Яхшилик ва саховат халқимизнинг азалий қадриятларидан ҳисобланади. Ана шу эзгу анъаналар давом эттирилиб, "Вақф" хайрия жамоат фонди Тошкент вилояти филиали томонидан яна бир хайрли иш амалга оширилди.

Тошкент вилояти Янгийўл тумани Деҳқонобод МФЙ, Фаровон кўчаси 21-А уйда яшовчи, ҳозирги кунда Ижтимоий реестрда турувчи фуқаро Хушвақтова Лайлонинг яшаш хонадонлари яроқсиз ҳолга келиб қолганлиги сабабли, унинг икки нафар вояга етмаган фарзанди билан муносиб шароитда яшашини таъминлаш мақсадида янги 4 хонали уй-жой барпо этилди.

Мазкур хонадоннинг фойдаланишга топширилиш маросимида Тошкент вилояти бош имом-хатиби ўринбосари ҳамда "Вақф" хайрия жамоат фонди Тошкент вилояти филиали раҳбари Мусохон домла Бобоев иштирок этиб, хонадон калитини соҳибасига тантанали равишда топширди.

Тадбир давомида хонадон соҳибаси ва унинг фарзандлари учун яратилган шароитлар кўздан кечирилиб, уларнинг келгуси ҳаёти фаровон ва баракали бўлиши ҳақига дуолар қилинди.

Аллоҳ таоло ушбу хайрли ишга ҳисса қўшган барча саховатпеша инсонларнинг эзгу амалларини даргоҳида қабул айласин.

"Вақф" хайрия жамоат фонди Тошкент вилояти филиали

Саховат ва меҳр-оқибат йўлидаги эзгу ишлар давом этади. 

Тошкент вилояти вакиллиги

Матбуот хизмати