Бисмиллаҳир Роҳманир Роҳийм
Ҳаётдан олган дарсларим:
Ҳаётда мен билан фақат Аллоҳнинг Ўзи бор;
Қоқилсам — Аллоҳ мени суяйди;
Бемор бўлсам — Аллоҳ шифо беради;
Муҳтож бўлсам — Аллоҳ ҳожатимни чиқаради;
Гуноҳ қилсам — Аллоҳ мағфират қилади.
Шунинг учун қўрқмайман, хавотирга тушмайман, ғам чекмайман — чунки Роббим Аллоҳ бор.
Мени ларзага солган ибора:
Бомдод намози худди урушдек — унда фақат мардларгина бўлади.
Агар сиз бомдод намозини вақтида ўқимайдиганлардан бўлсангиз, тўхтанг, ҳаётингизни қайта кўриб чиқинг ва тезда ислоҳ қилинг.
Чунки Аллоҳ бомдодга фақат Ўзига яқин ва хос бўлган бандаларини уйғотади.
Агар сизнинг биринчи қарорингиз — бомдод намозига вақтида туриш бўлмаса, куннинг қолган режаларининг қиймати йўқ.
Чунки сиз муваффақиятнинг бошланишини йўқотдингиз.
Пайғамбаримиз соллаллоҳу алайҳи васаллам айтадилар: “Эй Абдуллоҳ, фалончи каби бўлма, у тунлари ибодат қилар эди, кейин тарк қилди”.
Солиҳ зотлардан бири айтади: “Агар тунги ибодат бўлмаганида, бу дунёда қолишни истамаган бўлар эдим”.
Бомдод_намози — муаммолар ечимининг калити, мўъжизалар дарвозаси, имконсизликнинг давосидир.
Аллоҳдан сўрайдиган эҳтиёжингиз борми?
Туннинг охирги учдан бирида туринг, тунги намозни ўқинг, сажда қилиб, эҳтиёжингизни сўранг, сўнг қаранг — қандай қилиб ато этилишини.
Ё Роббим…
Бандаларинг орасида хавотири уйқусини қочирган, ғам-қайғулари чарчатган, ташвишлари елкаларини эзганлари бор.
Улар Сенинг ёрдамингни кутмоқда, карамингдан умид қилмоқда, меҳринга муштоқ бўлмоқда. Роббим, уларни кенг раҳматингдан, улкан фазлингдан ва мағфиратингдан маҳрум этма.
Ҳомиджон қори ИШМАТБЕКОВ
Cавол: Рамазон ойидан кейин тутиладиган олти кунлик рўза ҳақида батафсил маълумот берcангиз. Олдиндан раҳмат.
Жавоб: Бисмиллаҳир Роҳманир Роҳийм. Рамазон ойидан кейин ҳижрий-қамарий тақвимнинг ўнинчи ойи ҳисобланадиган Шаввол келади. Ушбу ой ҳам фазилатли ва баракотли ойлардандир. Айниқса бу ойда соғлиғи ва имкони бор кишилар нафл рўза тутсалар, кўплаб ажру-савобга эга бўлишлари ваъда қилинган. Жумладан Абу Айюб Ансорий розияллоҳу анҳудан ривоят қилинган ҳадиси шарифда Пайғамбаримиз соллаллоҳу алайҳи васаллам бундай деганлар: “Ким Рамазон рўзасини тутиб, ортидан шаввол ойидан олти кун рўза тутса, йил бўйи рўза тутгандек бўлади” (Имом Муслим, Имом Абу Довуд ва Имом Термизий ривоятлари).
Демак, ушбу ҳадиси шарифга амал қилиб, шавволнинг олти кунида рўза тутган киши умр давомида рўза тутганлик савобини қозонар экан. Зеро, Аллоҳ таоло Қуръони каримда бундай марҳамат қилади: “Кимки (бир) ҳасана (савобли иш) қилса, унга ўн баробар (кўпайтириб ёзилур)...” (Анъом сураси, 160-оят).
Бу олти кунлик рўзани Рамазон ҳайитининг эртасидан бошлаб тутиш мумкин. Шунингдек шаввол ойи давомида тутса ҳам бўлади. Бу ҳақда “Зоҳирийя” ва “Хулоса” номли фатво китобларимизда Шаввол ойидаги олти кунлик рўзани кетма-кет тутилиши шарт эмаслиги, балки ой давомида тутиб ҳам адо этиш мумкинлиги айтиб ўтилган.
Шавволнинг олти кунида рўза тутишнинг яна фойдаларидан бири шуки, у Рамазон рўзасидаги йўл қўйилган камчилик-нуқсонларга каффорат бўлади. Зеро беайб – Парвардигори олам! Банда камчилик ва хатолардан холи эмас. Бу – худди фарз намозлар ортидан ўқилган суннат намози кабидир. Ушбу суннатлар фарзда билиб-билмай йўл қўйилган камчиликларни бартараф қилади. Қиёмат куни банданинг нафл ибодатлари унинг фарз-вожиб амалларда йўл қўйган нуқсонларини тўлдиради.
Қолаверса, шавволнинг олти кунида рўза тутиш ўз моҳияти билан мусулмон кишининг рўзадан зерикмаганига, балки унга рағбати кучли эканига далолат қилади. Зеро, бу ойдаги рўзанинг ҳикмати ҳақида Аллома Ибн Ражаб раҳимаҳуллоҳ бундай деган: “Рамазон ойидан кейин рўза тутиб юришга одатланиш – Рамазон ойи рўзасининг қабул бўлгани белгисидир. Чунки Аллоҳ таоло бандасининг бирор амалини қабул қилса, ундан кейин уни (бошқа) солиҳ, хайрли ишларга бошлайди, давомли қилади”. Валлоҳу аълам.
Ўзбекистон мусулмонлари идораси
Фатво маркази
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 