XIX xalqaro musulmon forumi Moskvada bo'lib o'tdi. Rossiya Federatsiyasi musulmonlari Diniy idorasi tomonidan tashkil etilgan an'anaviy anjumanda Misr, Qatar, Italiya, Iroq, Eron, Malayziya, Ozarbayjon, Mavritaniya, Afg'oniston, Jazoir, Qozog'iston, Qirg'iziston, Falastin, Suriya, Tunis, Turkiya, Quvayt, Birlashgan Arab Amirligi hamda O'zbekiston davlatlaridan vakillar qatnashdi.

Nufuzli forum "Diniy rahbarlarning ma'naviy-axloqiy qadriyatlarni himoya qilish, tinchlik va xavfsizlikni mustahkamlashdagi o'rni" mavzusida o'tkazildi. Unda 38 ta mamlakatdan 90 dan ziyod muftiylar, islom ulamolari, davlat va din arboblari, siyosatshunoslar, olimlar, elchi va diplomatlar ishtirok etdi.

Halqaro anjumanda O'zbekiston musulmonlari idorasi vakili Ibrohimjon domla Inomov ham qatnashib, “Diniy bag'rikenglik: O'zbekiston misolida” mavzusida ma'ruza qildi.

Ibrohimjon domla o'z chiqishida bayon etgan O'zbekistonda bo'layotgan islohotlar, xususan, diniy sohadagi ulkan o'zgarish va ko'plab yangiliklar anjuman ishtirokchilarida katta qiziqish uyg'otdi.

Halqaro anjuman doirasida O'zbekiston musulmonlari idorasi vakilini Rossiya Federatsiyasi musulmonlari Diniy idorasining raisi, muftiy Shayx Ravil' Gaynuddin qabul qildi.

Samimiy suhbatda Muftiy janoblari O'zbekiston haqida juda iliq so'zlar bilan eslab, o'tgan ulug' ustozlarni yuksak ehtirom va katta hurmat bilan yodga oldi.

Shuningdek, muftiy Shayx Nuriddin Holiqnazar hazratlariga salom va duolar yo'llash barobarida diniy sohada olib borilayotgan xayrli islohotlarga ulkan muvaffaqiyatlar tiladi.






O'zbekiston musulmonlari idorasi
Matbuot xizmati