидаги “намланди”, “ҳўлланди” сўзлари маънодош бўлиб, асос-негизлари “нам қилмоқ”, “нам бермоқ”; “ҳўл қилмоқ”, “сув тегизмоқ” маъноларини англатади. Рўзани очганда ичилган сувдан томирлар намиқади, яъни нам тортади (“Ўзбек тилининг изоҳли луғати”, 15-б.) Демак, “томирлар намиқди” дейиш яхшироқ.
Гапларнинг учинчи қисми (“Ажр-мукофотлар ҳам, иншоаллоҳ, берилади. Иншоаллоҳ, ажр собит бўлди. Иншоаллоҳ, савоб ҳосил бўлди)да “Худо хоҳласа”, “насиб бўлса (ёки қилса, этса)” маъносидаги “иншоаллоҳ” сўзи мавжуд. Шу боис феъл-кесимнинг “берилади” шакли тўғри келади. “Собит бўлди”, “ҳосил бўлди” феъл-кесимларининг замони ўйлаб кўрилиши керак.
“Сабатал ажру, иншааллоҳ”ни “Ажр-мукофот ҳам тайин, иншоаллоҳ” деса бўлади. “Тайин” сўзининг бир маъноси “аниқ”. Чунки Пайғамбаримиз соллаллоҳу алайҳи ва саллам айтадилар: «Аллоҳ таоло: “Рўза Мен учун ва унинг мукофотини Ўзим бераман”, деб марҳамат қилган».
Мазкур дуонинг таржимаси қуйидагича бўлса, мақсадга мувофиқ: “Чанқов босилди, томирлар намиқди ва ажр-мукофот ҳам тайин, иншоаллоҳ”.
Насруллоҳ ШУКРУЛЛОҲ ўғли,
педагогика фанлари номзоди, доцент
“Ҳидоят” журнали 3-сон
Эрондаги масжид деворидан Мирзо Улуғбек ва Алишер Навоий битиклари топилди
Эронда Мирзо Улуғбек ва Алишер Навоий битиклари аниқланди, деб хабар бермоқда «Дунё» АА мухбири
Туризм ва маданий мерос вазирлиги маълумотига кўра, Маданий мерос агентлиги директорининг биринчи ўринбосари Турсунали Қўзиев бошчилигидаги делегациянинг Эронга амалга оширган хизмат сафари давомида шу ҳақда маълум қилинган.
«Эроннинг шимоли-ғарбида Темурийлар даврининг кўплаб маданий мерос обидалари мавжуд. Амир Темур Эроннинг Тойинобод шаҳрида шайх Абу Бакр Зайн-ул Обиддин Тоййибиний билан учрашган ва у билан самимий муносабатлар ўрнатган, узоқ йиллар давомида ўзаро ёзишиб турган. Ушбу дўстлик ҳурмати тимсоли сифатида Амир Темурнинг ўғли Шоҳрух Мирзо Тойинобод шаҳрида масжид қурдиради. Масжид бугунги кунга қадар сақланиб қолган.
Масжиднинг деворида юқори мартабали меҳмонлар учун ҳурмат девори бўлиб, уларда меҳмонлар ўз тилаклари ёки битикларини ёзиб қолдирган. Уларни кўздан кечираётиб, ажойиб янгилик – Мирзо Улуғбек ва Алишер Навоий битикларини кашф этдик», - деди Турсунали Қўзиев.
Маълум қилинишича, айни пайтда улуғ бобокалон алломаларимиз битикларини илмий жиҳатдан ўрганишга доир ишлар олиб борилмоқда.
Ўзбекистон мусулмонлари идораси матбуот хизмати
Янгиликлар
