Кеча, 15 январь куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ва Дин ишлари бўйича қўмита раиси Содиқжон Тошбоев Миср Араб Республикасининг мамлакатимиздаги элчиси Тамер Фатҳи Абдуссалом Ҳаммадни қабул қилдилар. 

Мулоқот чоғида икки давлат Раҳбарларининг дўстона муносабатлари туфайли Ўзбекистон ва Миср ўртасида яқин ҳамкорлик алоқалари изчил ривожланиб бораётгани, айниқса, мана шундай илиқ муносабатлар натижасида кўп қиррали ҳамкорлик ва кенг кўламли шериклик кенгайгани, шунингдек, диний-маърифий соҳадаги ҳамкорлик янги босқичга кўтарилгани қайд этилди. 

Айниқса, Ўзбекистон мусулмонлари идораси ва Мисрнинг диний муассасалари – Азҳари шариф, Вақфлар вазирлиги ва Дор ал-ифто ўртасидаги ҳамкорлик алоқалари жадал ривожлангани, хусусан, диний таълим йўналишида малакали кадрларни жалб қилиш, имом-хатиблар малакасини ошириш, халқаро анжуман-кўргазмаларда икки томонлама фаол иштирок ва ҳамкорлик қилинаётгани каби жиҳатларга урғу қаратилди. 

Элчи жаноблари самимий қабул учун миннатдорлик билдириб, икки юртни чуқур тарихий дўстлик, тамаддун ва маданий ришталари боғлаб туриши, хусусан, буюк ватандошимиз Аҳмад ал-Фарғоний Мисрда Нил дарёси сувининг миқдорини ўлчайдиган “Нилометр” асбоби ихтироси ва асли ўзбекистонлик Аҳмад ибн Тулун ҳомийлигида Миср диёри илм-фан ва маданиятига беқиёс ҳисса қўшгани, шунингдек, мамлакатдаги “Ўзбекия” номли даҳа гўзал боғлари билан ажралиб туришини алоҳида қайд этди. 

Томонлар мутахассислар касб маҳоратини ошириш, илмий-тадқиқот, тажриба алмашиш, анжуманлар ўтказиш ва жаҳолатга қарши курашиш йўналишида ўзаро ҳамкорликни янада ривожлантиришга келишиб олдилар.

Дўстона руҳда ўтган учрашувда ўзаро эсдалик совғалари алмашилди. 

Ўзбекистон мусулмонлари идораси
Матбуот хизмати