Нубувват хонадонида тарбия топган тобеин
Ичида Ҳасан Басрийдек олим бўлган қавм
қандай қилиб залолатга юз тутсин?!
(Маслама ибн Абдулмалик)
Суюнчи хабарини келтирган хабарчи Пайғамбаримиз соллаллоҳу алайҳи васалламнинг завжалари Умму Салама розияллоҳу анҳога чўриси “Ҳайранинг” кўзи ёригани ва ўғил кўргани ҳақидаги хушхабарни етказди.
Мўминларнинг онаси Умму Салама розияллоҳу анҳони бу хушхабардан қалблари сурурга тўлди. Зудлик билан Ҳайранинг оиласига одам юбордилар. Чақалоқ ва унинг онаси туғруқдан кейинги кунларини нубувват хонадонида ўтказишларини хоҳладилар. Чунки Ҳайра Умму Салама розияллоҳу анҳо учун ниҳоятда қадрли ва азиз эди.
Куп ўтмай, Ҳайра боласини кўтариб кириб келди. Умму Салама розияллоҳу анҳонинг кўзлари болага тушиши билан меҳрлари жўшиб кетди. Гўдак ниҳоятда чиройли, истарали бўлиб, кўрган инсонни кўзларини қувонтирар, қалбини асир этар эди.
Сўнг Умму Салама розияллоҳу анҳо:
– Унга исм кўйдингми? – деб сўрадилар.
– Йўқ, эй онажон, унга ўзингиз истаган исмни қўйишингиз учун бу ишни сизга қолдирдим, – деди.
Умму Салама розияллоҳу анҳо:
– Унинг исмини Аллоҳдан барака сўраб, Ҳасан қўямиз, – дедилар.
Сўнг, уни қўлларига олиб ҳаққига яхши дуолар қилдилар.
Ҳасаннинг туғилишидаги хурсандчилик фақат мўминларнинг онаси Умму Салама розияллоҳу анҳонинг уйларидагина чекланиб қолмай, балки буюк саҳобий, ваҳий котиби Зайд ибн Собит розияллоҳу анҳунинг хонадонини ҳам қамраб олган эди. Чунки чақалоқнинг отаси Ясор, Зайд ибн Собит розияллоҳу анҳунинг қули эди.
Ҳасан ибн Ясор (кейинчалик у Ҳасан Басрий бўлиб танилди) нубувват хонадонида ўсиб улғайди. Пайғамбаримиз соллаллоҳу алайҳи васалламнинг завжалари Умму Салама куняси билан маъруф бўлган, Ҳинд бинти Суҳайл розияллоҳу анҳонинг бағриларида тарбияланди. Умму Салама розияллоҳу анҳо араб аёллари ичида энг оқила, мурувватли ва қатъиятлиси эдилар. Шунингдек, Мўминларнинг оналари ичида энг олимаси ҳам эдилар. Қолаверса, Пайғамбаримиз соллаллоҳу алайҳи васалламдан энг кўп ҳадис ривоят қилганлар. Ривоят қилган ҳадисларининг сони уч юз саксон еттитадан ошиқ эди. Бундан ташқари, жоҳилият даврида ўқиш-ёзишни биладиган жуда озчиликни ташкил қилган аёллардан бири эдилар.
Кўпинча Ҳайра уй юмушлари билан ташқарига чиққан вақтда эмизикли чақалоғининг қорни очиб йиғлар эди. Кунларнинг бирида гўдак каттиқ йиғлай бошлади. Мўминларнинг онаси Умму Салама розияллоҳу анҳо уни бағриларига олиб, овута бошладилар. Онаси келгунича тинчлантирмоқчи бўлиб кўкракларини унинг оғзига солдилар. Болага меҳрлари жўшиб кетганидан муборак кўкракларига сут кела бошлади. Насибаси улуғ чақалоқ мўминларнинг онасини тўйиб эмгач, тинчланиб ухлаб қолди.
Шу воқеа сабаб, Умму Салама розияллоҳу анҳо Ҳасанга икки жиҳатдан она бўлдилар. Бири хар бир мўминга она бўлишлари, иккинчиси унга сут она бўлишлари…
Мўминлар оналарининг ўзаро мустаҳкам алоқалари ва уйларининг бир-бирига яқинлиги бу иқболи баланд болага Исломдаги шонли аёлларнинг уйларига тез – тез бориб туриш ва буюк мураббияларнинг гўзал ахлоқлари билан хулқланиш имконини берди. У ўзининг қувноқ, серғайрат ва тетик ҳаракатлари билан нубувват хонадонини бахту қувончга тўлдирар эди.
Ҳасан нубувватнинг хушбўй ифори билан муаттар бўлган, унинг ёрқин нури билан чароғон хонадонда ўсиб-улғаяр, мўминларнинг оналарининг уйларидаги тотли чашмалардан тўйиб – тўйиб сув ичар, Расулуллоҳ соллаллоҳу алайҳи васалламнинг масжидларидаги буюк саҳобалар қўлларида сабоқ олар эди.
