Cavol: Tobut ortidan yurish afzalmi yoki oldidami? Shunga bog‘liq masalalarni bayon qilsangiz. 

Javob: Tobut ortida yurish afzaldir. Tobutning o‘ng yoki chap tomonida yurilmaydi (“Fathul-qadir”). 

Vafot etgan kishi qo‘shni, qarindosh yoki yaxshiligi bilan tanilgan inson bo‘lsa, uning tobuti ortidan borish nafl ibodatdan afzaldir (“Bahrur-roiq”). 

Biror ulovda tobutning ortidan borayotgan kishi undan o‘tib ketishi makruhdir (“Fatovoyi Qozixon”). 

Tobut ortidan borayotganlar jim, so‘zlashmay borishlari lozim. Ovozlarini chiqarib Qur’on o‘qishlari va zikr qilishlari makruh. 

Zikr qilishni xohlagan kishi ichida zikr qilishi mumkin (“Sharhi Tahoviy”; “Fatovoyi Qozixon”).

“So‘ragan edingiz” kitobi asosida tayyorlandi

O‘MI Matbuot xizmati