O‘zbekiston Respublikasi davlat mustaqilligining 34 yillik bayrami munosabati bilan tizimdagi diniy soha xodimlari o‘rtasida “Vatan uchun, millat uchun, xalq uchun!” shiori ostida joriy yilning 24 avgust kuni “Futbol” musobaqasi o‘tkazildi.
Musobaqaning tantanali ochilish marosimida Andijon viloyati bosh imom-xatibi Mirzamaqsud domla Alimov so‘zga chiqib, yurtimiz istiqlol ayyomi munosabati bilan o‘tkazilayotgan bellashuvning ahamiyati haqida nutq so‘zladi va ishtirokchilarga omad hamda zafarlar tiladi.
Bellashuv diniy soha xodimlarining aqliy va jismoniy faolligini oshirish, jamoaviy hamfikrlikni qo‘llab-quvvatlash va hamjihatlikni mustahkamlash maqsadida O‘zbekiston musulmonlari idorasi rahbariyati tavsiyasi asosida tashkil etildi.
Viloyat shahar va tumanlaridan tashrif buyurgan jamoalar o‘rtasidagi musobaqa qizg‘in bahslarga boy tarzda o‘tdi.
Musobaqa yakunida Andijon shahar jamoasi g‘oliblikni qo‘lga kiritdi. Shuningdek, g‘oliblar va turli yo‘nalishlarda o‘z mahoratlarini namoyon etgan ishtirokchilar O‘zbekiston musulmonlari idorasi Andijon viloyat vakilligining faxriy yorliqlari hamda esdalik sovg‘alari bilan taqdirlandilar.
Vakillik matbuot xizmati
O‘zbekiston musulmonlari idorasi tizimidagi Oliy va o‘rta-maxsus diniy ta’lim muassasalarida Qur’oni karim 521 marta, “Sahihul Buxoriy” 14 ta xatm qilinib, 750 mingdan ziyod istig‘for, 240 mingdan ziyod salavotlar aytildi. Yurtimizdagi masjidlarda o‘qilgan juma va istisqo namozlari ortidan ushbu xatmlar bag‘ishlandi.
Tarixga nazar tashlansa, “Qur’oni karim” xatm qilingani kabi “Sahihi Buxoriy” ham yozilganidan buyon to‘liq o‘qilib, xatm qilinib, undan baraka hosil qilingan. “Sahihi Buxoriy” to‘liq o‘qilib, xatmdan so‘ng qilingan duolar ijobati juda ko‘plab tajribalardan o‘tgan haqiqat. Ulamolar xatmni juma kuni tugatishni mo‘ljallab, bir necha kunda xatm qilib o‘tkazishgan.
“Oltin silsila”da aytilishicha, mo‘g‘ullar istilosiga qarshi masjidlarda “Sahihi Buxoriy” o‘qitilgan. Kitobning xatmi yakunlanib, oxiriga yetgan kundan boshlab mo‘g‘ul qo‘shinlari mag‘lubiyatga uchray boshlagan.
Vabo tarqalish xavfi bo‘lganida, o‘latga qarshi ham “Sahihi Buxoriy” kitobi xatm qilingan.
Mag‘ribda ulamolar har rajab oyi boshlanishi bilanoq “Sahihi Buxoriy”ni o‘qishib, uni ramazonning yigirma yettinchi kechasi xatm qilishgan. Hindiston va Pokistonda esa mavlid oyida “Sahihi Buxoriy”ni o‘qib tugatish an’anasi hozir ham bor.
Shuningdek, mamlakatimiz bo‘ylab 500 ga yaqin jonliq so‘yilib, besh mingdan ziyod ehtiyojmand xonadonlarga xayr-ehsonlar tarqatildi.
Alloh taolodan yolvorib so‘raymizki, yuqorida aytib o‘tilgan Qur’oni karim va “Sahihi Buxoriy” xatmlari, qilingan qurbonliklar, aytilgan istig‘for va iltijolarni qabul etib, yurtimizga yog‘ingarchiliklarini ko‘p qilib bersin!
O‘zbekiston musulmonlari idorasi
Matbuot xizmati