У Усмон ибн Аффон, Али ибн Абу Толиб, Абу Мусо Ашъарий, Абдуллоҳ ибн Умар, Абдуллоҳ ибн Аббос, Анас ибн Молик, Жобир ибн Абдуллоҳ (Аллоҳ улардан рози бўлсин) каби фақиҳ саҳобалардан ҳадислар ривоят қилди. Саҳобалар ичида мўминларнинг амири Али ибн Абу Толиб розияллоҳу анҳуга муҳаббати ўзгача эди. Чунки у зотдаги динда қатъият ва сабот билан туриш, ибодатларни мукаммал тарзда адо этиш, дунё ва унинг зебу зийнатларидан воз кечиб, тақводорликни маҳкам тутиш каби хислатлари уни қойил қолдирган эди. Қолаверса, Али ибн Абу Толиб розияллоҳу анҳунинг ёрқин сўзлаш латофати, етук ҳикмати, қисқа иборалардаги жамловчи сўзлари ва қалбларни титратувчи ваъз-насиҳатлари уни сеҳрлаган эди. У Али ибн Абу Толиб розияллоҳу анҳунинг тақводорлик ва ибодатда мустахкам туришлари каби хулқларини ўзига ғоя қилиб олди. Шунингдек, у зотнинг фасоҳат ила баён этишлари, нотиқлик услубларини ҳам ўзлаштирди.
Давоми бор...
Манбалар асосида
Тошкент тумани “Холмуҳаммад ота” жоме масжиди
имом-хатиби Авазхўжа БАҲРОМОВ тайёрлади
ЎМИ Матбуот хизмати
Ўзбекистон халқаро исломшунослик академияси Индонезияда қатор ҳамкорлик келишувларига эришди
Ўзбекистон халқаро исломшунослик академияси (ЎХИА) делегациясининг Индонезияга хизмат сафари амалга оширилди, деб хабар бермоқда “Дунё” АА мухбири.
Ташриф давомида ЎХИА вакиллари икки мамлакат ўртасида таълим, илм-фан ҳамда экстремизм ва терроризмнинг олдини олиш соҳаларидаги ҳамкорликни янада мустаҳкамлашга бағишланган қатор учрашувларда иштирок этди.
Хусусан, Индонезия Терроризмга қарши курашиш миллий агентлиги (BNPT)да бўлиб ўтган музокараларда экстремизмга қарши курашда комплекс ёндашувнинг аҳамияти алоҳида таъкидланди.
Агентликнинг халқаро алоқалар департаменти директори, Индонезия Миллий полицияси генерали Дҳани Ҳернандо билан бўлиб ўтган мулоқот чоғида икки мамлакатнинг тегишли идоралари ўртасида ҳамкорликни ривожлантириш, қўшма лойиҳаларни амалга ошириш ҳамда тажриба алмашиш амалиётини йўлга қўйиш масалалари муҳокама қилинди.
Тадбирда ЎХИА томонидан юртимизнинг экстремизм ва терроризмнинг олдини олиш соҳасида тўплаган тажрибаси ҳақида алоҳида тўхталиб ўтилди. Томонлар ўзаро тажриба алмашиш, қўшма тадқиқотлар ва ҳамкорлик лойиҳаларини амалга ошириш юзасидан келишувга эришди.
Ташриф давомида делегация аъзолари Индонезиядаги Саҳид университети проректори Ани Сиска билан ҳам мулоқот қилди. Суҳбат чоғида профессор-ўқитувчилар ва талабалар алмашинувини йўлга қўйиш, онлайн маърузалар ташкил этиш, илмий тадқиқотлар ва академик мобилликни ривожлантириш бўйича қўшма “Йўл харитаси”ни ишлаб чиқишга келишиб олинди.
Стратегик ва халқаро тадқиқотлар маркази (CSIS) вакиллари билан ўтказилган мулоқотда ёшларни радикал ғоялар таъсиридан ҳимоя қилиш, стратегик коммуникациялар, муқобил маърифий нарративларни ишлаб чиқиш ҳамда аналитик тадқиқотларни кучайтириш масалалари муҳокама қилинди. CSIS вице-президенти Медилина Ҳендитио ЎХИА олимлари ва тадқиқотчилари учун халқаро илмий дастурлар, стажировкалар ва грант лойиҳаларида иштирок этиш имкониятларини таклиф қилди.
Ташриф доирасида ЎХИА ҳузуридаги “Зиё” медиа маркази томонидан Индонезиянинг экстремизмга қарши курашиш тажрибаси, соҳа мутахассислари билан интервьюлар ва махсус репортажлар тайёрланди. Ушбу материаллар асосида ҳужжатли фильм яратиш режалаштирилгани ҳам мазкур ташрифнинг амалий натижаларидан бири бўлди.
Индонезияга амалга оширилган мазкур ташриф Ўзбекистон ва Индонезия ўртасида таълим, илм-фан, хавфсизлик ҳамда экстремизмнинг олдини олиш соҳаларидаги ҳамкорликни янги босқичга олиб чиқишга хизмат қилди.
Ўзбекистон мусулмонлари идораси Матбуот хизмати
