Халқаро анжуман
Глобал дунёда аждодларнинг илмий мероси ҳамда бой ҳаётий сабоқларига эҳтиёж ортиб бормоқда. Ёшлар тафаккурини билим зиёси билан тўлдиришга ҳаракат қилмас эканмиз, уларни чалғитадиган, ўз домига тортадиган бузғунчи ғоялар саноқсиз. Бироқ тафаккур ҳимоясига бир бутун бўлиб, жамият миқёсида киришилмас экан, натижаси ҳаминқадар бўлиб қолаверади. Шукрки, зоҳирий-ботиний хатарларга сергак миллатимиз бу борада анчайин жипс. Айни ҳаракатларга давлат миқёсида эътибор қаратилаётгани эса натижалар чўғини оловга айлантиради.
Президентимизнинг 2024-йил 15-августдаги “Имом Термизий таваллудининг 1200 йиллигини кенг нишонлаш тўғрисида”ги қарорида Тошкент ва Хива шаҳарларида “Ислом – тинчлик ва эзгулик дини” мавзусида, унинг доирасида Термиз шаҳрида “Имом Термизий илмий меросининг ислом цивилизациясида тутган ўрни” мавзусида халқаро илмий-амалий анжуманлар ўтказилиши белгиланган.
Манба: “Янги Ўзбекистон” газетаси 2024-йил 18-октабр, 211-сон
Мақоланинг аудио шакли
Саҳобалар ичида энг зеҳни ўткири Абу Ҳурайра розияллоҳу анҳу айтадилар: “Кунлардан бирида бозорга бордим. Одамларнинг мол-дунё билан овора эканликларини кўриб уларга:
– Сиз бу ерда савдо-сотиқ билан машғулсиз, Расулуллоҳ соллаллоҳу алайҳи васалламнинг мерослари тарқатилаётганидан хабарингиз йўқми? – дедим. Савдогарлар қўлларидаги молларини ташлаб:
– Йўқ, қаерда? – деб ҳовлиқиб сўрадилар.
– Фалон масжидда, – деб жавоб бердим. Улар шошиб масжид томон югуриб кетишди.
Аммо бироздан сўнг қайтиб келиб:
– Нега бизни алдадингиз? Масжидда ҳеч қандай мерос тарқатилмаяпти-ку? –дейишди.
Мен:
– Қандай қилиб? Ахир масжидда кимларни кўрдингиз? – деб сўрадим.
Улар:
– Қуръон ўқиётган қориларни ва ҳадис ўрганаётган толиби илмларни, –дейишди.
– Ана шу Расулуллоҳ соллаллоҳу алайҳи васалламнинг меросларидир, – деб жавоб бердим.
“Ўзимдан сўнг сизга икки нарса қолдирдим, агар уларни маҳкам тутсангиз ҳаргиз адашмайсиз. Улар Аллоҳнинг китоби ва Пайғамбарнинг ҳадисидир”, деган севикли Пайғамбаримиз Муҳаммад соллаллоҳу алайҳи васалламга салавоту саломлар бўлсин”.
Даврон НУРМУҲАММАД