Шу йил 18 октябрь куни Ўзбекистон мусулмонлари идорасига Ислом тараққиёт банки мутахассислари Ҳолид Жавоҳир ва Муҳаммад Аҳмад Салим ташриф буюрди.
Меҳмонларни Дин ишлари бўйича қўмита раисининг биринчи ўринбосари Давронбек Махсудов ҳамда Ўзбекистон мусулмонлари идораси раиси ўринбосари Иброҳимжон домла Иномов кутиб олди.

Учрашув аввалида Давронбек Махсудов меҳмонларни ташриф билан қутлаб, уларга мамлакатимизда диний-маърифий соҳада амалга оширилаётган хайрли ишлар, Диний қўмита фаолияти ҳақида сўзлаб берди.

Сўнгра Иброҳимжон домла меҳмонларни ташриф учун миннатдорчилик билдириб, ҳозирда Ўзбекистон мусулмонлари идораси раиси, муфтий Нуриддин домла Холиқназаров Мисрдаги нуфузли халқаро анжуманда эканликларини айтиб, салом ва дуоларини етказди. Шундан сўнг Диний идора мақсад ва вазифалари, фаолияти, бўлимлари ҳақида сўзлаб берди.

Шундан сўнг Ўзбекистон мусулмонлари идорасига Ислом тараққиёт банки мутахассислари Ҳолид Жавоҳир ва Муҳаммад Аҳмад Салимлар Ўзбекистонга катта делегация бўлиб ташриф буюришгани, мамлакатимиз билан кўп йиллардан буён ҳамкорлик алоқаларини йўлга қўйилгани, мазкур ташриф мақсад ҳамкорлик алоқаларини янада жадаллаштириш, “Вақф” хайрия жамоат фонди билан яқин ҳамкорлик қилиб, биргаликда катта лойиҳаларни амалга ошириш эканини таъкидлашди.

Учрашув давомида “Вақф” хайрия жамоат фонди вазифасини бажарувчи Музаффар Саломов Фонд фаолияти, бўлимлари, амалга оширилаётган хайрия ишлари, халқаро ташкилотлар билан яхшилик йўлидаги ҳамкорлик алоқалари ҳақида маълумот беришди.

Самимий мулоқот давомида ўзаро ҳамкорлик масалалари, яқин келажакда амалга ошириладиган истиқболли лойиҳалар муҳокама қилинди. Ана шундай учрашувларни тез-тез ўтказиб туришга келишиб олинди.

Маълумот учун, Ислом тараққиёт банки (ИТБ) 1973 йил 18 декабрда Ислом Конференсияси Ташкилотига (ИҲТ) аъзо давлатлар молия вазирлари йиғилишида ташкил этилган ва 1975-йил октабрь ойида ўз фаолиятини бошлаган.

ИТБ штаб-квартираси Саудия Арабистони Подшоҳлигининг Жидда шаҳрида жойлашган. Банкнинг Работ (Марокаш), Куала-Лумпур (Малайзия), Олма-ота (Қозоғистон) ва Дакар (Сенегал) шаҳарларида 11 та ваколатхонаси ва 4 та ҳудудий бўлимлари мавжуд.

Тараққиёт ва ижтимоий соҳани ривожлантиришга қаратилган умумий мақсадларга мувофиқ, Банк аъзо мамлакатларнинг давлат, ҳам хусусий секторларида самарали лойиҳаларни молиялаштиради. У иқтисодий соҳага сармоя киритади ва ижтимоий инфратузилма лойиҳалари, аъзо мамлакатларга техник ёрдам кўрсатади ва халқаро савдони ривожлантиради.

ИТБ аъзо мамлакатлардаги ривожланиш лойиҳаларини ислом тамойилларига мувофиқ, лизинг, бўлиб-бўлиб сотиш, истисно, акциядорлик иштироки, молиялаштириш тармоқлари каби бир неча усуллари орқали молиялаштиради.

Ўзбекистон мусулмонлари идораси Матбуот хизмати

Шу кунларда Қоҳира шаҳрида бўлиб турган Ўзбекистон мусулмонлари идораси раиси, муфтий Нуриддин домла ҳазратлари Мисрнинг “Ал-Азҳар” мажмуаси ҳузуридаги Ислом тадқиқотлари академияси Бош котиби Назир Муҳаммад Айёд жаноблари билан учрашдилар. Мулоқотда Ўзбекистоннинг Мисрдаги элчиси Мансурбек Қиличев ва бошқа мутасаддилар иштирок этди.

Ўзбекистон ва Миср халқларининг муштарак урф-одатларини Ислом дини қадриятлари бир-бирига боғлаб туради. Минг йиллар давомида Самарқанд, Бухоро ва Хивадаги мадрасалар каби Мисрнинг қадимий “Ал-Азҳар” диний таълим даргоҳи ҳам Шарқ ва Ғарб халқлари учун етакчи зиё маскани ҳисобланади.

“Ал-Азҳар” мажмуаси раҳбари Шайх Аҳмад ат-Тоййиб ҳазратларининг 2018 йил октябрь ва 2020 йил март ойларида Ўзбекистонга ташрифи доирасида эришилган келишувлар диний-маърифий муассасалар ўртасида илм-фан, таълим ва дин соҳасидаги алоқаларни мустаҳкамлашга хизмат қилмоқда.

