muslim.uz
Савда бинти Замъа (розияллоҳу анҳо)
Пайғамбаримиз (соллаллоҳу алайҳи ва саллам) ҳазрати Хадича (розияллоҳу анҳо) онамиз вафотидан сўнг ҳазрати Савда бинти Замъа онамизга уйланганлар.
Савда онамизнинг оталари Замъа ибн Қайс ибн Абдуш Шамс ибн Абд Вудд ибн Амир ибн Луай ибн Ғолиб, оналари эса аш-Шамус бинти Қайс ибн Амр ибн Зайд ибн Лабид ибн Хидаш ибн Амира бану Ади ибн ан-Нажжар қабиласидан эди.
Савда онамиз дастлаб амакиларининг ўғли Сакрон ибн Амрга турмушга чиққан. Икковлари исломни қабул қилиб, Ҳабашистонга ҳижрат қилганлар ва саккиз муҳожирнинг сафидан жой олган. Савда онамизнинг биринчи эрлари Сакрон ибн Амр касал бўлиб вафот этган.
Пайғамбаримиз (соллаллоҳу алайҳи ва саллам) Хадича онамизнинг вафотларидан бир неча йил кейин, Тоифдан ниҳоятда маҳзун бўлиб қайтган эдилар. Савда онамизга уйланишлари ана шундай вақтга тўғри келган.
Мўмина аёллар орасида Хавла бинти Ҳаким (розияллоҳу анҳо), Набий (соллаллоҳу алайҳи ва саллам)нинг номларидан Савда онамизга совчи бўлиб борганлар. Савда онамиз оталарининг розиликлари билан Пайғамбаримизга турмушга чиқиб, 400 дирҳам маҳр олган. Шу вақтда Рамазон ойи бўлиб, пайғамбарликнинг ўнинчи йили эди. Бу никоҳ маккаликларни таажжублантирган. Чунки Савда онамиз ёш ҳам эмас, унчалик чиройли ҳам эмасди.
Лекин Пайғамбаримиз (соллаллоҳу алайҳи ва саллам) қийинчиликда қолган кимсасиз аёлни ҳимоя этганлар. Савда (розияллоҳу анҳо) мўминларнинг онаси, зиммаларидаги масъулиятни адо этишга сидқидилдан киришиб, етим қолган фарзандларининг тарбияси билан шуғулланган. Савда онамиз итоатли, севимли ва ҳазилкаш аёл эди.
Бир куни Савда (розияллоҳу анҳо) Пайғамбаримиз (алайҳиссалом)га: «Эй Аллоҳнинг Расули, кеча ортингиздан намоз ўқидим. Жуда узоқ вақт руку қилдингизки, қон оқиб кетмасин деб бурнимни ушлаб турдим», дедилар. Расулуллоҳ (соллаллоҳу алайҳи ва саллам) кулдилар. Шу тариқа орадан уч йил ўтди.
Савда бинти Замъа Оиша онамиз келин бўлиб тушганидан кейин ҳам ҳазил-мутойибани тарк этмади. Пайғамбаримиз (соллаллоҳу алайҳи ва саллам) хонадонларига бошқа аёллари бирин-кетин кириб кела бошлади. Бироқ бу ҳол уларни ўз ўрниларини йўқотишга олиб келмади. Суюкли пайғамбаримиз ҳар қайсисига яраша муомала қилдилар.
Оиша (розияллоҳу анҳо)дан ривоят қилинади: «Мен Савдадан бошқа тутими ва сийратида ўзимга ёқадиган, унга ўхшаш аёлни кўрмадим. У ёши катта бўлганда: «Эй Аллоҳнинг Расули (соллаллоҳу алайҳи ва саллам), сиздаги ҳақим бор кунимни Оишага бердим», деди. Расулуллоҳ (соллаллоҳу алайҳи ва саллам) Оишага икки кун – ўз кунини ва Савданинг кунини тақсим қилар эдилар».
Аллоҳ таолонинг изни ила Набий (соллаллоҳу алайҳи ва саллам) ҳижрат қилганларида, Савда бинти Замъа онамиз ҳам у зотнинг ортларидан қизларини олиб ҳижрат қилган. У ерда ҳам Пайғамбаримиз (соллаллоҳу алайҳи ва саллам) хонадонларини бошқариб турган.
Бадр жангида қариндошлари Суҳайл ибн Амр асир тушганида, соддадиллик билан Пайғамбаримиз (соллаллоҳу алайҳи ва саллам)га қилган ишоралари туфайли асирларга яхшилик қилиш бўйича шаръий қоидаларга яна бири қўшилган.
Савда бинти Замъа онамиз «Батаҳқиқ, сизларга ҳожатларингиз учун чиқишга изн берилди» ояти нозил этилишига сабабчи бўлган. Савда онамиз бетакрор хислатлари, тақво, сахийлиги билан ажралиб турарди.
