Фарғона вилояти вакиллигида 2023-2024 ўқув йилида диний таълим муассасаларини тамомлаб, соҳада фаолият бошлаган ёш ходимлар иштирокида ўқув-семинар бўлиб ўтди. Унда вилоят бош имом-хатиби Убайдуллоҳ домла Абдуллаев, бош имом-хатиб ўринбосари Алишер домла Наимов, Бувайда тумани бош имом-хатиби Аҳмадхон домла Низомов ва бошқа мутасаддилар қатнашди.
Семинарда ёш имомлар билан самимий мулоқот қилиниб, уларнинг фаолияти, амалга ошираётган ишлари ўрганилди ҳамда келгусидаги мақсадлари билан танишилди. Маърузачи устозлар имомлик шарафи ва масъулияти, диний-маърифий соҳада олиб борилаётган ислоҳотлар мазмун-моҳияти, ёшларга берилаётган имконият ва имтиёзлар ҳақида сўзлаш билан бир қаторда ҳаётий тажриба ва малакалари билан ҳам ўртоқлашдилар.
Аждодларимиз азалдан Аҳли сунна вал-жамоа ақидаси, Ҳанафий мазҳабининг фиқҳий таълимотларига амал қилиб келганликлари, давримизда эса миллатни ушбу йўлдан оғдиришга бўлаётган уринишларнинг ортиши ва уларнинг салбий оқибатлари хусусида "Динимизда мазҳабларнинг ўрни ва аҳамияти" мавзусидаги маърузада тўхталинди. Уламоларнинг йўллари, илмий ва ҳаётий мисоллар билан семинар янада манфаатли ўтди.
Семинар давомида Марғилон шаҳридаги "Бурҳониддин Марғилоний" ёдгорлик мажмуасига сафар ташкилланиб, давлат раҳбари ташаббуслари билан мазкур мажмуа устида катта ислоҳот бошлангани эътироф этилди.
Фарғона вилояти вакиллиги Матбуот хизмати
Мир Араб олий мадрасаси ректори Жобир домла Элов бошчилигидаги делегация Туркияга амалий ташриф билан борди.
Сафардан кўзланган асосий мақсад хорижий диний таълим муассасалари билан тажриба алмашиш ва ўзаро ҳамкорликни кенгайтиришдан иборат.
Ташриф доирасида делегация 1453 йилда ташкил этилган нуфузли Истанбул университетига ташриф буюрди.
Ушбу учрашув 2018 йилда икки муассаса ўртасида имзоланган ҳамкорлик меморандумининг мантиқий давоми бўлди.
Музокаралар давомида университетнинг Илоҳиёт факультети фаолияти, ўқув режалари ва халқаро илмий алоқалар бўйича муҳим тажриба алмашилди.
Томонлар таълим жараёнларини замонавий талаблар асосида такомиллаштириш масалаларини муҳокама қилиб, келгусидаги истиқболли режаларни белгилаб олдилар.
Учрашув якунида анъанавий эсдалик совғалари алмашилди.
Ўзбекистон мусулмонлари идораси
Бухоро вилояти вакиллиги
Матбуот хизмати