Bahor faslining ilk kunida O‘zbekistonning Samarqand viloyati bilan Tojikistonning So‘g‘d viloyatini ajratib turuvchi Urgut tumanidagi “Sarazm–Jartepa” nazorat-punktida katta shodiyona bo‘ldi. Bu yerda viloyat va tuman hokimligi, ziyolilar, imom-xatiblar, yoshu keksa, erkagu ayollar guvohligida o‘n yil muqaddam yopilgan chegara nazorat punkti qayta ochildi.
So‘nggi oylarda qo‘shnilar bilan yaqin aloqalar qayta tiklandi. Mintaqadagi barcha mamlakatlar sari yaqinlashdik. Tan olish kerakki, Tojikiston bilan aloqalarni tiklashni xalqlarimiz intiqlik bilan kutgan edi. O‘zaro manfaatli, xayrixoh do‘stlik, samimiyat, tarixiy qardoshlikka asoslangan yangilanishlar ro‘y berishi Yaratganning katta marhamati bo‘ldi.
Muhtaram Yurtboshimizning sa’y-harakatlari ortidan qardosh xalqlar orasida aloqalarni mustahkamlash, ikki davlat orasidagi hamkorlikni rivojlantirish yo‘lida tashlangan navbatdagi muhim qadam chin ma’nodagi tarixiy voqea bo‘ldi.
Aytish joizki, bu xayrli yangilanishlarni ilgari turli sabablar tufayli berkitib qo‘yilgan chegaraning har ikki tomonida yashovchi kishilar teran his qilishdi. Qarindoshlari, do‘stlari bilan ko‘rishish endi avvalgiday uzoq vaqt va asabbuzarlikni talab etuvchi mushkul vazifa emas, balki quvonchli hodisaga aylandi. Axir bizning qardoshlik rishtalari bilan bog‘langan, mehmondo‘stlik bilan nom chiqargan mintaqamizda shunday bo‘lishi ham kerak.
Xalqimizga xos an’ana faqat bayram yo xursandchilikni baham ko‘rishdan iborat emas. Aksincha, qiyin vaziyatda yelkadosh, so‘z va amaliy ish bilan xalqlarimizni jalb qilgan holda, muammoni birgalikda hal etish undan-da muhim.
Chegaralar ochilishi marosimida ishtirok etganlar ikki xalq o‘rtasidagi qadim-qadimdan davom etib kelayotgan azaliy an’analar qayta jonlanayotganini ko‘rib, Yaratgan Parvardigorga shukronalar aytishdi.
O‘zbekiston musulmonlari idorasining
Samarqand viloyati vakilligi,
O‘MI Matbuot xizmati
O‘zbekiston elchisi Nodirjon Turg‘unov (qarorgohi Ar-Riyoz shahrida joylashgan) Bahrayn adliya, islom ishlari va vaqf vaziri Navvof bin Muhammad al-Muovida bilan uchrashdi, deb xabar qilmoqda "Dunyo" AA muxbiri.
Vazir muloqot avvalida O‘zbekiston zaminidan yetishib chiqqan olimlarning Islom tamadduniga hissa qo‘shgan hissasini, mamlakat tomonidan diniy-ma’rifiy sohaga qaratilayotgan e’tibor, yosh kelajak avlod uchun yaratilayotgan imkoniyatlar tahsinga sazovor ekanini ta’kidladi. Uning aytishicha, Imom Buxoriy, Imom Termiziy, al-Xorazmiy, Farobiy, Zamaxshariy kabi Islom olamida yuksak obro‘-e’tibor topgan olimlarning merosi dunyo musulmonlarining umumiy boyligidir.
– So‘nggi yillarda O‘zbekistonda o‘tkazilayotgan xalqaro ilmiy-amaliy konferensiyalar nafaqat o‘zbek xalqi, balki butun Islom ummatiga xizmat qilmoqda. Bahrayn Islom merosini o‘rganish bo‘yicha o‘zbek tomoni bilan yaqindan hamkorlikni yo‘lga qo‘yish va ilmiy izlanishlarni birgalikda amalga oshirishga tayyor", – dedi adliya, islom ishlari va vaqf vaziri Navvof bin Muhammad al-Muovida.
Muloqot chog‘ida Toshkent shahrida barpo etilayotgan O‘zbekistondagi Islom sivilizatsiyasi markazining ochilish marosimida Bahrayn delegatsiyani ishtirokini ta’minlash, O‘zbekiston musulmonlari idorasi va Islom sivilizatsiyasi markazi bilan hamkorlik aloqalarini o‘rnatish, ikki mamlakat ilmiy markazlar o‘rtasida aloqalarni rivojlantirish istiqbollari ko‘rib chiqildi.
Tomonlar O‘zbekiston va Bahrayn o‘rtasida adliya, Islom ishlari va vaqf sohasidagi hamkorlikni rivojlantirish, birgalikda ilmiy-amaliy ishlarni tashkil etish maqsadida mas’ul xodim tayinlash taklifini qo‘llab-quvvatladilar.
O‘zbekiston musulmonlari idorasi
Matbuot xizmati