NAZM

Ilm sifatig'a ishoratdur

Yana biri ilmdur sifatlaridin,

Olimul-g'ayb bo'ldi otlaridin.

Fikru andishadin emas bu ilm,

Kasb ila peshadin emas bu ilm.

Tog'da tosh, tuzda qum adadlarini,

Anga zohir durur, bilur barini.

NASRIY BAYoN

1. Ilm sifatiga ishorat

Allohning sifatlaridan yana biri ilm sifatidir. Uning nomlaridan biri Olimul-g'ayb – g'aybni, olam ahliga noma'lum va pinhon bo'lgan narsalarni mukammal biluvchidir. (Ya'ni, Alloh ta'olo zamon va makondan xoli holda, mavjud va nomavjud – bo'lgan va bo'ladigan narsalarni, katta-kichik – kull va juz' (butun va bo'lak, mumkin va nomumkin), yashirin va oshkor hamma narsani va har bir hodisani  eng  yaxshi  tarzda  biluvchi  va  butun  bilimlarning  manba'i  bo'lgan Zotdir.)

Bu ilm fikr va andishadan – xayol, mulohaza va tasavvurdan emas, shuningdek, kasb bilan peshadan – mehnat qilib birovdan olinadigan, urinish, tirishish bilan egallanadigan ilm ham emas.

Tog'dagi  (kattayu  kichik)  toshlar,  cho'ldagi  qumlarning  sanoqlari ham Allohga ma'lumdir, U zot barchasini mukammal biladi.

Nasriy bayon va sharh muallifi:

Mirzo KYeNJABYeK