Умар (розияллоҳу анҳу) уларга бир хуржун дирҳам юборганларида, уларнинг ҳаммасини тарқатиб юборган. Ғазотда иштирок этиб, Хайбарни фатҳ қилинишига гувоҳ бўлган.
Ҳазрат Савда Расулуллоҳ (соллаллоҳу алайҳи ва саллам)дан кейин, ҳазрати Умар(розияллоҳу анҳу)нинг халифалик даврида вафот этган. Бу пайтда у чамаси саксон ёшда бўлган.
Савда онамиз Расулуллоҳ (соллаллоҳу алайҳи ва саллам)дан бешта ҳадис ривоят қилган. Улардан бирини Имом Бухорий ривоят қилган.
Марям АБДУЛЛАЕВА,
Ўзбекистон мусулмонлари идораси
Хотин-қизлар масалалари бўйича
бўлим мутахассиси
“Мобил масжид”га 45 давлатдан буюртма тушди
Аввалроқ, япониялик мутахассислар томонидан турли йирик мусобақалар пайтида мусулмон мухлислар учун қулайлик яратувчи мобил масжид лойиҳаси ишлаб чиқилгани ва бу лойиҳа бугунги кунда амалга оширилиш жараёнида экани ҳақида хабар берган эдик.
2020 йили Токиода бўлиб ўтадиган олимпиада ўйинлари пайтида фойдаланиш учун ишлаб чиқарилган “мобил масжид”га дунё бўйича қизиқиш юқори бўлди ва ҳозиргача 45 давлатдан буюртма келиб тушган.
ВВСга таяниб Азон нашрининг хабар беришича, “мобил масжид”лардан 2022 йилда Қатарда ўтказиладиган футбол бўйича жаҳон чемпионатида ҳам фойдаланиш режалаштирилган.
Ташқи кўринишидан оддий юк машинасидан фарқ қилмайдиган “мобил масжид”нинг ён деворлари очилиб, бир пайтнинг ўзида эллик киши намоз ўқиши учун имконият пайдо бўлади. Шунингдек, “мобил масжид”нинг тўрт кишилик таҳоратхонаси ҳам бор. “Мобил масжид”ни тайёрлаш 890 минг долларга тушди.
Ишлаб чиқарувчи фирма ушбу лойиҳани сайёҳлик минтақалари ва халқаро тадбирларда ҳам қўллашни ният қилган.
Ўзбекистон мусулмонлари идораси Матбуот хизмати
Сукут сақламоқ - гапирмоқ
Ақлли бир йигит бўлиб, унинг ўрганишга бўлган иштиёқи ниҳоятда баланд эди. Ва бу қизиқиш ортидан турли хил илмларни ўрганди. Йигит айни чоғда гўзал бир табиатга соҳиб эди. Жуда кўп мажлисда қатнашар, аммо бўлар бўлмас гапларга қўшилмасди. Қаерда, қачон, қандай гапиришга эътибор берарди. Яна бир мажлисга йиғилдилар. Отаси ҳам ёнида эди. Жуда узун суҳбат бўлди, аммо йигит гапга аралашмади. Бу ҳолат отаси эътиборини тортди. Мажлис тугаши билан:
- Ўғлим! - деди. - Сен ҳам билган нарсаларинг билан нега баҳсга қўшилмадинг?
Йигит жавоб берди:
- Қўрқувдан, отажоним. Билмаганларимни сўраб қолишса жуда уяламан! Доноларнинг, "Сен гапирмагунингча ҳеч кимнинг сен билан иши йўқдир. Аммо, гапиришинг билан сўзингни далилини келтиришинг керак бўлади", - деганларини эшитмаганмидингиз?
Ҳикмат
Гапириш фойдали ва чиройли нарса бўла олади. Аммо сукут ундан яхшидир. Чунки гап инсон бошига бир талай ишларни сола билади.
"Гулистондан жавоҳирлар" китобидан
Ёш дипломатларнинг маҳорат дарслари
Туркиянинг Истамбул шаҳри Ислом давлатлари иқтисодий, ижтимоий, амалий машғулотлар ўтказиш ва статистик тадқиқотлар маркази (СИСРК) бугун, 26 ноябрь кунидан бошлаб, 4 кун муддат билан ИҲТга аъзо бўлган давлатлар кичик дипломатларидан иборат вакиллар учун 2-тайёрлов ўқув курсини ташкиллаштиришга мезбонлик қилади.
