Umar roziyallohu anhuning orzusi bir ayolning eri bo‘lish, shahvatini qondirish emasdi. Aksincha, u juda ulug‘, sharafli g‘oya va maqsadni ko‘zlagan edi. Ummu Gulsum roziyallohu anho ham mustahkam iymon va axloq sohibasi edi. Shu sababli Umarning roziyallohu anhu ahvolini juda yaxshi anglar, har bir vaziyatdan rozi bo‘lib, hech qachon nolimasdi.

Kunlardan bir kun undagi qanoat va itoat darajasini ochiqcha ko‘rsatuvchi bir voqea sodir bo‘ldi:

Ummu Gulsum roziyallohu anho Hazrati Umar roziyallohu anhudan beruxsat Rum imperatori Xiroqlning zavjasiga bir hadya yubordi. Chopardan hadyani olgan Rum malikasi xizmatchilar va saroy a’yonlarini yig‘di.Ularga:

– Bu hadya musulmonlar xalifasining zavjasi, Payg‘ambarning nabirasidandir. Bu hadya evaziga men ham bir narsa yubormokchiman, - dedi. So‘ng Ummu Gulsumga minnatdorchilik bildirib, bir maktub yozdi va ko‘plab sovg‘a-salomlar bilan jo‘natdi. Tuhfalar orasida qimmatbaho munchoq ham bor edi. Chopar Madinai Munavvaraga kelgach, maktub va sovg‘alarni Hazrati Umar roziyallohu anhuga topshirdi. Hazrati Umar roziyallohu anhu Ummu Gulsum roziyallohu anhoni beruxsat bunday ish qilgani uchun koyidilar.

Birozdan so‘ng bir kishidan: “Namozga to‘planing!” deya chaqirishini so‘radilar. Chaqiriqni eshitganlar muhim bir ish borligini bilib, to‘plana boshladilar. Umar roziyallohu anhu ularga ikki rakat namoz o‘qittirdilar. Alloh taologa hamdu sano aygilgach, qavmga yuzlanib:

• Mendan beruxsat qilingan ishlarda xayr yo‘qdir, — dedilar va bo‘lib o‘tgan voqeani so‘zlab berdilar.

Munchoqni nima qilish haqida ulardan maslahat so‘radilar. Bir guruh: «Munchoq Ummu Gulsumga tegishli narsa evaziga yuborilgan. Shu bois uning mulki bo‘lishi lozim. Imperator Hiroklning zavjasi zimmiy emaski, sizga xush ko‘rinish uchun sovg‘a yuborsa yoki sizning ko‘l ostingizda emaski, sizdan qo‘rqqanidan yuborsa», dedilar.

Boshqa bir guruhga esa: «Biz ham evaziga bir narsa berishini istab, birovga ko‘ylak hadya etamiz yoki sotilib, pulini olish uchun birovga ko‘ylak yuboramiz. Bu munchoq ham shunga o‘xshash bir narsa», dedilar.

Umar (roziyallohu anhu) hammaning fikrini olgach:

— So‘zlaringaz to‘g‘ri. Ammo elchi musulmonlar elchisi, chopar ularning chopari, — dedilar va hadyani Baytultohga berishga amr etdilar.

Umar roziyallohu anhu o‘ta adolatli va ummatning ishlarini o‘ylaydigan hokim bo‘lganidek, oilasining barqarorligini, huzur-halovat va farovonligini ham saqlovchi kishi edilar. Shuning uchun o‘zlarining xususiy mollaridan hadya miqdoricha nafaqa ajratib, zavjalariga berdilar.

Ummu Gulsum roziyallohu anho hazrati Umardan ikki farzand — bir o‘g‘il va bir qiz dunyoga keltirdilar. O‘g‘ilning ismi Zayd ibn Umar, qizning ismi Ruqayya edi. Xayrli bo‘lishini niyat qilib, unga xolasining ismi qo‘yilgan edi. Ummu Gulsum roziyallohu anho farzandlarining go‘zal tarbiya olib, ulg‘ayishlari uchun g‘ayrat qildi va bunga muvaffaq bo‘ldi.

Saidabror Umarov tayyorladi