Шу йилнинг 27 январь куни Миср Араб Республикасининг Қоҳира шаҳрида “Ал-Азҳар” мажмуаси қошидаги Имом Ашъарий маркази томонидан биринчи халқаро илмий форум ташкил этилди.
Анжуман “Имом Ашъарийнинг исломий фирқаларга оид фикрий ёндашувлари: ақидавий ихтилофдан мулоқот ва мўътадиллик сари” мавзусига бағишланиб, унда ислом оламининг етук уламолари ва тадқиқотчилари иштирок этди.
Форумда Имом Бухорий номидаги Тошкент ислом институти вакиллари, жумладан, институт ректори Уйғун домла Ғафуров ва “Ҳадис ва ислом тарихи фанлари” кафедраси катта ўқитувчиси Фахриддин домла Маманасиров фаол қатнашди.
Тадбир очилиш маросимида Ал-Азҳар ва Имом Ашъарий маркази раҳбарлари, Миср муфтийси ҳамда халқаро илмий муассасалар вакиллари сўзга чиқди.
Мазкур форум ислом оламида илмий ҳамкорликни мустаҳкамлаш, маърифат орқали мўътадилликни тарғиб этиш ва соф ислом ақидасини қўллаб-қувватлашга хизмат қилмоқда.
Ўзбекистон мусулмонлари идораси
Матбуот хизмати
Ўзбекистон мусулмонлари идораси хотин-қизлар бўлими томонидан отинойилар иштирокида “ZООМ” платформаси орқали ўқув семинарлари ўтказиш йўлга қўйилди. Бунда ақида, фикҳ, сийрат, ҳадис, мавлид ва жаноза масалалари тўғрисида тушунчалар бериб борилади.
Бугун, 29 январ куни тизимда фаолият олиб бораётган отинойилар учун Ақида ва фикҳ фанлари доирасида ўқувлар бошланди. Икки мингдан зиёд тингловчи қатнашган, “Ислом шариатида поклик масалалари” деб номланган илк машғулотни "Хадичаи Кубро" аёл-қизлар ўрта махсус ислом таълим муассасаси катта ўқитувчиси Одинахон Муҳаммад Юсуф ўтказди.
Ўқув машғулотларини Фатво маркази мутахассислари, “Имом Бухорий” номидаги Тошкент ислом институти ва "Хадичаи Кубро" аёл-қизлар ўрта махсус ислом таълим муассасаси катта ўқитувчилари олиб бориши режалаштирилган.
Ўзбекистон мусулмонлари идораси
Матбуот хизмати