Умра мавсуми бошланди
Бугун, 14 ноябрь куни ўзбекистонлик зиёратчиларнинг дастлабки гуруҳи эзгу ниятлар ила эҳтиромлар оғушида умра ибодатини адо этиш учун Саудия Арабистонига жўнаб кетадилар. Шу билан юртимизда “Умра – 2019/20” мавсуми яхши кайфиятда бошланади.
Зиёратчилар ўн кунлик умра сафари давомида Мадина шаҳрида 3 кун, Макка шаҳрида 7 кун бўладилар. Улар мазкур шаҳарларда барча зарур шароитларга эга меҳмонхоналарда истиқомат қиладилар ҳамда уларга тажрибали ишчи гуруҳи, элликбошилар ва малакали шифокорлар хизмат кўрсатади.
Тайёргарлик доирасида барча зиёратчилар мавсумий касалликларга қарши эмланиб, давлатимиз рамзи туширилган камзул ва сумкалар билан таъминланди. Сафар олдидан уларга умра сафарининг моҳияти, уни адо этишга доир масалалар гуруҳ раҳбарлари томонидан тушунтирилди.
Саудия Арабистонида виза бериш тизимида янги тизимнинг жорий этилиши баъзи кечикишларга сабаб бўлди. Шунга қарамасдан, олиб борилган саъй-ҳаракатлар натижасида, 2019 йилнинг 14 ноябрь кунидан бошлаб ҳар куни “Тошкент–Жидда–Тошкент” йўналишида умра сафари йўлга қўйилди. Ушбу мавсум 2020 йилнинг ёз ойларига қадар давом этади.
Юртдошларимиз ҳукуматимиз томонидан тақдим этилаётган қулай имкониятлардан унумли фойдаланиб, муборак ибодатларини мукаммал бажаришларини Ҳақ таолодан сўраймиз.
Маълумот ўрнида, Давлатимиз Раҳбарининг ташаббуслари билан Умра зиёратлари йил давомида квотасиз амалга оширилиши белгиланиб, 2019 йилнинг 1 апрелидан эътиборан ҳафтасига 7 та рейсда Умра сафарига фуқароларимизни юбориш бошланган. Ушбу муддат ичида 28 мингга яқин юртдошларимиз Умра сафарида бўлиб қайтдилар.
Аллоҳ таоло муборак заминга йўл олаётган зиёратчиларимизнинг ибодатларини мақбул айласин!
Ўзбекистон мусулмонлари идораси Матбуот хизмати
ТИВда Индонезия, Малайзия ва Сингапурдан Ўзбекистонга кўпроқ сайёҳларни жалб қилиш масалалари муҳокама қилинди
13 июль куни Ташқи ишлар вазирлигида давлатимиз раҳбарининг 2021 йил 9 февралдаги “Ўзбекистон Республикасида ички ва зиёрат туризмини янада ривожлантириш чора-тадбирлари тўғрисида”ги фармони ҳамда Вазирлар Маҳкамасининг 2026 йил 9 январдаги “Умра плюс” зиёрат туризми дастурини амалга оширишга қаратилган қўшимча чора-тадбирлар тўғрисида”ги қарори ижросини таъминлаш доирасида Индонезия, Малайзия ва Сингапурдан мамлакатимизга ташриф буюраётган сайёҳлар оқимини кенгайтиришга қаратилган йиғилиш бўлиб ўтди, деб хабар қилмоқда “Дунё” АА мухбири.
ТИВ маълумотига кўра, гибрид форматда ташкил этилган ушбу йиғилишда Ўзбекистон Туризм қўмитаси, Дин ишлари бўйича қўмитаси, Техник жиҳатдан тартибга солиш агентлиги, Бухоро, Самарқанд вилоятлари ва Тошкент шаҳри ҳокимликлари, “Uzbekistan Airways” АЖ, “Uzbekistan Airports” АЖ, маҳаллий авиаташувчи компаниялар, “Uzbekistan–Malaysia–Indonesia Travel Association”, “Умра зиёратлари сайёҳлик агентликлари ассоциацияси”, шунингдек, туристик компанияларнинг 40 нафарга яқин вакиллари иштирок этишди.
Йиғилишда Жанубий-Шарқий Осиё давлатларидан Ўзбекистонга сайёҳлар оқимини ошириш йўлидаги транспорт-логистика, хизмат кўрсатиш ва тарғибот масалалари атрофлича муҳокама қилинди. Хусусан, Малайзиядан қатновларни кўпайтириш ҳамда Индонезия ва Сингапурдан тўғридан-тўғри авиарейсларни йўлга қўйиш, “Умра+” дастури доирасида зиёрат туризми бўйича тарғибот ишларини жадаллаштириш, хорижий зиёратчилар учун инфратузилмани халқаро ҳалол стандартларига мослаштириш ва сайёҳлик компаниялар билан ушбу йўналишда олиб борилаётган ишларни мувофиқлаштириш масалалари муҳокама қилинди.
Тадбир “муаммо-таклиф-ечим” форматидаги очиқ мулоқот кўринишида бўлиб ўтди ва унда томонлар соҳадаги муаммо ҳамда мавжуд имкониятлар юзасидан конструктив фикр алмашишди.
Ўзбекистон мусулмонлари идораси Матбуот хизмати
