Buxoro shahrining salkam 500 gektar maydonini egallagan qadimiy shahristoni va zamonaviy qismidagi ziyoratgohlarni qamrab olgan xarita tayyorlandi.
– Yurtimiz ziyorat turizmini rivojlantirish borasida juda katta salohiyatga ega, – deydi loyiha muallifi, O'zbekiston Fanlar akademiyasi Tarix instituti tayanch doktoranti Shavkat Bobojonov. –Davlatimiz rahbari turizmni rivojlantirish masalalariga bag'ishlab o'tkazilgan yig'ilishda ham buni alohida ta'kidlagan va sohani ravnaq toptirishda targ'ibot hamda ilmiy yondashuvlar etishmayotganiga e'tiborni qaratgan edi.
2020 yilda Buxoro shahri ISESCO tashkiloti tomonidan Islom olami madaniyati poytaxti deb e'lon qilindi. Shu munosabat bilan tayyorlagan xaritamizdan sharif shahrimizdagi 133 ta ziyoratgoh (50 tasi saqlab qolinmagan), 40 ta qadimiy qabriston (29 tasi saqlab qolinmagan) haqidagi ma'lumotlar o'rin olgan.
O'zbek, rus, ingliz tillarida chop etilgan ushbu ilmiy ishlanma ziyorat turizmi ixlosmandlari uchun qulaylik yaratadi, degan umiddamiz.

O'zbekiston musulmonlari idorasi matbuot xizmati