muslim.uz

muslim.uz

Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.

Саҳобия аёллардан Фотима хонимнинг насаблари: бинти Асад ибн Ҳошим ибн Абду Маноф ибн Қусой. Яъни, отасининг исми Асад, унинг отаси эса Ҳошим, унинг Отаси Абдуманоф, у Қусайнинг ўғли.

Фотима бинти Асад ҳошимийлар уруғи ичида биринчи дунёга келган ҳошимийя бўлган. У киши Али ибн Абу Толиб розиялоҳу анҳунинг оналари бўлади. Биринчилардан бўлиб ҳижратга чиққан муҳожирлардан.

Маълумки, Расулуллоҳ соллаллоҳу алайҳи васаллам ёшлик чоғида етим қолганлар. Оталари Абдуллоҳ ҳали Расулуллоҳ дунёга келмасларидан аввал вафот этганлар. Онасиларидан ҳам жуда эрта ажралганлар. Боболари Абдулмуттолибдан кейин Расулимиз алайҳиссаломни амакилари Абу Толиб ўз қарамоғига олган. Ўшанда Абу Толибнинг завжаси Фотима хоним Расулуллоҳга жуда кўп ғамхўрлик қилган. Шу туфайли Пайғамбаримиз соллаллоҳу алайҳи васаллам бу аёлга ўзгача эҳтиром кўрсатар эдилар. Ҳатто у аёл қазо қилганда ўз либосини унга кафан қилдирган ва қабрида ҳам бирга бир оз ётиб, кейин дафн эттирган эканлар.

Ибн Абдулбар раҳматуллоҳи алайҳ Саъдон ибн Валид ас-Сабирийдан, у Ато ибн Абу Рабоҳдан у Абдуллоҳ ибн Аббос розияллоҳу анҳудан ривоят қилади:

Али ибн Абу Толибнинг онаси Фотима қазо қилганда Расулуллоҳ соллаллоҳу алайҳи васаллам унга ўз кўйлакларини кафан сифатида кийдирдилар ва қабрга дафн этиш чоғида ҳам уни ёнида андак ётдилар. Бу ишдан ҳайрон бўлган саҳобалар: «Эй Аллоҳнинг Расули, олдин бундай қилганингизни ҳеч кўрмаган эдик, нега бундай қилдингиз?» деб сўрашди? Шунда Расулуллоҳ соллаллоҳу алайҳи ва саллам: «Менга Абу Толибдан кейин бу аёлчалик яхшилик қилган одам бўлмаган. Кўйлагимни токи жаннатда бу аёлга жаннат либослари кийдирилсин, деб кийдирдим. Ёнида бир оз ётишимнинг сабаби эса, унинг ҳисоб-китоби енгил бўлсин, дедим» – деб жавоб бердилар». (Сияру Аълом ан-Нубало. 2-Ж. 118-б).

Сохта салафийларнинг бузуқ ақидаларидан бири, табаррук нарсаларнинг баракасини инкор этишади. Ҳатто уни ширк дейишгача боришади. Ваҳоланки, юқоридаги ривоятда Пайғамбаримиз соллаллоҳу алайҳи васалламнинг ўзлари табаррукан ўз кўйлакларини Фотима бинти Асадга кафан қилган эканлар!

Демак, Аллоҳга яқин улуғ зотларнинг табаррукотларида,албатта барака бор экан.

Cирожиддин Муҳиддинов,

Сурхондарё вилояти, Олтинсой тумани 

 «Саййид Муҳиддинхон» жоме масжид имоми

Манба: https://islom.uz

Четверг, 14 Март 2019 00:00

Яхшиларнинг энг яхшиси

Аллоҳнинг Каломи бўлмиш Қуръони каримни бутун оламларни ҳидоят қилиш учун нозил қилган Аллоҳ таолога Ўзининг жалолига муносиб ҳамду санолар бўлсин.

Ушбу Китобни умматларига омонат ила етказиб, унга амал қилишни ўргатган Пайғамбаримиз Муҳаммад мустафо соллаллоҳу алайҳи васалламга мукаммал ва муаттар салавоту дурудлар бўлсин.

