Ҳукумат қарори билан буюк табиб ва қомусий олим Абу Али ибн Синонинг бой илмий меросини чуқур ўрганиш, асарларини кенг тарғиб қилиш ҳамда унинг жаҳон илм-фани ривожига қўшган ҳиссасини янада кенг намоён этиш бўйича 2030 йилгача мўлжалланган «йўл харитаси» тасдиқланди.

Ҳужжат доирасида 2030 йилда нишонланадиган аллома таваллудининг 1050 йиллигига тайёргарлик кўриш, халқаро илмий ҳамкорликни мустаҳкамлаш ва Ибн Сино меросини замонавий тадқиқотлар асосида ўрганишга қаратилган қатор муҳим вазифалар белгиланди, хабар бермоқда iccu.uz.

Жумладан, 2026 йил октябрь ойида Тошкент шаҳрида «Ибн Сино — Ғарб ва Шарқ фалсафий тафаккурининг буюк намояндаси» мавзусида халқаро илмий конференция ўтказиш, олий тиббий таълим муассасалари, илмий марказлар, кутубхоналар ва даволаш-профилактика муассасаларида илмий-амалий анжуманлар, кўргазмалар ҳамда очиқ маърузалар ташкил этиш режалаштирилган.

Шунингдек, хорижий мамлакатларда илмий экспедициялар ўтказиш, алломанинг чет элларда сақланаётган қўлёзмаларини жамлаш, «Мўъжаз ал-Қонун», «Қонунча», «Ал-Ишорот ва ат-танбиҳот», «Донишнома», «Китоб аш-Шифо» ва «Шарқ фалсафаси» каби асарларини ўзбек тилига таржима қилиш, уларнинг босма ва электрон нашрларини тайёрлаш ҳамда «Ибн Сино» халқаро мукофотини таъсис этиш назарда тутилган.

Қарорга мувофиқ, Бухоро давлат тиббиёт институти ҳузурида давлат муассасаси шаклида Абу Али ибн Сино илмий-тадқиқот марказини ташкил этиш тўғрисидаги таклиф ҳам маъқулланди. Марказнинг асосий вазифалари Ибн Сино тиббий меросини ўрганиш, тадқиқот натижаларини замонавий табобатда қўллаш, қўлёзмаларни жамлаш ва таржима қилиш, уларнинг электрон платформасини яратиш, шунингдек, тиббиёт ходимлари ҳамда тиббиёт тарихи билан қизиқувчилар учун ўқув курслари ва маҳорат дарсларини ташкил этишдан иборат.

Мазкур ташаббуслар буюк алломанинг бой илмий меросини асраб-авайлаш, унинг жаҳон цивилизацияси ва тиббиёт тараққиётига қўшган улкан ҳиссасини янада чуқур ўрганиш ҳамда келажак авлодларга етказишда муҳим аҳамият касб этади.

Ўзбекистон мусулмонлари идораси Матбуот хизмати