Мазкур ўқув курсидан ёш дипломатларнинг халқаро соҳадаги савияси ва маҳоратини ошириш, ИҲТнинг халқаро майдондаги ролини ошириш ва ислом оламида рўй бераётган нотинчликларга барҳам беришда ёш дипломатларнинг ҳаракатларини фаоллаштириш мақсад қилинган. Ўқув курсининг очилиш тадбирида Туркия ташқи ишлари вазири Мавлуд Жовишўғлу, СИСРИК ташкилоти Бош директори Ҳамид Ўблуеру маърузалар қилишади.
Шунингдек, ушбу тадбир давомида ИҲТ ва унга тегишли ташкилотларнинг Ислом олами ҳаётида рўй бераётган сиёсий, иқтисодий ва ижтимоий соҳалардаги тартиббузар ҳолатларга барҳам беришдаги ютуқлари ва фаол ишларига ҳам тўхталиб ўтилади.
Истамбулда ўтказиладиган ИҲТ дипломатлари 2- ўқув курсида Туркия ташқи ишлари вазирлигидаги дипломатик Академия раиси, профессор Масъуд Ўзган, Туркия Ташқи ишлари вазирлигидаги стратегик тадқиқотлар маркази раҳбари Уфук Ўлутис, Қишлоқ хўжалиги, савдо ва саноат Палатаси Бош котиби ёрдамчиси Доктор Атия Али, Тарих, фан ва Ислом маданияти маркази мудири ўринбосари Содиқ Жанай ва Ислом тараққиёт банки вакили ўз маърузалари билан иштирок этадилар.
ЎМИ Матбуот хизмати
«Кўнгиллар обод бўлди»
Кеча, 25 ноябрь куни Ўзбекистон мусулмонлари идораси ташаббуси билан Тошкент шаҳридаги “Шайх Зайниддин” (Кўкча) жоме масжидида имконияти чекланган (эшитиш-гапириш қобилияти суст) инсонларнинг Рабиъул аввал ойи муносабати билан “Оламларга раҳмат Пайғамбар!” мавзусида байрам тадбири бўлиб ўтди.
Айтиш жоизки, бу тур тадбир нафақат ўлкамизда, балки бутун дунё миқёсида олиб қараганда ҳам ҳали кузатилмаган эди.
Байрам тадбирига Дин ишлари бўйича қўмита, Тошкент шаҳар ҳокимияти, Ўзбекистон Карлар бошқаруви жамияти, Ўзбекистон кўзи ожизлар жамияти ва бошқа ташкилотлардан меҳмонлар таклиф қилинди. Унда 200 га яқин имконияти чекланган фуқаролар қатнашди.
Бу тадбирдан кўзланган асосий мақсад имконияти чекланганларнинг муқаддас динимизни ўрганишга бўлган эҳтиёжларини қондириш, бу борадаги иштиёқларини қўллаб-қувватлаш, уларга Пайғамбаримиз Муҳаммад алайҳиссаломнинг сийратларини танштириш орқали Ислом динининг инсонпарвар ғояларини тарғиб қилиш ва шу орқали ёт ғояларга барҳам беришдир. Шунингдек, шундай тадбирлар орқали ногиронлиги бўлган шахсларнинг ижтимоий фаолликларини ошириш, уларни ёлғизлик тушкунлигидан асраш, жамиятда фуқаролар тенглиги устуворлигини таъминлаш ҳам кўзда тутилган.
Тадбир жуда ҳам кўтаринки руҳда ўтди. Бошловчиликдан тортиб, тиловат, дуо, суҳбат, байтхонлик ва якуний сўзларгача барча чиқишлар имконияти чекланган кишилар тарафидан ижро этилди. Тадбир барча иштирокчиларда чуқур таассурот қолдирди.
Эшитиш ва гапириш қобилияти чекланган бу инсонларнинг байрам тадбиридаги чиқишларини кўриб тўлқинланмаган киши бўлмади. Уларнинг синиқ кўнгилларини кўтариб, дилларига хурсандчилик улашиш ҳар бир виждонли инсон учун ҳузурбахш ва улуғ савобли амаллардан эканида шубҳа йўқ.
Кечаги ва бугунги тадбирларнинг энг муҳим жиҳати шундаки, улар орқали ўнлаб, балки юзлаб кўнгли яримта, қалби ўксик кишиларимизга шодлик улашилди, хонадонларига хурсандчилик кириб борди. Расулуллоҳ соллаллоҳу алайҳи васаллам бир ҳадисларида: «Аллоҳ таолога фарзлардан кейинги энг севимли амал мусулмоннинг қалбига хурсандлик киргизишдир», деганлар.
Ҳазрат Алишер Навоий айтадилар:
Кимки бир кўнгли бузуқнинг хотирин шод айлагай,
Онча борким, Каъба вайрон ўлса, обод айлагай.
Ҳа, иншооллоҳ, бу тадбирлар орқали қанчадан‑қанча вайрон бўлган кўнгиллар обод бўлди, десак, хато бўлмайди.
Ҳасанхон Яҳё Абдулмажид