Tajvid - Qur’oni karimni to‘g‘ri va o‘ziga xos qoidalar asosida tilovat qilishni o‘rgatadigan ilmdir. Ya’ni, Qur’onni Alloh taolo payg‘ambarimiz Muhammad sollallohu alayhi vasallamga nozil qilganidek har bir harfiga maxraj, sifat, g‘unna, mad va boshqalardan haqqini berib tilovat qilishdir.

Tajvid ilmini mukammal o‘rganish, farzi kifoyadir. Ammo, Qur’onni o‘qiyotganda tajvidga amal qilish, har bir musulmonga farzi a’yndir. Ayniqsa jamoatga imom bo‘luvchi kishi tajvid ilmini yaxshi bilishi lozim. Bu imomlik shartlarining avvalidir.

O‘zbekiston musulmonlari idorasi Toshkent viloyati vakilligi tomonidan zarur loyihaga qo‘l urildi.  Hududda faoliyat yuritayotgan imom-xatib va imom noiblarining Qur’on qiroati, Tajvid borasidagi bilimlarini boyitish, xato va kamchiliklarini to‘g‘irlash maqsadida shahar va tumanlar bo‘yicha Tajvid fanidan seminar mashg‘ulotlari olib borilmoqda. Mashg‘ulotlarni Toshkent islom instituti “Tahfizul Qur’on” kafedrasi o‘qituvchilari olib bormoqdalar.

Mashg‘ulotlar bir hafta davom etadi,  unda har bir imom alohida ko‘rikdan o‘tadi. Shu vaqtgacha Olmaliq, Ohangaron Angren shahar-tumanlari imomlari o‘qitilgan bo‘lsa, hozirgi vaqtda Bekobod tumanidagi "Oq masjid" jome masjidida navbatdagi haftalik boshlangan.

Ishtirokchi imomlar taassurotlarini ifoda etar ekanlar: «Biz bir necha yillardan buyon taskin topib yurgan Qur’on va tajvid ilmiga oid bilimlarimiz aslida har dam mahoratni oshirib borishni talab etadigan bilim ekan. Seminar jarayonida Qur’on tilovatini huddi alifbodan boshlab o‘rgangandagi zavq va halovatlarimiz yangidan jo‘shqinlandi…», deya ushbu seminarning naqadar yuksak ahamiyat kasb etganini alohida ta’kidlab o‘tdilar va bu xayrli ishni tashkil etgan mutasaddilarga o‘z minnatdorchiliklarini izhor bildirdilar.

O‘zbekiston musulmonlari idorasi Masjidlar bo‘limi