Bugun, 28 dekabr kuni Toshkent shahri Shayxontahur tumani Ko‘kcha dahasidagi “Shayx Zayniddin” jome masjidiga Abdurahmonov Yahyo Ubaydullo o‘g‘li imom-xatib etib tayinlandi.
Abdurahmonov Yahyo 1999-2003 yillarda Buxoro shahridagi “Mir Arab” madrasasini tamomlagan. 2004-2008 yillarda Toshkent islom institutida ta’lim olgan. Misr davlatidagi “al-Azhar” universitetida malaka oshirgan. 2009-2011 yillarda O‘zbekiston milliy universitetining Oliy jurnalistika fakultetida o‘qigan. 2004-2018 yillarda Toshkent shahri Yunusobod tumani “Kulol qo‘rg‘on” jome masjidida imom noibi, imom-xatibi vazifalarida ishlagan. Ayni vaqtda Toshkent islom institutida “Tajvid” fani o‘qituvchisi va Xalqaro islom akademiyasining mustaqil tadqiqotchisi hisoblanadi.
2018 yilda Toshkent shahridagi tumanlararo qorilar musobaqasining mutlaq g‘olibi, shahar bo‘yicha 2-o‘rin sohibi bo‘lgan. 2018 yilda “Eng ma’rifatli imom” ko‘rik tanlovi Toshkent shahridagi bosqichi g‘olibi, Respublika bosqichida esa 2-o‘rinni egalladi.
Abdurahmonov Yahyoga ushbu markaziy jome masjiddagi sharafli vazifada xalqimizning diniy-ma’rifiy ehtiyojini ta’minlash yo‘lida Alloh taolodan kuch-quvvat so‘raymiz.

O‘zbekiston musulmonlari idorasi Matbuot xizmati