Шу йилнинг 19-20 январь кунлари Ўзбекистон мусулмонлари идораси раиси, муфтий Шайх Нуриддин Холиқназар ҳазратлари бошчилигидаги уламолар Миср Араб Республикаси Президенти Абдул Фаттоҳ ас-Сиси ташаббуси билан ўтказиладиган халқаро анжуманда иштирок этади.

Миср Вақф вазири профессор Усома Саййид Азҳарий масъуллигида Ислом ишлари бўйича Олий Кенгаш томонидан ташкил этилган анжуманда илм-фан ва касб-ҳунарнинг динимиздаги аҳамияти, жамият тараққиётидаги ўрни ва сунъий интеллект давридаги истиқболи кенг муҳокама қилинади. 

Шунингдек, ислом оламида турли соҳалар, хусусан, иқтисодиёт, тиббиёт, астрономия ва алгоритм, ислом меъморчилиги, кимё, муҳандислик ва бошқа йўналишлардаги амалий ютуқларларнинг дунё тараққиётидаги ўрни таҳлил қилинади. Қолаверса, бугунги кашфиёт ва янгиликлар туфайли юзага келаётган замонавий диний масалаларга биргаликда умумий ечим топиш кун тартибида бўлади. 

Халқаро конференцияда турли давлатлардан келган вазирлар, муфтийлар, олимлар, экспертлар, тадқиқотчилар, дипломатлар ҳамда соҳа мутахассислари қатнашади. 

Ўзбекистон мусулмонлари идораси
Матбуот хизмати