Пайғамбаримиздан Қуръони каримнинг бирор ҳарфини ўзгартирмай ўта аниқлик ила қабул қилиб, унга худди шундай аниқлик ва ихлос ила амал қилган саҳобаи киромларга Аллоҳнинг ризвони бўлсин.

Қуръони каримга имон келтирган, уни ўргатган, ўрганган ва унга амал қилган ҳар бир мусулмонга Аллоҳнинг раҳмати, хайри баракаси бўлсин.

Усмон розияллоҳу анҳудан ривоят қилинади: «Набий «соллаллоҳу алайҳи васаллам: «Сизларнинг яхшиларингиз Қуръонни ўрганганларингиз ва ўргатганларингиздир», дедилар» (Имом Бухорий ва Имом Термизий ривояти).

Бу ҳадиси шарифнинг иборалари оз бўлгани билан маънолари, далолатлари кўпдир. Унда мусулмонларнинг яхшилари ҳақида хабар берилмоқда.

Ҳадиси шарифнинг маъносидан келиб чиқадиган бўлсак, Қуръони каримни ўрганадиганлар мусулмонларнинг яхшиси бўлади. Қуръони каримни ўргатадиган мусулмонлар яхшиларнинг яхшисининг устози бўлади. Устоз эса ўз шогирдидан қанчалар устун туриши ҳаммага маълум.

Мир Араб мадрасаси асрлар давомида алломалар, машҳур имом ва муфтийларни, фақиҳлар ва муҳаддисларни, қорию қурроларни етиштириб келган.

Халқимиз, нафақат ўзбек халқи, балки собиқ иттифоқ таркибидаги барча халқларнинг маънавий, маърифий, эътиқодий, диний онг ва тушунчасини юксалишига ўз ҳиссасини қўшган буюк шахсларни етиштирган.

Мадрасага ҳар йили 24 нафар талаба қабул қилинар эди. 2017 йил эса 48 нафар талаба қабул қилинди. Ана шу талабалар 4 гуруҳга бўлинган эди. Улардан бири Қуръони каримни ёдлашга иқтидорли ва қобилиятли талабалардан иборат “Таҳфизул Қуръон” гуруҳидир. Бу гуруҳда 12 та талаба бўлиб, улар режа асосида Қуръони каримни 4 йил давомида мустаҳкам ёд оладилар, инша Аллоҳ. “Таҳфизул Қуръон” гуруҳининг ташкил қилиниши неча йиллардан буён кутилаётган орзунинг рўёбга чиқиши бўлди. Чунки сўнгги йилларда Бухоро вилоятида Қуръони каримни тўлиқ, мустаҳкам ёд олган қориларга эҳтиёж сезиларли даражада эди. Масалан, вилоят масжидларида рамазон ойида таровеҳ намозларида Қуръони каримни хатм қилиб бериш учун республикамизнинг бошқа вилоятлари (Андижон, Наманган ва Фарғона)дан қорилар таклиф қилинар эди. “Таҳфизул Қуръон” гуруҳининг ташкил қилиниши, ана шу камчилик ва нуқсоннинг ўрнини тўлдирадиган бўлди. “Таҳфизул Қуръон” гуруҳининг ўзига хос хусусиятларидан бири: талабалар ҳар куни эрталаб биринчи жуфтлик (пара) дарсни Аллоҳнинг каломини ўқиш, ёдлаш ва қалбларига жо айлаш билан бошлайдилар. Бу эса талабаларга кун давомида яхши кайфият, шижоат, илмга бўлган рағбат ва муҳаббатни бахш этади.

“Таҳфизул Қуръон” гуруҳи талабалари ўртасида Каломуллоҳни биринчи ёдлаш бўйича мусобақа эълон қилинган эди. Ана шу мусобақада “Таҳфизул Қуръон” гуруҳи талабалари ўртасида Тўрақулов Абдураҳим бир йил давомида Қуръони каримни тўлиқ ёд олиб мусобақа ғолибига айланди.

