Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Siz mendan biron narsa haqida: «Bu haqmi yoki botilmi?» deb so‘rasangiz, men shaxsiy fikrimdan kelib chiqib javob bermayman. Bu masalada mening shaxsiy fikrimning hech qanday qiymati yo‘q!

Ummat shu o‘n to‘rt asr davomida qaysi yo‘lni e’tiborli sanab, unga suyangan va shu yo‘lda yurib kelgan? Ana shu yo‘l haq yo‘ldir, chunki hadisda aytilganidek, bu ummat zalolatda jam bo‘lmaydi. Dinning saqlanib kelayotgani ham bu ummat yurgan yo‘lning to‘g‘ri bo‘lishini taqozo etadi. Bizning eng afzal ummat ekanimiz ham haqligimizga dalolat qiladi. Bu ummat a’zolari bu yo‘ldan yakka-yakka emas, balki yakdil bo‘lib yurdi, turli yurtlardagi aksar ulamolar barcha zamonlarda shu yo‘ldan yurishga ittifoq qilib kelishdi. Demak, haq yo‘l faqat shudir.

Demak, yuradigan yo‘limizdagi, ilmni o‘rganish va o‘rgatishdagi asosimiz tarixda butun ummatning yurgan yo‘li, ijmo’si va manhaji bo‘lishi kerak, chunki bu ummat zalolat va botil uzra jam bo‘lmaydi. Biz aytmoqchi bo‘lgan qoida mana shu edi. Bu boradagi dalillar haqida, ijmo’ning hujjatligi haqida ko‘proq ma’lumot olishni istaganlar fiqh kitoblariga murojaat qilishlari mumkin.

Professor, shayx Saloh Abul Hoj hazratlari
«Hanafiy mazhabiga teran nigoh» kitobidan