05 Июн, 2026, 18 Зулҳижжа, 1447
05 Июн, 2026, 18 Зулҳижжа, 1447
Ўзбекистон Республикаси Президентининг «Диний-маърифий соҳа фаолиятини тубдан такомиллаштириш чора-тадбирлари тўғрисида»ги фармони ва Вазирлар Маҳкамасининг «Ўзбекистон халқаро ислом академияси фаолиятини ташкил этиш ва қўллаб-қувватлаш чора-тадбирлари тўғрисида»ги қарори асосида академияда халқаро стандартлар ҳамда замонавий талабларга мос барча шароитлар яратилмоқда.
Ўтган қисқа давр мобайнида академия томонидан юртимиздаги ижтимоий-маънавий муҳитни янада соғломлаштириш, буюк алломаларимиз илмий меросини ўрганиш соҳасида етук мутахассис кадрларни тайёрлаш юзасидан кенг кўлами вазифалар амалга оширилаётир. Хусусан, таълим сифати ва илмий тадқиқотлар самарадорлиги янада оширилиб, бу борада дунёдаги нуфузли олий таълим ва илмий тадқиқот марказлари билан кенг доирада амалий илмий тадқиқотлар олиб борилаётгани алоҳида аҳамиятга эга.
Ўзбекистон халқаро ислом академияси Матбуот хизмати билдиришича, шу маънода, жорий йилнинг 5 июнида Ўзбекистон Республикаси Вазирлар Маҳкамасининг «Ўзбекистон халқаро ислом академиясига ўқишга қабул қилиш тартибини янада такомиллаштириш чора-тадбирлари тўғрисида»ги қарори ҳам муҳим янгилик бўлди.
Унга мувофиқ, 2020/2021 ўқув йилидан бошлаб Ўзбекистон халқаро ислом академияси бакалавриатига ўқишга кириш мақсадида ҳужжат топширган абитуриентлар учун дастлабки имтиҳондан ўтиш тартиби жорий этиладиган бўлди.
Мазкур имтиҳон натижаларига кўра абитуриентларга Давлат тест маркази томонидан ташкил этиладиган кириш имтиҳонларининг кейинги босқичлари (касбий (ижодий) имтиҳон ва тест синовлари)га рухсат бериш ёки рад этиш тўғрисида тегишли қарор қабул қилиниши белгиланди ва юқоридаги қарор асосида тасдиқланди. Бу эса «Ўзбекистон халқаро ислом академиясининг бакалавриатига қабул қилиш тартиби тўғрисида низом»да ҳам алоҳида тасдиқланди.
Демак, юқоридаги меъёрий-ҳуқуқий ҳужжатлар асосида Ўзбекистон халқаро ислом академиясига 2020-2021 ўқув йили учун абитуриентларнинг ҳужжатларини қабул қилиш жараёнлари 15 июндан — 5 июль кунига қадар давом этиши маълум қилинди.
Ушбу тартиб асосида абитуриентлар учун янгилик бўлган дастлабки имтиҳонни ўз вақтида топшириш ва белгиланган зарур балларни йиға олмаган тақдирда ўзи истаган бошқа олий ўқув юртига ҳужжат топшириш имконияти бой берилмаслиги таъминланади.
Шу ўринда Ўзбекистон халқаро ислом академиясида ташкил этиладиган Дастлабки имтиҳон тартиб-қоидалари ва ўтказиш шаклларига ҳам тўхталиб ўтиш жоиз.
Дастлабки имтиҳон ёзма шаклда, уч блокдан иборат бўлиб абитуриентлар қуйидаги синовлардан ўтади:
1. Интеллектуал даража. Унда абитуриентнинг мантиқий ва кенг фикрлаш, турли тушунчалар, фактларни таққослаш ҳамда уларнинг ўртасидаги ўзаро боғлиқликни топиш салоҳияти баҳоланади. Бунда абитуриент максимал 40 балл олиш имкониятига эга.
2. Маънавият ва маърифат асослари бўйича билим даражаси. Максимал 30 балл. Бунда абитуриентнинг маънавият асослари, миллий ғоя ва мафкура, ҳуқуқ ва сиёсат, адабиёт, тарих, исломшунослик ва диншуносликка тааллуқли ва бошқа масалалар юзасидан мантиқий ва асосли тушунтириш қобилияти ўрганилади.
3. Хорижий тилларни (инглиз, француз ва немис тиллари) билиш даражаси. Максимал 30 балл. Ушбу босқичда абитуриент Ўзбекистон маданияти, санъати, тарихи, географиясига тааллуқли ва бошқа соҳаларга оид масалалар юзасидан мантиқий ва асосли тушунтириш қобилиятини намоён этиши зарур бўлади.
Таъкидлаш жоизки, агарда абитуриент хорижий тиллар бўйича етакчи халқаро ва баҳолаш тизимларининг амалдаги сертификатларига, шу жумладан, IELTS бўйича камида 5,5 балл, TOEFL IBT бўйича камида 72 балл билим даражаси кўрсаткичи билан халқаро сертификатларга, шунингдек, тест DaF, GOETНE сертификати, DELF сертификати имтиҳонларидан CEFR услуби бўйича В2 минимал даражасига ҳамда Вазирлар Маҳкамасининг «Олий таълим муассасаларига ўқишга қабул қилишда миллий ҳамда халқаро баҳолаш тизимлари сертификатларини татбиқ қилиш чора-тадбирлари тўғрисида» 2019 йил 13 майдаги 395-сон қарори талабларига мувофиқ сертификатларга эга бўлган абитуриентларга ушбу саволлар блоки бўйича максимал балл берилади.
