25 Август, 2025, 2 Рабиъул аввал, 1447
25 Август, 2025, 2 Рабиъул аввал, 1447
Аллоҳга ҳамдлар бўлсинки, оммавий тарзда ўтказилаётган Қуръон мусобақасининг илк йилидаёқ диёримизда Аллоҳнинг каломига муҳаббат қўйган қори йигит-қизларимиз сони минг-минглаб экани яққол намоён бўлди. Мусобақанинг илк босқичини кузатар эканмиз, қори ва қорияларимизнинг юзидаги нур, муомаласидаги самимийлик ва қироатидаги жозибадан барчамиз сўз билан таърифлаб бўлмайдиган даражада мамнунликни ҳис этдик.
Агар инсоннинг қалби Қуръонга муҳаббатли бўлса, унинг қироатидан лаззатланади, унга бор эътиборини қаратади ва бунинг натижасида чуқур тушуниш учун тадаббур ҳосил бўлади. Барча ишлари ўнгидан олади, нафс истаклари камайиб, ихлоси ортиб бораверади. Аксинча, агар муҳаббат бўлмаса, қалбнинг Қуръонга юзланиши қийин бўлади. Қуръонга томон бурилиш фақатгина нафсини қаттиқ тергаш, ўзини мажбурлаш орқали бўлади.
Биз орзу қилган комил инсон ва баркамол авлодлар мана шундай Қуръонга муҳаббатли кишилардан чиқади. Яратган Парвардигорга минг шукрки, мана шундай инсонлар бизнинг ўлкамизда ҳали жуда ҳам кўп экан. Бундай улуғ неъматни Ҳақ таоло бардавом айласин, барча мутасаддилардан Аллоҳ таоло рози бўлсин.
Ташкилий ҳайъат томонидан Матбуот хизматига маълум қилинишича, Қуръон мусобақаси иштирокчиларини рўйхат олиш ишлари 15 январь куни якунланган. Унга кўра, жами иштирокчилари сони 5366 нафарни ташкил этган. Шундан 3263 нафар эркак 2103 нафари аёл-қиз иштирокчилар экан. Мана бу кўрсаткич ҳақиқий кутилмаган натижа, тарихий воқеа бўлди.
Мана энди кўпчилик муҳтарам Президентимизнинг Қуръон мусобақасини ўтказишга катта ташаббус кўрсатиб: “Қуръонни эшитиш, эшита олиш юксак маънавият, маърифат. Қуръон ҳеч қачон ёмонликка даъват қилмайди. Агар, Қуръони каримни эшита олсак, эшиттира олсак бу муваффаққият бўлади. Элимизга нур келади”, деб айтган гапларининг ҳикматини англаган бўлса, ажаб эмас...
Мусобақаларнинг ўтиш жараёнларини кузата туриб, мана шундай файзу баракотли кунлардан мамнун бўлган ҳамюртларимизнинг кўзлари ёш ила қўлларини дуога кўтариб, унинг шукронаси учун яратган Парвардигорга ҳамду санолар айтишаётгани, бу ишга ташаббускор бўлган Давлатимиз раҳбари, ташкилий ишларга бош бўлиб турган олиму уламоларимиз ҳаққига дуолар қилишаётганинг бевосита гувоҳи бўлдик, Яратган Парвардигорга шукр.
Азизлар барчангизнинг эътиборингизга Қуръон мусобақаси иштирокчиларининг минтақа, аёл-эркак ва йўналишлар бўйича сонини ҳавола этамиз.
Қори ва қорияларимизнинг чиқишларини жонли кузатиб, Қуръонга бўлган муҳаббатимизни янада сайқаллашга чақирамиз.
Ўзбекистон мусулмонлари идораси Матбуот хизмати
#xabar #vaqf #muhokama
Шу йил 21 август куни Ўзбекистон мусулмонлари идораси раиси, муфтий Шайх Нуриддин Холиқназар ҳазратлари раислигида “Вақф” хайрия жамоат фонди Васийлик кенгашининг навбатдаги йиғилиши бўлиб ўтди. Унда фонднинг жорий йилнинг шу давригача бўлган иш фаолияти, хайрия ишлари кўлами ва келгусидаги истиқболли дастурлари кўриб чиқилди.
Йиғилишда сўзга чиққан нотиқлар фонд томонидан кам таъминланганларни қўллаб-қувватлаш борасида амалга оширилган салмоқли ишларни юқори баҳолашди. “Вақф” фонди томонидан амалга оширилган хайрия ишлари ўтган йилнинг шу даврига нисбатан сезиларли ошгани қайд этилиб, уйга муҳтож 43 та оилага ҳомийлар кўмагида тўлиқ жиҳозланган уй қуриб берилгани, жарроҳлик амалиёти, даволаниш ва ногиронлиги бўлган фуқаролар соғликларини тиклаш учун 1200 нафар фуқарога моддий ёрдам кўрсатилгани ижобий натижа сифатида баҳоланди. Шунингдек, ёрдамга муҳтож оила фарзандларига ўқув қуроллари тарқатилгани ва чекка ҳудудларда қудуқ қазиб, сув чиқариш ишлари амалга оширилгани ҳамда ўқув марказлари, тиббиёт муассасалари ва хорижий ҳамкорлар билан алоқалар ҳам эътироф этилди.
Шундан сўнг фонд олдида турган муҳим вазифалар, жумладан “Вақф” мулкларини шакллантириш ва янгиларини харид қилиш, фонд марказий аппарати ва ҳудудий филиаллар штат жадвалларини қайта шакллантириш, фонднинг халқаро алоқаларини ривожлантириш каби масалалар муҳокама қилинди. Васийлик кенгаши аъзолари кун тартибидаги масалалар юзасидан ўз фикрлари ва таклифларини билдириб ўтишди.
“Вақф” хайрия жамоат фонди мулкларини шакллантириш, уларни кўпайтириш бу соҳада амалга оширилаётган хайрия ишлари салмоғининг ошишига хизмат қилиши қайд этилиб, зарур ҳолларда чет элдаги вақф мулкларини ўрганиш, хориждаги вақф фондлари билан ҳамкорлик қилиш кераклиги айтиб ўтилди.
Муфтий ҳазратлари фонднинг келгуси фаолиятида ҳар доимгидек ижтимоий ҳимояга муҳтож бўлган аҳоли қатламини қўллаб-қувватлашни янада кенгайтириш, ўқув юртларида ўқиётганларнинг тўловларини қоплаш ва меҳр-мурувват тадбирлари салмоғини ошириш лозимлигини таъкидлаб ўтди.
Шунингдек, фонд фаолиятини оммалаштириш, кўчмас мол-мулклардан самарали фойдаланиш, хорижий илғор тажрибаларни ўрганиш ва маблағлар айланмасида шаффофликни таъминлаш кабиларга урғу қаратилди.
Йиғилишда тегишли қарорлар қабул қилинди.
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 