Мулоқотда Назир Муҳаммад Айёд жаноблари икки мамлакат халқларини имоний биродарлик, бир дин, бир мазҳаб ва гўзал муомала каби ришталар чамбарчас боғлаб туришини алоҳида таъкидлади. Шунингдек, бош котиб Ўзбекистоннинг Мисрдаги элчихонаси билан ҳамкорликда маърифий табирлар ўтказилаётгани, хусусан, Имом Мотуридий мероси бўйича мусобақа ташкил этилгани, қўлёзмаларни ўрганиш ишлари олиб борилаётгани, ўзбекистонлик тадқиқотчилар мақолаларини Миср нашрларида чоп этиш, Азҳари шариф нашрларини Ўзбекистонга жўнатиш каби йўналишларга алоҳида урғу қаратди.

“Ал-Азҳар”нинг Ислом тадқиқотлари академияси бош котиби Президент Шавкат Мирзиёев раҳбарлигида қатор жабҳаларда, хусусан диний ва дунёвий таълим ҳамда илм-фан ривожига йўналтирилган ислоҳотларни юқори баҳолади. Ўтган қисқа вақт ичида ушбу йўналишларда эришилган муҳим натижалар ва кўзланган истиқболли режалар барчада катта кизиқиш уйғотаётганини маълум қилди.

Муфтий Нуриддин домла ҳазратлари «Ал-Азҳар» мажмуаси вакиллари билан диний-маърифий, илмий тадқиқот ва диний соҳа вакиллари малакасини ошириш борасида ўз фикр-мулоҳазаларини билдирдилар.

Учрашувда Назир Муҳаммад Айёд жаноблари томонидан ушбу мажмуа кутубхоналарида сақланаётган жами 49 минг 361 қўлёзма адабиёт рўйхати келтирилган 28 китобдан иборат янгиланган жамланма ҳамда айнан шу ноёб нашрлар бўйича тафсилотларни ўз ичида олган 50 GB ҳажмидаги электрон файллар 8 та CD-дискда тегишли дастурий таъминот иловаси билан бирга Ўзбекистон элчихонасига тақдим этилгани билдирилди.

Ўзбекистон мусулмонлари идораси Матбуот хизмати

Мамлакатимизнинг Куала-Лумпурдаги элчихонаси кўмагида Малайзия Ислом тараққиёти департаменти (JAKIM) бош директори Ҳакима Моҳд Юсуф ва ушбу мамлакатда бўлиб турган Бухоро вилояти делегацияси вакиллари ўртасида учрашув ташкил этилди, деб хабар бермоқда «Дунё» АА мухбири.
Унда Ўзбекистон Техник жиҳатдан тартибга солиш агентлигини ҳалол сертификати бериш бўйича расмий орган сифатида аккредитациядан ўтказиш ва бу борада Малайзиянинг илғор тажрибасини жорий этиш юзасидан ҳамкорликни йўлга қўйиш масалалари муҳокама қилинди.
Малайзия Ислом тараққиёти департаменти (JAKIM) синов лабораторияларини аккредитация қилувчи («HALAL» сертификатини берувчи) ва уларнинг фаолиятини сертификатловчи давлат органи ҳисобланади. JAKIM таркибида “Latihan Islam” институти ташкил этилган. Институт синов лабораториялари ходимлари учун ISO стандартлари ва «Halal» сертификатлаш тизимини жорий этиш бўйича малака ошириш курсларини ташкил қилади.
Бугунги кунга қадар JAKIM сертификатлари Малайзияда тан олинган дунёнинг 46 давлатининг миллий сертификатлаштириш органлари билан ҳамкорликни йўлга қўйган.
Музокаралар давомида Малайзия томонига Ўзбекистонда техник жиҳатдан тартибга солиш, стандартлаштириш, сертификатлаштириш ва метрология соҳаларида амалга оширилаётган таркибий ўзгаришлар, уларни халқаро стандартларга мослаштириш, стандартлардан кенг фойдаланиш учун муҳит яратиш, шунингдек, мувофиқликни баҳолаш жараёнларига замонавий усулларни жорий этиш бўйича кўрилаётган чора-табирлар ҳақида батафсил маълумот берилди.
Малайзия томони Ўзбекистонлик шериклар билан ҳамкорликни йўлга қўйиш ва ривожлантиришдан, шунингдек, Бухоро вилоятида Ҳалол сертификатлаштиришни амалга ошириш бўйича мутахассислар марказини («Centre of Excellence») очиш таклифини кўриб чиқишдан манфаатдор эканлигини билдирди.
Учрашув якунлари бўйича JAKIM Ислом тараққиёти департаментига Ўзбекистоннинг расмий аризасини топшириш ва Малайзия томони билан биргаликда Ҳалол сертификатлаштиришни амалга ошириш бўйича мутахассислар маркази («Centre of Excellence») ташкил этиш бўйича келишувларга эришилди.

Ўзбекистон мусулмонлари идораси матбуот хизмати

(2022 йил 17-18 октябрь, Қоҳира шаҳри)