“Ҳаж – 2027” мавсумига тайёргарлик кўриш ҳамда юртдошларимиз учун муносиб шароитлар ҳозирлаш мақсадида, Саудия Арабистонида мутасадди идоралар билан учрашувлар ўтказилмоқда. Ушбу муборак заминда хизмат сафарида бўлиб турган Президент маслаҳатчиси Музаффар Комилов, Дин ишлари бўйича қўмита раиси Содиқжон Тошбоев, муфтий Шайх Нуриддин Холиқназар ҳазратлари, Вазирлар Маҳкамаси масъул ходими Орифхон Закиров, атташе Шуҳрат Амоний қатор ташкилотлар, жумладан, “Тавофа” ҳаж хизматлари муассасаси вакиллари билан муҳим учрашувлар ўтказдилар.

Мулоқот аввалида томонлар икки мамлакат раҳбарларининг саъй-ҳаракатлари натижасида Ўзбекистон ва Саудия Арабистони ўртасидаги ҳамкорлик алоқалари янги босқичга кўтарилганини, хусусан, ҳаж ва умра зиёратчилари учун кўрсатилаётган хизматлар савияси юксак даражага чиққанини алоҳида эътироф этдилар.

Музокаралар давомида бўлажак ҳаж мавсумида кутиб олишдан то кузатишгача бўлган жараёнларда, хусусан, ҳаж амаллари бажариладиган Мино, Арафот ва Муздалифа водийларида ҳожиларимизга муносиб хизмат кўрсатиш ҳамда уларнинг ҳар бир дақиқасини руҳий ҳузур ва ибодатда ўтказишлари учун зарур шарт-шароитларни яратиш масалалари юқори талаб нуқтаи назаридан атрофлича муҳокама қилинди.

Ўз навбатида, “Тавофа” муассасаси вакиллари келгуси мавсум учун муборак масканларда шинам чодирлар ташкил этиш, транспорт ва озиқ-овқат таъминотини янада такомиллаштириш, коммунал хизматлар сифатини ошириш ҳамда санитария-гигиена талабларига қатъий риоя этиш бўйича аниқ вазифалар белгилаб олдилар.

Жумладан, ушбу водийларда ҳар бир зиёратчи учун етарли жой ажратиш, чодирларни тайёрлаш, уларни “Sofa bed”, совуткич ҳамда бошқа зарур маиший қулайликлар билан жиҳозлашга катта эътибор қаратилади. Шунингдек, ҳожиларимиз учун зарур бўладиган маиший ашёлар жамланмаси тақдим этиш ҳамда уларни уч маҳал иссиқ таом, мунтазам чой ва салқин ичимликлар билан таъминлаш масаласига ҳам алоҳида урғу берилди.

Мулоқотда ҳаж инсон умрида бир марта адо этиладиган улуғ ибодат эканини инобатга олиб, зиёратчилар муборак амалларни динимиз аҳкомларига мувофиқ гўзал тарзда бажаришлари учун барча шароитларни ҳозирлаш зарурлиги алоҳида таъкидланди.

Бу каби саъй-ҳаракатлар замирида битта улуғ мақсад – ҳар бир ҳожимизга муносиб эътибор кўрсатиш, уларнинг ибодатларини энг қулай ва хотиржам шароитларда адо этишларини таъминлашдир.

Ўзбекистон мусулмонлари идораси Матбуот хизмати