Samarqand shahar Bog'ibaland mahallasi hududida joylashgan Ho'ja Ishoqi Vali masjidi yonida Ho'ja Ishoqi Vali ziyoratgohi barpo etiladi. Bu haqda viloyat turizmni rivojlantirish departamenti boshlig'i Dilshod Narziqulov ma'lum qildi.

Unga ko'ra, viloyatda turizm sohasini yanada rivojlantirish maqsadida 2020 yil davomida umumiy qiymati 306,6 milliard so'mlik 74 ta investitsion loyiha amalga oshirildi, 763 nafar yangi ish o'rinlari yaratildi. Jumladan, 17 ta mehmonxona, 29 ta oilaviy mehmon uyi, 3 ta xostel, “turizm qishlog'i”, “turizm ko'chasi”, 9 ta ekoturizm maskani tashkil etildi.

Sayyohlarning belgilangan turizm manzillariga qulay, xavfsiz hamda yuqori sifatli servis ko'rsatilgan holda etib borishlari, erkin sayyohlarga qulaylik yaratish maqsadida Samarqand shahri markazi, temiryo'l vokzali, aeroport va avtovokzallarda turizm bekatlari tashkil etiladi. Samarqand temiryo'l vokzalida shunday bekat faoliyat boshladi.

“Zarafshon” gazetasi xabar berishicha, o'tgan yil respublikamizdagi ilk turizm qishlog'iga aylantirilgan Samarqand tumanidagi “Konigil turizm qishlog'i”da bu yil ikkinchi bosqichda qurilish-bunyodkorlik ishlari amalga oshiriladi. Hozirda bu erda 92 ta turistik ob'ekt va xizmat ko'rsatish nuqtalari tashkil etish bo'yicha amaliy ishlar boshlandi. Umumiy uzunligi 2,2 kilometr, maydon 7,1 gektar bo'lgan hudud tanlab olindi. Ushbu hudud lotlarga ajratilgan holda hunarmand va tadbirkorlarga taqdim etiladi.

Samarqand eshkak eshish kanali atrofida tashkil etilayotgan turistik markazdan Konigil turizm qishlog'i bo'ylab Registon maydonigacha bo'lgan hududda piyodalar yo'lagi va veloyo'laklar tashkil etish ko'zda tutilgan. Bu ham mahalliy aholi va sayyohlar uchun katta qulaylik bo'ladi.

Bugungi murakkab sharoitda mazkur loyihalarni o'z vaqtida va sifatli amalga oshirish, ushbu jarayonda tadbirkorlik sub'ektlarini qo'llab-quvvatlash maqsadida byudjetdan tashqari turizm sohasini qo'llab-quvvatlash jamg'armasi mablag'lari hisobidan turizm sohasidagi “startap” loyihalar va innovatsion biznes g'oyalarni, shu jumladan, birinchi navbatda turistlar uchun qulayliklar yaratishga yo'naltirilgan axborot dasturlari va xizmatlari 1,5 milliard so'm miqdorida qisman subsidiyalanadi. Shuningdek, 2020 yil 1 iyundan 2021 yil 31 dekabrga qadar bo'lgan davrda yangi turizm mahsulotlari va yo'nalishlarini ishlab chiqish va targ'ib qilishga gidlar uchun 5 million so'm, turoperatorlar uchun 10 million so'm miqdorida grantlar ajratish orqali qo'shimcha ko'mak ko'rsatilishi ko'zda tutilgan.

O'zbekiston musulmonlari idorasi matbuot xizmati