Мир араб мадрасаси раҳбарияти тарафидан қиммат баҳо совғалар ва ҳомийлар томонидан икки миллион (2 000 000) сўм пул мукофоти Тўрақулов Абдураҳимга топширилди.

Мир Араб мадрасасида Аллоҳнинг каломига мислсиз хизмат қилаётган, талабаларга қироат ва тажвид фанидан илм бераётган Акромов Мақсуд домла ва “Таҳфизул Қуръон” гуруҳининг раҳбари Тожиддинов Абдусамад домлаларга Аллоҳ таоло икки дунёда барча яхшиликларни берсин ва барча ёмонликлардан Ўз паноҳида асрасин.

 

Аъламбек ҲИКМАТОВ,

Мир Араб ўрта махсус ислом билим юрти талабаси

Куни кеча, 13 март куни Ўзбекистон мусулмонлари идораси раиси, муфтий Усмонхон Алимов ҳазратлари Татаристондаги хизмат сафарлари давомида Татаристон мусулмонлари идораси, мадрасалари ва масжидлари фаолияти билан яқиндан танишдилар. Татаристон мусулмонлари диний бошқармаси раиси, муфтий Камил ҳазрат Самигуллин ва бошқа мутасаддилар билан ўзаро мулоқотлар ўтказдилар. Муфтий ҳазратлари Диний бошқарма иш фаолияти, мадрасаларда дарс бериш жараёнлари, кутубхоналар фонди, мударрисларнинг сабоқ бериш маҳорати ва талабаларга яратилган шарт-шароитларни бирма-бир кўздан кечирдилар.
Маълумот ўрнида, Татаристон мусулмонлари диний бошқармаси 1992 йилда Татаристон мусулмонлари қурултойи қарори билан ташкил этилган. Габдулла ҳазрат Галиуллин Татаристон мусулмонлари диний бошқармасининг биринчи раиси этиб сайланган. 1998 йилда Татаристон мусулмонлари диний бошқармаси Адлия вазирлигида давлат рўйхатидан ўтказилган. 2013 йил апрель ойидан бошлаб, муфтий Камил ҳазрат Самигуллин Татаристон мусулмонлари диний бошқармасини бошқариб келмоқда.
Татаристон мусулмонлари диний бошқармаси бугунги кунда ўз таркибига 9 та қозиёт, 48 та туман муҳтасиблари, 1415 та масжид, 9 та мадрасани ўз ичига олади.
Шунингдек, диний бошқарма Қозон ислом университети муассиси ҳамда Россия ислом институти ва Булғор ислом академияси ҳаммуассиси ҳисобланади.
Татаристон мусулмонлари диний бошқармаси услубий раҳбарлиги остида "Ҳалол" стандарт қўмитаси, Татаристон “Вақф” жамғармаси, Татаристон мусулмонлари диний бошқармаси Ҳаж расмий ҳаж-оператори, “Закот” хайрия жамғармаси, “Ҳузур” нашриёт уйи ўз фаолиятларини олиб бормоқда.
Томонлар учрашувлар давомида ўзаро тажриба алмашиб, бир-бирларига эсдалик совғалари топширдилар.
Сафар жараёнларини сайтимиз орқали кузатишда давом этинг.

 

 

Ўзбекистон мусулмонлари идораси Матбуот хизмати

Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.

*****

Виждон шундай нарсаки, у сенга “Сени Буюк Зот кўриб турибди” деган хабарни беради.

*****

Пок бўлиб бораверсанг, сени болалар, ҳайвонлар, қушлар, дарахтлар ва одамлар яхши кўриб бораверади.

“Тарих муҳрлаган сўзлар”

*****

Хиёнатнинг мингта йўли бор. Лекин уларнинг ичидаги энг жирканчи – ўзини севадигандек кўрсатишдир.

“Тарих муҳрлаган сўзлар”

*****

Ер юзида мухлис дўстдан кўра каттароқ мукофот йўқ.

