30 Сентябр, 2024, 27 Рабиъул аввал, 1446
30 Сентябр, 2024, 27 Рабиъул аввал, 1446
Жорий йилнинг 9 сентябрь куни Ўзбекистон мусулмонлари идораси раиси ўринбосари, Тошкент ислом институти ректори, профессор Муҳаммадолим домла Муҳаммадсиддиқов ва Дин ишлари бўйича қўмита раисининг биринчи ўринбосари Даврон Махсудов БМТнинг Аҳолишунослик жамғармаси – UNFPA Ўзбекистондаги масъуллари ва Мисрнинг Ўзбекистондаги элчиси ҳамда Ал-Азҳар мажмуаси вакиллари иборат мартабали меҳмонлар билан учрашув ўтказди.
Мулоқот аввалида Муҳаммадолим домла Муҳаммадсиддиқов меҳмонларни ташриф билан қутлаш баробарида кейинги йилларда юртимизда барча йўналишлар қатори диний-маърифий соҳада ҳам катта ижобий ўзгаришлар бўлаётгани, жумладан, фуқароларга Қуръони карим ва тажвидни ўргатиш ишлари тизимли йўлга қўйилгани, янги диний таълим муассасалари очилаётгани, улардаги фан дастурлари сифат ва мазмун жиҳатдан такомиллаштирилаётгани, зиёратчиларимизни умрага чекланмаган ҳисобда юбориш йўлга қўйилгани, ҳаж сафари квотаси ҳам йилдан-йилга ошириб борилаётганини алоҳида қайд этди. Шунингдек, Ўзбекистон мусулмонлари идораси фаолияти ҳақида сўзлаб берди.
Дин ишлари бўйича қўмита раисининг биринчи ўринбосари Давронбек Махсудов сўнгги йилларда Президентимиз ташаббуси билан мамлакатимизнинг янги тараққиёт даврида барча ислоҳотлар инсон ва унинг қадрини юксалтиришга қаратилгани, диний-маърифий жабҳада ҳам кўламли ислоҳотлар амалга оширилаётгани, хорижий давлат ва халқаро ташкилотлар билан самарали ҳамкорлик алоқалари йўлга қўйилгани, мазкур учрашув ҳам ана шу йўналишда биргаликдаги яқин алоқалар натижаси эканини таъкидлади.
Ислом олий уламолар кенгаши бош котиби, профессор доктор Аббас Шўмон, Ал-Азҳар мажмуасининг Халқаро ислом аҳолишунослик ва тадқиқот Маркази директори профессор Жамолиддин Абдулсурур, Миср Араб Республикасининг Ўзбекистондаги элчиси Амира Фаҳми хоним, БМТнинг Аҳолишунослик жамғармаси – UNFPA Ўзбекистондаги доимий вакили Нигина Абасзаде самимий қабул, хайрли тилак ва манфаатли суҳбат учун ташаккур айтишди.
Мартабали меҳмонлари ўз сўзи давомида янгиланаётган Ўзбекистонда ўзаро ҳамкорликдаги хайрли ишларни янада ривожлантиришга имконият ва шароитлар яратилаётгани, келгусида ҳамкорликдаги дастурларни амалга оширишда замонавий ахборот технология ва методлардан фойдаланиш зарурлиги, дастурларнинг кенг ёйилиши ва амалга ошишида диний соҳа вакилларининг аҳамияти ниҳоятда катталигини қайд этди.
Маълумот учун, мазкур мартабали меҳмонлар шу кунларда Тошкент шаҳрида бўлиб ўтаётган “Ўзбекистонда аёллар ҳуқуқларига оид ислом таълимоти меъёрларини ўрганишнинг назарий-тадбиқий жиҳатлари” мавзусидаги халқаро ўқув семинарда иштирок этмоқда. 9 сентябрь куни мазкур анжуманнинг очилиш маросими бўлиб ўтди. Унда Ўзбекистон мусулмонлари идораси раиси ўринбосари, Тошкент ислом институти ректори, профессор Муҳаммадолим домла Муҳаммадсиддиқов маъруза билан қатнашди. Ўқув семинар 12 сентябргача давом этади.
