24 oktyabr kuni Rossiya Federatsiyasida xizmat safarida bo‘lib turgan O‘zbekiston musulmonlari idorasi Xalqaro aloqalar bo‘limi mudiri Muhammad-Akmalxon Shakirov xalqaro anjuman doirasida Rossiya musulmonlari diniy idorasi raisi, bosh muftiy Tal’at Tojuddin janoblari bilan uchrashdi.
Muloqotda Muhammad-Akmalxon Shakirov bosh muftiy Tal’at Tojuddinga O‘zbekiston musulmonlari idorasi raisi, muftiy Usmonxon Alimov hazratlarining salomlarini yetkazdi. O‘z navbatida, Tal’at Tojuddin O‘zbekiston delegatsiyasining xalqaro anjumandagi ishtirokini yuqori baholadi.
O‘zaro suhbatda bosh muftiy janoblari Buxoro shahridagi Mir Arab madrasasida tahsil olgan davrlarni xotirlab, tabarruk ustozlardan saboq olgani, xususan, Yusufxon to‘ra Shokirxon hazratlaridan dars olganlarini alohida qayd etdi.
Shuningdek, u O‘zbekiston musulmonlari idorasi bilan Rossiya Federatsiyasi musulmonlari diniy idorasi o‘rtasidagi do‘stona munosabatlardan bag‘oyat mamnun ekanini bildirgan. Kelgusida hamkorlikni yanada kengaytirish hamda rivojlantirish uchun barcha sa’y-harakatlarni ishga solishini bildirdi. Kelgusida ta’lim sohasidagi hamkorlikni rivojlantirish orqali O‘zbekistondagi diniy ta’lim muassasalarida rossiyalik yoshlarni o‘qitish va diniy soha xodimlarining malakasini oshirishning yo‘lga qo‘yilishi juda katta samara berishini qo‘shimcha qildi.
Bundan tashqari uchrashuvda ikki xalq o‘rtasidagi do‘stlikni mustahkamlashda diniy-ma’rifiy sohadagi hamkorlikning o‘ziga xos o‘rni borligi, o‘tgan yillar mobaynida Rossiyadagi din peshvolarining yurtimizga tashrifi va o‘zbekistonlik ulamolarning Rossiya Federatsiyasiga safarlari o‘zaro hamkorlikni yangi bosqichga olib chiqqanini alohida qayd etildi.
Anjuman tafsilotlarini saytimizda kuzating.

O‘zbekiston musulmonlari idorasi Matbuot xizmati