Ҳозирги бутун дунёда кечаётган пандемия шароитидан келиб чиққан ҳолда қабул жараёни билан боғлиқ бўлган саволларга Академия расмий веб-сайти (www.iiau.uz) ҳамда ижтимоий тармоқлардаги телеграм саҳифалари орқали жавоб олиш мумкин. Барча янгилик ва маълумотлар доимий эълон қилиб борилади.
Ўзбекистон мусулмонлари идораси матбуот хизмати
Бисмиллаҳир Роҳманир Роҳийм
Юртимизга Ёз ойлари кириб келди. Шукрлар бўлсин.
Мактабларда ўкув йили тамомланди. Кеча биринчи синфга қадам қўйган битирувчига ҳам айланди.
Мактабги тамомлаганлар Олий даргоҳларига талаба булиш умидида аризалар топшириш тараддудида.
Битирувчи ўкувчилардан бошқа фарзандларимиз ёзги таътил даврида оила бағрида. Аммо минг афсуски, ўкув йили тугади дегани, таълим олиш тарбия олиш тугамади.
Зеро, Расулуллох алайхиссалом: “Бешикдан кабргача илм изла!” дедилар.
Эътибор берайлига, бешикдан кабргача деган замон уз ичига ёз ойларини хам олади.
Доно халқимизда ажиб накл бор.
“Дўстни ғафлати душманни ганимати”
Дарҳақиқат фарзандларимизни назоратсиз қолдирсак, ҳохлаган ишларига қўл уришлари аниқ.
Аллоҳ таоло инсонни илм билан шарафлади. Илм – қалбларни ёритадиган нур, жаҳолат зулматидан нажот берадиган йўлдир. Шу сабабли мўмин банда илм олишни маълум бир фаслга, ёшга ёки вақтга боғлаб қўймайди. Чунки илм олиш ибодати умрнинг охиригача давом этадиган шарафли вазифадир.
Аллоҳ таоло Қуръони каримда марҳамат қилади: “Айтинг: “Биладиганлар билан билмайдиганлар тенг бўлурми?” (Зумар сураси, 9-оят).
Яна бир оятда: “Аллоҳ сизлардан имон келтирганларни ва илм берилган зотларни баланд даражаларга кўтарур” (Мужодала сураси, 11-оят).
Бу оятлар илм аҳлининг Аллоҳ ҳузуридаги юксак мақомини кўрсатади. Илм эгаллаш учун ёзнинг иссиғи, қишнинг совуғи, таътил ёки бошқа баҳоналар тўсиқ бўла олмайди.
Пайғамбаримиз Муҳаммад соллаллоҳу алаҳҳи васаллам марҳамат қиладилар: “Илм талаб қилиш ҳар бир мусулмонга фарздир” (Ибн Можа ривояти).
Ҳадисда илм талаб қилиш учун муддат ёки чеклов белгиланмаган. Демак, мусулмон киши доимо ўрганишда, изланишда ва ўзини камолга етказишда давом этиши керак.
Салаф улуғларимиз илм йўлида мислсиз сабр ва матонат кўрсатганлар. Имом Абу Ҳанифа раҳимаҳуллоҳ, Имом Бухорий раҳимаҳуллоҳ, Имом Термизий раҳимаҳуллоҳ каби буюк алломалар умрларининг сўнгги дамларигача илм билан машғул бўлганлар. Улар учун “дам олиш” илмни тарк қилиш эмас, балки илмни янада мустаҳкамлаш воситаси эди.
Афсуски, баъзан айрим кишилар таътил кунларини бекорчилик, фойдасиз машғулотлар ёки вақтни беҳуда сарфлаш билан ўтказадилар. Ҳолбуки, бир дақиқа ҳам қайтиб келмайди. Вақт – Аллоҳнинг энг улуғ неъматларидан биридир. Расулуллоҳ саллоллоҳу алаҳҳи васаллам айтадилар: “Икки неъмат борки, кўп одамлар уларда алданиб қоладилар: соғлиқ ва бўш вақт” (Имом Бухорий ривояти).
Шунинг учун таътил кунлари Қуръон тиловати, диний ва дунёвий фойдали китобларни мутолаа қилиш, илмий суҳбатларда қатнашиш, янги кўникмаларни ўрганиш билан безатилиши лозим.
Илмнинг энг гўзал жиҳати шундаки, у инсонни дунёда ҳам, охиратда ҳам бахт-саодатга элтади. Мол-дунё сарфланса камаяди, илм эса улашилган сари зиёда бўлади. Шунинг учун ҳақиқий муваффақият эгаси – вақтини илм билан қадрлаган кишидир.
Хулоса ўрнида шуни айтиб ўтмоқчимиз.
Таътил мактабда, олийгоҳда ёки иш фаолиятида бўлиши мумкин. Аммо илм олишда таътил бўлмайди. Мўмин инсон ҳар куни янги бир фойдали маълумот ўрганишга, Қуръон ва суннат илмларини эгаллашга интилади. Чунки илм йўли – жаннат йўлидир.
Пайғамбаримиз соллаллоҳу алайҳи васаллам марҳамат қиладилар: “Ким илм излаш йўлига кирса, Аллоҳ унга жаннат йўлини осон қилиб қўяди” (Имом Муслим ривояти).
Аллоҳ таоло барчамизни илмни севувчи, унга амал қилувчи ва уни бошқаларга етказувчи бандаларидан қилсин.
Шуҳратилла Исроилов,
Учқўрғон тумани бош имом-хатиби.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 