15 Декабр, 2025, ,
15 Декабр, 2025, ,
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган. Бундан ташқари саҳобаи киромлар, улуғ олимлар, Яқин Шарқ, Осиё, Европа ва Америка мутафаккирларининг бир қатор фикрлари ҳам берилган.
*****
Худбинлик, одобсизлик ёйилган замонда одоб билан муомала қилиш эътиборни тортадиган нарсага айланиб қолди.
“Тарих муҳрлаган сўзлар”
*****
Сизларга шундай замон келадики, у пайтда кексаларингиз гуноҳ қилувчи, олимларингиз мунофиқ, кичикларингиз катталарни ҳурмат қилмайдиган, бойларингиз фақирларга ёрдам бермайдиган бўлади.
Али ибн Абу Толиб розияллоҳу анҳу
*****
Адолат давомли бўлса, ҳамма жойнинг обод бўлишига сабаб бўлади.
Зулм давом этса, ҳамма жойнинг хароб бўлишига сабаб бўлади.
Ибн Халдун раҳимаҳуллоҳ
*****
Одамларга гапларинг билан эмас, амалинг билан насиҳат қил.
Ҳасан Басрий раҳимаҳуллоҳ
*****
Одамлар сизни кечиришаверади-кечиришаверади. Шу шарт биланки, сиз пулдор, мол-давлатли кимса бўлишингиз керак.
“Тарих муҳрлаган сўзлар”
*****
Инсонлар билан бўладиган алоқалардаги энг катта муаммолардан бири – биз суҳбатдошимизни тушуниш мақсадида эмас, унга жавоб қайтариш мақсадида жим туриб эшитамиз.
“Тарих муҳрлаган сўзлар”
*****
Агар менинг фикрлашим ва услубим сизга ёқмаса, шуни билингки, мен сизнинг қизиқишингизни уйғотаман деган мақсадда уйқудан турганимни ҳеч эслолмайман.
Уилл Смит
*****
Суҳбат ақлнинг қандайлигини кўрсатса, ғазаб ахлоқнинг қандайлигини кўрсатади.
“Одоб ва ҳикмат дурдоналари”
*****
Эҳтиром муҳаббатдан минглаб миллар олдинга ўтиб кетган.
“Одоб ва ҳикмат дурдоналари”
*****
Ақл каби бойлик, жоҳиллик каби фақирлик, одоб каби мерос йўқ.
“Одоб ва ҳикмат дурдоналари”
*****
Одамлар бошқалар устидан ҳукм чиқаришга шошиладилар, лекин ўзларини тузатишга шошилмайдилар.
“Одоб ва ҳикмат дурдоналари”
*****
Эркак хато қилганда, аёл хафа бўлади, эркак узр сўрайди.
Аёл ҳато қилганда, эркак ғазабланади, аёл йиғлайди, эркак яна узр сўрайди.
Марк Твен
*****
Саодат – ҳис-туйғудир. Лекин баъзи вақтларда у шахс бўлади.
“Одоб ва ҳикмат дурдоналари”
Интернет материалларидан тўплаб, таржима қилувчи
Нозимжон Иминжонов
Ўтган жума куни жума намозидан кейин юртимиздаги барча масжидларда жамоат билан истисқо намози ўқилиб, Аллоҳ таолодан ёмғир сўраб, дуои хайрлар қилинган, Маккаи мукаррамада умра зиёратида бўлиб турган юртдошларимиз ҳам бу хайрли ташаббусга қўшилишган эди. Шунингдек, мадрасаларимизда Қуръони карим 521 марта, “Саҳиҳул Бухорий” 14 та хатми кутуб қилиниб, 750 мингдан зиёд истиғфор, 240 мингдан зиёд салавотлар айтилган, 500 га яқин жонлиқлар сўйилиб, 5000 га яқин ёрдамга муҳтож оилалар, етим-есирлар, бева-бечоралар, мискинлар, боқувчисини йўқотган кексаларга тарқатилганди.
Алҳамдулиллаҳ, орадан бир неча кун ўтиб, Аллоҳ таоло қилинган дуо ва илтижоларимизни ижобат қилиб, юртимизда ёмғир ёға бошлади. Бу – Аллоҳнинг раҳматидир, иншаАллоҳ. Зеро, “Ёмғирни У ёғдирур” (Луқмон сураси, 34-оят).
Албатта, дуонинг қабул бўлишида ихлос, умид билан ёлвориш ҳамда ижобатига шошилмаслик лозим. Зеро, дуо қилишга илҳом берган Зот, албатта Ўзи ижобат этади. Одамлар Расулуллоҳ соллаллоҳу алайҳи васалламга ёмғир ёғмаётганидан шикоят қилишганида у зот алайҳиссалом: “Сизлар диёрингиз қуриб, ёмғир кечикканидан шикоят қиляпсизлар. Аллоҳ таоло сизларга дуо қилишни буюриб, уни ижобат этишни ваъда қилган”, деганлар.
Ушбу ёмғирнинг ёғиши аҳолимизнинг яхшилик йўлида бирлашиш рамзига айланди. Бу воқеа, фақатгина табиатдаги ўзгариш эмас, балки халқимизнинг тавба-тазарру ва меҳр-оқибат билан ўзаро боғланишининг амалий исботидир.
Шундай экан, Аллоҳнинг неъматлари ва раҳмати устимизда бардавом бўлиши учун янада кўпроқ шукр, тавба қилишга, истиғфор айтишга, исрофдан тийилишга, силаи раҳм, ўзаро меҳр-оқибатга одатланайлик.
Аллоҳ таоло ёғаётган ёмғирни сероб ва хайрли, бошланган қиш фасли баракали бўлишини насиб этсин!
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа