Шояд, бугун бошимга тушган бу ғам,
Кун келар ортидан бўлиб шоду ҳуррам.

Бирор фойдали китоб ўқиш ёки фойдали нарсалар эшитиш орқали ўз устингизда ишланг ва тажрибангизни оширинг. Қуръони каримнинг муаттар тиловатларини жим сокинлик билан тингланг. Гоҳида биргина оят сизнинг вужудингизни тебратиши, ич-ичингизгача етиб бориши ва виждонингизга хитоб қилиши мумкин.

Ҳадис китобларини мутолаа қилинг, суюкли Ҳабибимиз соллаллоҳу алайҳи васалламнинг сўзларини ўқинг ва солиҳлар гулшанига сайр этинг. Аслида, сизнинг давоингиз Қуръон ва суннатда, роҳатингиз иймонда, кўз қувончингиз намозда, қалбингиз саломатлиги розиликда, кўнглингиз хотиржамлиги қаноатда, юзингиз гўзаллиги таббасумда, номусингиз ҳимояси иффатда ва қалбингиз хотиржамлиги зикрдадир. Буни асло унутманг.

Шуъла: Мазлумнинг дуоси ва бечораҳол кишининг кўз ёшидан эҳтиёт бўлинг.

Доктор Оиз ал-Қарнийнинг
"Дунёдаги энг бахтли аёл" китобидан