Уч кун давомида муборак заминда бўлган ҳамюртларимиз, хусусан, "Президент ҳожилари" Расул алайҳиссалом шаҳри — Мадинаи мунавварада тоат-ибодат ва шукроналик ила вақт ўтказдилар. Зиёратчиларимиз дастлаб Масжидул Набавийда, сўнг Равзаи шарифда Расулуллоҳ соллаллоҳу алайҳи васалламга саловот ва саломларини етказишди.
Ишчи гуруҳи ва элликбошилар ҳамроҳлигида юртдошларимиз Мадинадаги табаррук масканларни ҳам зиёрат қилишди. Илк манзил Ислом тарихида машҳур Уҳуд тоғи, кейин биринчи қурилган “Қубо” масжиди бўлди.
Имом-домлалар бўлғуси ҳожиларимиз, жумладан, "Президент ҳожилари"га табаррук жойлар фазилати, бу маконларнинг Ислом тарихида тутган ўрни ва инсонлар руҳий-маънавий оламини янада бойитишдаги ўрни ҳақида гўзал маърузалар қилишди. Шунингдек, ушбу сафардан ҳар ким ибрат олиши лозимлигини таъсирли воқеалар ва ҳаётий мисоллар билан тушунтирилди.
Табаррук қадамжоларда чин ихлос билан эл-юрт тинчлиги, халқимиз фаровонлиги ва фарзандлар бахту камолини сўраб хайрли дуолар қилишди.
Шундан сўнг Мадина шаҳридаги энг сўнгги гуруҳлар зиёратчилари ҳам Макка шаҳри томон йўлга чиқдилар.
Ўзбекистон мусулмонлари идораси
Матбуот хизмати
Шу йилнинг 20 май куни Ўзбекистон мусулмонлари идораси раиси ўринбосари Зайниддин домла Эшонқулов, Диний идора бўлим бошлиқлари ва масъул ходимлари иштирокида Қурбон ҳайитига тайёргарлик кўриш ва уни муносиб ўтказиш бўйича видеоселектор йиғилиши бўлиб ўтди.
Унда Қорақалпоғистон мусулмонлари қозиёти, вилоятлар ва Тошкент шаҳар вакилликлари, юртимиздаги туман-шаҳар бош имом-хатиблари иштирок этди.
Йиғилиш аввалида муҳтарам Президентимизнинг Саудия Арабистонида бўлиб турган Муфтий ҳазратлари билан телефон орқали мулоқотлари, ҳожиларнинг кўтаринки кайфияти ҳақида сўз борди.
Шундан сўнг улуғ айём — Қурбон ҳайити намозини юртимизда уюшқоқлик, юқори тартиб-интизом ва кўтаринки руҳда ўтказиш масалалари муҳокама қилинди. Муфтий ҳазратларининг жойларга етказилган кўрсатма ва тавсияларига амал қилиш, масжидларнинг байрам тадбирларига шайлик ҳолатини кўздан кечириш, намозхонлар учун хавфсизлик ва санитария-гигиена талабларига риоя қилган ҳолда барча шарт-шароитларни яратишга эътибор қаратилди.
Масофавий йиғилишда улуғ айём арафасида меҳр-мурувват ва саховат тадбирларини кенгайтиришга алоҳида эътибор қаратилди. Бу борада ҳудудлардаги эҳтиёжманд оилалар ҳолидан хабар олиш, уларга моддий ва маънавий жиҳатдан далда бўлиш юзасидан имом-хатибларга тегишли топшириқлар берилди.
Шу билан бирга, юртимиздаги қабристон ва зиёратгоҳларни ободонлаштириш, тозалик ишларини кучайтириш ҳамда атроф-муҳитни тартибга келтириш бўйича уюшқоқлик билан ҳашарлар ташкил этиш зарурлиги қайд этилди.
Ўзбекистон мусулмонлари идораси
Матбуот хизмати