“Islom – tinchlik va ezgulik dini" mavzusidagi xalqaro konferensiya ishtirokchilari bu jihatlarni alohida e’tirof etmoqda.
Bu haqda Dorul-ulum Karachi islom universiteti (Pokiston) professori Shayx Muhammad Taqiy Usmoniy o‘z fikrlarini bildirdi:
–Ulug‘ allomalar yurtida o‘tkazilayotgan xalqaro anjumanda ma’ruza bilan ishtirok etganimdan bag‘oyat mamnunman.
O‘zbekiston asrlar osha butun jahonga buyuk va zabardast ulamolarni yetishtirib bergan muborak zamindir. Bu zaminda tug‘ilib, voyaga yetgan ulug‘lar shunchalik ko‘pki, ular butun olamni ilm-ma’rifatga, nurga to‘ldirganlar. Islom ilmlarining barcha sohalari, Qur’on va tafsir, hadis, fiqh kabi yo‘nalishlarda eng yuksak maqomga erishganlar. Bu yurtdan yetishib chiqqan allomalarning ilm-fanning turli sohalarida qo‘lga kiritgan yutuqlari naqadar yuksak darajada ekani hech kimga sir emas. Buni butun olam biladi.
Bolalik vaqtimda qulog‘imga chalingan dastlabki so‘zlardan biri Buxoriy nomi bo‘lgan. O‘shandan buyon Imom Buxoriy dunyoga kelgan tabarruk diyorga kelishni orzu qilganman. Necha asrlar o‘tibdiki, bu ulug‘ zot qarshisida butun dunyo ulamolari ta’zim qilib keladilar. Bu zamindan yetishib chiqqan allomalarning sanog‘iga yetish juda qiyin. O‘zbekistonga 5 yil muqaddam kelgan edim. Shu yillar mobaynida mamlakatda juda katta bunyodkorlik ishlari, katta o‘zgarishlar bo‘lganiga guvoh bo‘lib turibman.
N.Usmonova, O‘zA
Qoraqalpog‘iston Respublikasi Vazirlar Kengashi Raisining o‘rinbosari A.Allaniyazov shahar va tuman bosh imomlari bilan uchrashuv o‘tkazdi. Qoraqalpog‘iston musulmonlari qozisi B. Razov olib borgan tadbirda quyidagi muhim masalalarga e’tibor qaratildi:
Islohotlar targ‘iboti: Yurtimizdagi o‘zgarishlarni xalqqa to‘g‘ri yetkazish va tinchlikni asrashda imomlarning o‘rni;
Ma’rifiy islom: Yoshlarga ijtimoiy tarmoqlarda sof islom dini mazmunini va Hanafiy mazhabi ta’limotlarini to‘g‘ri tushuntirish;
Ma’naviy tarbiya: Juma va kundalik namozlarda dolzarb mavzular bo‘yicha manzilli tushuntirish ishlarini olib borish;
Hamjihatlik: Mahallalardagi ijobiy o‘zgarishlarni e’tirof etgan holda, mamlakat taraqqiyoti yo‘lida bir yoqadan bosh chiqarib harakat qilish.
Uchrashuv yakunida diniy soha vakillariga berilayotgan e’tibor va imkoniyatlarga munosib ravishda, xalq farovonligi yo‘lida faol xizmat qilish lozimligi ta’kidlandi.
Qoraqalpog‘iston musulmonlari qoziyoti