Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг ташаббуси билан мамлакатимиздаги “Қуръони карим ва тажвид” ўқув курслари фаолиятини такомиллаштириш борасида тизимли ислоҳотлар амалга оширилмоқда.

Шу мақсадда “Қуръон ва тажвидни ўргатиш” бўлими томонидан ўқитувчи ва масъул ходимлар учун маҳорат оширишга қаратилган туркум онлайн дарслар ташкил этилган эди. Жорий йилнинг 28 январь куни мазкур силсилавий дарсларнинг навбатдаги машғулоти бўлиб ўтди.

Zoom платформаси орқали ташкил этилган машғулотда Ўзбекистон мусулмонлари идораси раиси ўринбосари Муҳаммадолим домла Муҳаммадсиддиқов ҳамда Дин ишлари бўйича қўмита масъул ходими Элёр Алимқулов иштирок этдилар. Улар соҳа мутахассисларига таълим сифатини ошириш ва иш жараёнини тўғри ташкил этиш бўйича зарур тавсиялар бердилар.

Дарснинг асосий қисмида бўлим бошлиғи Шайх Алижон қори Файзуллоҳ Махдум “Қуръони карим шафоати” китоби асосида илмий маъруза қилди. Таъкидлаш жоизки, келгусида дарсларда фаол иштирок этган ва билимларини муваффақиятли намойиш қилган тингловчиларга ушбу китоб бўйича махсус ижоза берилиши режалаштирилган. 

AlQuranuz