Бугун, 12 январь куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков Россия Федерациясининг Мордовия Республикаси муфтийси Раиль ҳазрат Асаиновни қабул қилди. 

Самимий руҳда ўтган учрашувда Ҳомиджон домла мартабали меҳмонга Диний идора фаолияти, кейинги пайтларда йўлга қўйилган Фатво маркази фаолияти, бўлимлар, нашриёт, ҳазрати Имом даҳасида жойлашган тарихий ва замонавий обидалар ҳақида сўзлаб берди.

Ўз навбатида, Раиль ҳазрат Асаинов дўстона қабулдан мамнун бўлганини изҳор этиб, Ўзбекистонга бўлган эҳтироми бўлакча экани, бу юртни нафақат Имом Бухорийнинг ватани, балки илмий ноёб асарлар макони сифатида қадрлашини айтиб ўтди.

Томонлар илм-маърифат ва Ислом равнақи йўлида ҳамкорлик қилишда ҳамфикр эканини билдириб, бундан кейинги халқаро илмий-амалий анжуманларда янада яқин алоқалар ўрнатиш борасида сўз юритишди. 

Учрашув якунида Раиль ҳазрат Асаиновга Ўзбекистон мусулмонлари идорасининг эсдалик ҳадяси топширилди.

Маълумот ўрнида, Мордовия Республикаси мусулмонлари Диний бошқармаси 2000 йилда ташкил этилган. Ташкилот Россия Федерацияси мусулмонлари диний бошқармаси марказлашган диний ташкилоти таркибида фаолият юритади. Бошқарма таркибига Мордовия Республикаси ҳудудида жойлашган 30 та маҳаллий диний ташкилот киради. Раиль ҳазрат Асаинов ушбу ташкилотга 2023 йилдан бери раҳбарлик қилиб келмоқда.

Ўзбекистон мусулмонлари идораси 
Матбуот хизмати