Ўзбекистон мусулмонлари идораси
Матбуот хизмати
Бугун, 30 сентябрь куни Ўзбекистон мусулмонлари идорасида Робиул аввал ойи муносабати билан Набий алайҳиссалом сийратларига бағишланган мавлиди шариф, Муфтий Шайх Нуриддин Холиқназар ҳазратларининг “Раббоний нидолар” ва “Ёшларга насиҳатим” китоблари тақдимоти бўлиб ўтди.
Тадбир Қуръони карим тиловати ва Муфтий ҳазратларининг дуолари билан бошланди.
Маросимда сўзга чиққан нотиқлар Ҳақ таоло диёримизга беҳисоб хайру баракаларини ёғдираётгани, сўнгги йилларда юртимизда диний-маърифий соҳада амалга оширилаётган ишларни ота-боболаримиз юз йиллар давомида орзу қилишгани, хусусан, Робиул аввал ойида юртимиздаги масжидларда мавлидлар ўқилиши, диний таълим муассасалари сони тобора ортиб, устоз ва талабаларга энг яхши шароитлар қилиб берилаётгани, юзлаб китоблар нашр этилаётганини алоҳида таъкидладилар.
Шунингдек, Муфтий ҳазратлари муаллифликларидаги ҳадиси қудсий ва ёшлар тарбиясига оид мазкур китобларни мутолаа қилган китобхон динимиз моҳиятини янада теран англаши, “Раббоний нидолар” ўзбек тилида қудсий ҳадислар жамланиб, мўътабар манбалар асосида шарҳланган илк нашр экани, “Ёшларга насиҳатим” китобида ёшларга оид муҳим масалалар содда, равон ва таъсирчан услубда ёзилганига урғу қаратилди.
Таъкидлаш жоизки, жорий “Ёшлар ва бизнесни қўллаб-қувватлаш йили”да юртимизда давлатимиз Раҳбари ташаббуси билан кўплаб хайрли ишлар амалга оширилмоқда. “Ёшларга насиҳатим” китоби ҳам ана шу ташаббусдан илҳом олиб ёзилган.
Китобни мутолаа қилган ўқувчи ўзини буюк аждодларимизнинг вориси эканлигини тасаввур этади ҳамда уларга муносиб авлод бўлишга, билим олиб етук шахс бўлиб вояга етишишга, юртимиз равнақи ва халқимиз фаровонлиги йўлида хизмат қилишга бел боғлайди. Зеро, китобдан кўзланган асл мақсад ҳам шу аслида.
Маросимда Робиул аввал – Расулуллоҳ соллаллоҳу алайҳи ва саллам таваллуд топган ой муносабати билан Пайғамбаримизнинг ҳаёт йўллари, у зотнинг бутун умматга, барча инсониятга эзгуликда намуна эканликлари оят ва ҳадислар, мавлиди шарифлар ва турли ижодий чиқишлар орқали намоён этилди.
Тадбир сўнггида Муфтий ҳазратлари сўзга чиқиб, сийрат ойида Муҳаммад соллаллоҳу алайҳи васаллам хусни хулқларини ўрганиш ва уларни фарзандларимизга ўргатиш инсон руҳий оламини бойитиши, мазкур китоблар халқимиз, айниқса, ёшларни илм-маърифатли қилиш йўлидаги камтарона уриниш эканини изҳор этдилар. Шунингдек, мана шундай маърифий тадбирларни ўтказишдан мақсад, халқимизни, айниқса, ёшларни комил инсон қилиб тарбиялаш, илм-маърифат, таълим-тарбиясини юксалтириш ҳамда юртимиз ривожи, динимиз равнақи ва халқимиз фаровонлигига ҳисса қўшадиган муносиб авлодни тарбиялаш эканини баён этдилар.
Қасидалар, муножотлар ва салавоти шарифлар маросимга ўзгача файз бахш этди.
Баҳриддин Хушбоқов,
Фаррух Йўлдошев (сурат),
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 