Samarqandda turizmning asosiy yo'nalishlaridan biri – ziyorat turizmini rivojlantirish borasidagi ishlar kelgusi yilda ham davom ettiriladi.
Bu haqda Samarqand viloyati turizmni rivojlantirish bo'yicha departament boshlig'i Dilshod Narziqulov O'zA bilan suhbatda aytib o'tdi.
Unga ko'ra, Payariq tumanidagi Imom Buxoriy majmuasi atrofida "halol" standartiga to'liq javob beradigan umumiy ovqatlanish korxonalari, mehmonxonalar va savdo markazi tashkil etish rejalashtirilgan.
"Bugungi kunga kelib xalqaro standartlarga to'la javob beradigan ettita uch-to'rt yulduzli mehmonxona qurilmoqda. Ushbu ob'ektlarning ishga tushirilishi bilan viloyatning ziyorat turizmidagi salohiyati sezilarli darajada oshadi va mehmonlarning uzoqroq yashashi uchun sharoit yaratiladi. Nurobod tumani Oqsoy qishlog'idagi "Hazrati Dovud" majmuasiga tutash hududda "Oqsoy HD" MChJ dor yo'li tortish uchun 5 million AQSh dollari qiymatidagi loyihani amalga oshirmoqda. Viloyatning tog'li hududlarida sanatoriy-sog'lomlashtirish maydonlarini qurish bo'yicha ham amaliy ishlar boshlandi. Hozirgi kunda 30 dan ortiq dam olish joylari mavjud bo'lib, ular kuniga 4 700 nafar mehmonni qabul qilishi mumkin", - deydi Narziqulov.
U, shuningdek, 2019 yilning oxirida, taxminan 150 million sayyohlar ziyorat turizmi doirasida butun dunyo bo'ylab sayohat qilishganini ma'lum qildi.
"Samarqand viloyatida faoliyat yuritayotgan turoperatorlar tomonidan viloyatning ziyorat turizmi sohasidagi salohiyatini keng targ'ib etish, ushbu yo'nalishni rivojlantirish borasida amalga oshirilayotgan ishlar Samarqandning kelasi besh yilda ziyorat turizmi uchun dunyodagi eng yaxshi o'n yo'nalishdan biriga aylanishiga zamin yaratadi. Bundan tashqari, Samarqand viloyatida turistik infratuzilmani rivojlantirish maqsadida Samarqandda piyodalar yo'llarini ta'mirlash, shahar atrofi va ichkarisida velosiped yo'llarini yaratish, 30 ta yangi madaniy meros ob'ektini sayyohlik yo'nalishlariga kiritish kabi vazifalar belgilab olindi", - deb xulosa qildi Samarqand viloyat turizmni rivojlantirish departamenti boshlig'i.

O'zbekiston musulmonlari idorasi matbuot xizmati