“Тарих муҳрлаган сўзлар”

*****

Баъзи одамлар сунъий дарахтларга ўхшайди. Ҳар қанча сув қуйсанг (яхшилик қилсанг) ҳам, мева бермайди.

“Ҳаётнинг нариги юзи”

*****

Гўдаклар еттита хислат билан ажралиб турадилар:

  • Улар ризқнинг ғамини емайдилар.
  • Касал бўлсалар, Аллоҳнинг қазои қадаридан безовта бўлмайдилар.
  • Қалбларида гина, адоват, ҳасад йўқ.
  • Улар тез сулҳга келишадилар.
  • Улар биргалашиб овқатланадилар.
  • Уларни озгина қўрқитилса, қўрқадилар.
  • Уларнинг кўзлари тез-тез ёш тўкади.

*****

Ёстиқ бойнинг, фақирнинг, кичикнинг, каттанинг, қўриқчининг, подшоҳнинг ҳам бошини кўтариб туради. Лекин унда фақат кўнгли хотиржам инсонгина ухлай олади.

*****

Қудуққа туфлама, бир кун ундан ўзинг ҳам сув ичишинг бор.

*****

Ҳамма нарса кичик ҳолда бошланиб, кейин катталашади. Аммо мусибат ундоқ эмас. У катта ҳолда бошланиб, кейин кичраяди.

*****

Ўртача ақлли инсон билан доно инсоннинг орасидаги фарқ – ҳар бирлари муваффақиятсизликка учраганда қандай муносабат билдиришидир.

“Тарих муҳрлаган сўзлар”

*****

Уятли ҳолат бир тошга икки марта қоқилишдир.

*****

Кутилган қимматбаҳо совғадан кўра кутилмаган кичикроқ совға инсонга кўпроқ таъсир қилади.

*****

Муваффақиятсизликка учраганлар икки қисмга бўлинади:

  1. Ҳеч иш қилмай, фақат ўйлайдиганлар.
  2. Ҳеч ўйламасдан иш қиладиганлар.

*****

 

 

Интернет материалларидан тўплаб, таржима қилувчи

Нозимжон Иминжонов

 

Среда, 13 Март 2019 00:00

Араб тилининг бойлиги

Маълумки, Қуръони Карим араб тилида нозил қилинган. Дарҳақиқат, араб тили жуда бой тилдир. Феълларнинг тусланиши, отларнинг турлари жуда хилма-хил ва сермаҳсулдир. Қуйида биргина “келмоқ”, “келиш” маъносини ифода этадиган бир қанча феълларни кўриб чиқайлик.

Атаа (أَتَى) - яқин макондан келди.

Қодима (قَدِمَ) - узоқ макондан келди.

Ақбала (أَقْبَلَ) - қизиқиб, рағбат қилиб, ҳаяжонланиб келди.

Ҳазора (حَضَرَ) - чақириққа лаббай деб келди.

Заара (زارَ) - ўзаро алоқаларни улаш ва яхшилик мақсадида келди.

Торақа (طَرَق) - кечқурун келди.

Ғошия (غَشِي) - билмасдан, тўсатдан келди.

Ваафаа (وافَى) - келаётиб, йўлда мақсадига эришди.

Варода (وَرَدَ) - сув олиш мақсадида келди.

Вафада (وَفَدَ) - бир гуруҳ кишилар билан келди.

Ҳа, азизлар, биргина феълнинг маъносини ифода этувчи шунча феълларнинг борлиги бу тил нақадар бой ва сермаҳсул тил эканини кўрсатиб турибди.

Қуръонни ўрганишимиз, маъноларини яхши тушунишимиз учун ушбу тилдаги ҳар бир сўзнинг ўзи хос нозик қирраларини, маъноларини билиш, тадқиқ этиш талаб этилади.

Аллоҳ таоло барчамизга Қуръон тили бўлмиш – араб тилини яхши ўрганиб, ўзлаштириб боришимизни насиб этсин!

 

 

Интернет маълумотлари асосида

Нозимжон Иминжонов таржимаси

Страница 8 из 1124
Top