Бугун, 22 апрель куни эрта тонгда Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ва Қашқадарё вилояти ҳокими Муроджон Азимов миллий кураш мусобақаси иштирокчилари билан бирга Қашқадарё вилоятининг Шаҳрисабз тумани Мираки шаҳарчасидаги сўлим ҳудудда янги боққа асос солдилар.   

Муфтий ҳазратлари Президентимиз ташаббуси билан “Яшил макон” умуммиллий лойиҳаси туфайли миллионлаб кўчатлар экилиб, юртимиз обод ва кўркам диёрга айланаётгани, яқинда боғ барпо этиш лойиҳаси йўлга қўйилгани, бу эзгу амал динимизда катта садақаи жория ҳисобланиши, шу боис халқимиз қадимдан бирор хайрли тадбир арафасида яхши ният ила кўчат ўтқазиб келгани, айни миллий кураш мусобақаси доирасида мўъжаз боққа асос солинаётганидан ҳам ана шундай эзгу мақсадлар кўзланганини баён этдилар. 
Шунингдек, Муфтий ҳазратлари бошчилигидаги мусобақа иштирокчилари мазкур боғнинг гуллаб-яшнаши, бу каби хайрли ишлар бардавом бўлишини сўраб хайрли дуолар қилдилар. 

Мусобақа тафсилотларини каналимизда кузатиб боринг. 

Ўзбекистон мусулмонлари идораси 
Матбуот хизмати